去公園：Junipero Serra Playground

2011年9月5日

呢一個公園我地一家都耐不耐會嚟，曾經有段時間李生要教個契仔打藍球而每個星期都嚟一至兩日，除咗有藍球場之外，仲有一個小型會所，可以租俾人辦生日會或其他聚會，個活動室唔算大，但都可以坐幾十人。年幾前，小李生有個同學仔就喺呢度搞過生日會，我地嚟到覺得個公園幾好玩，所以之後我地自己就喺周末成日嚟。

個公園遊樂場係長方形，一邊有個小沙池，有個水喉可以玩水，小李生就最鍾意去果度玩，夏天我都無所謂會俾佢玩，但冬天就太凍啦。

沙池側邊有個structure，有大小三個滑梯，其中一個係旋轉滑梯，兩個小型滑梯較適合細個小朋友。個structure仲有monkey bars、firemen pole、吊環。

以前呢個吊環小李生唔多鍾意玩，因為腳掂唔到地佢好驚，而且佢大肌肉唔夠發達，比同齡小朋友發展慢，所以佢一向都唔鍾意玩，但而家佢已經可以差不多腳到地，慢慢都肯嘗試玩吓，不過就吊唔到幾耐。

中間呢個氹氹轉structure，豬扒妹同小李生一向都鍾意玩，但都係止於坐喺下面，好少話爬上去個structure度，今日李生朋友Uncle Paul咁啱路過，就教豬扒妹同小李生爬個structure。好明顯豬扒妹比小李生嘅大肌肉發達，佢不斷爬上到最高，可能同時間有另外一D小朋友玩，豬扒妹就係咁爬吓爬吓，上到去最高；小李生就話驚驚，因為佢怕高，只係肯留喺最下面。

另一個幾特別嘅係Flying Saucer，一般遊樂場只會有韆鞦，但呢個公園除咗有俾幼童坐果D，仲有一個Flying Saucer，可以同時坐兩三個小朋友，呢個豬扒妹次次去都要玩一大餐。Flying Saucer旁邊仲有個see-saw，不過而家豬扒妹同小李生仲細，要大人幫先玩到。

呢個係藍球場，今次老公帶咗兩架木飛機同對仔女放，不過佢地兩個玩咗一陣就冇興趣，因為個遊樂場吸引D。

藍球場側邊係兩個網球場，好天有太陽嘅周末都會有人嚟打網球。

個公園另一邊仲有一個Baseball Court同Running Track。

呢個公園最好就係唔太多人，因為位置比較偏D，周末唔算好多人，只係有時會有人喺度開生日會。會所旁邊有洗手間，非常乾淨。喺structure位置全部都有環保軟墊，小朋友跑同玩都唔駛擔心會受傷。呢個遊樂場裏面嘅structure適合Toddlers到7、8歲，唔算係好大，但要消磨一個鐘係完全冇問題。

個公園喺Lakeside neighborhood，Stonestown Shopping Mall附近，Merced Branch圖書館後面條街，要去嘅話地址係：300 Stonecrest Drive (between Broadmoor Drive & Winston Drive)，San Francisco, CA 94132。
http://www.yelp.com/biz/junipero-serra-playground-and-clubhouse-san-francisco

第102款：荷蘭式孖辮側蝴蝶 Dutch Braid Side Butterfly

2011年8月18日

呢個係以之前嘅荷蘭式孖辮做藍本，再加入造型部份，做成一個側蝴蝶。

首先鬢兩條荷蘭式髮辮，我隻蝴蝶側向右邊，所以整荷蘭式孖辮時，左邊一條要拉向右邊鬢，造型時就會順好多。

記住呢個日子：10月12日（星期三）

終於都殺到埋身啦，未Upgrade嘅網友好開工啦，因為10月12日就係試玩限期滿，到時仍未升級的現有Yahoo Blog用戶將不能再於舊平台上更新網誌，而舊平台會設為[只限閱覽]，想要更新blog就只能到全新平台上的自己blog。

其實Yahoo Blog都仲有好多問題，而且基本嘅Upload相寫Post都仲未穩定，Recent Updates果D又係未做到真正Update，個Visitor Counter係搞好咗，之前錯晒，不過仲有網友話計錯數，另外新嘅自訂欄目好似好多人用唔到，我未試過唔知得唔得，最想係可以好似以前咁自己Upload個header，做到真係個人化。

之前一路有人問幾時會係第二階段開始，幾時強制upgrade，因為有一班人upgrade咗新Blog，結果好似白老鼠咁，問題多多，眼見其他Blog友仲可以寫Blog，一切如常，自然眼紅。不過既然係要強制Upgrade，點解唔一早訂個日期，而家得一個星期，個個拿拿林去upgrade一定大塞車，到時冇相或者甩咗內文又唔知會搞到幾大件事。

未Upgrade新平台嘅網友，而家有個日子啦，快D upgrade啦，唔好等到最後果日，最緊要upgrade之前將所有內容備份先好按個Upgrade制呀，我估而家咁急又有咁多個Top Bloggers都未upgrade，呢個星期會好麻煩，唔知到時會點。不過我又好想睇吓所有人upgrade晒之後，係唔係可以解決到而家連結同關注嘅問題呢。

西蘭花雜果沙律 Broccoli Mixed Fruit Salad

2011年10月4日
呢個係我昨日整俾老公同我做午餐嘅沙律，因為老公要減肥，佢好努力減咗11磅啦，要獎勵下。

材料：
西蘭花　2顆（細顆嫩D好過大顆）
紅蘋果　1個
青蘋果　1個
桃　　　1個
提子　　隨意（切去連蒂果位，再切兩至三份，睇你D提子幾大粒）
沙律醬　隨意（Cesear dressing 最夾味）

做法：
1）將西蘭花莖切去（唔好掉咗，留番嚟切粒炒飯好食架），花部份切細成一小束一小束花咁。

2）紅蘋果、青蘋果、桃連皮切丁，唔鍾意食皮可去皮，我留番D皮一來有纖維質，二來有唔同色會靚D。
3）令生果唔好生銹，我會用少少鹽加入水中，將生果放入浸一陣，好少鹽已經得架啦。
4）浸完瀝乾水，我有個整沙律好架生，就係呢個，好簡單又快就會fing晒D水出嚟，我用咗就嚟7年啦。

5）加入沙律醬，拌勻西蘭花同生果。

6）最後裝盒加入提子喺面，完成。

整咗兩小盒加一大盒，夠晒我同老公兩個人食。

簡單涼拌青瓜

2011年10月1日

呢個係我去台灣餐館食完跟住果味整嘅，雖然唔係100％，都做到90％相似。

材料：
青瓜                 1條
密實袋              1個

調味料：
鹽 3/4茶匙
蒜頭                 2-3小粒（切碎或磨蓉）食得辛辣D可以加多D
糖                     半茶匙
白醋或米醋       1湯匙
麻油                  2茶匙

想食辣可以加切碎辣椒（我呢個冇加）

砵仔糕 Chinese Rice Pudding

砵仔糕 Chinese Rice Pudding

砵仔糕係香港人嘅集體回憶，以前細個住屋村，每日下午就會有個女人續層樓去叫賣砵仔糕、白糖糕，有時媽咪都會買俾我地幾兄弟姊妹食，一般都係咖啡色，即係用紅糖或庶糖整嘅，亦有白色嘅，即係白糖，我就偏好有紅豆嘅。

材料：
涷水 75ml
紅糖 3安士（若你想整白色砵仔糕就改用白砂糖）
粘米粉 5安士 （或者用粘米粉3安士加馬蹄粉1.5安士會較煙un）

熱水 160ml
紅豆 適量（蒸熟或煲熟）

碗仔 數隻（我用普通食飯碗約6個）

做法：
1）涷水75ml煮滾，加入紅糖煮溶，放涼待用。

2）加入粘米粉拌勻過篩，倒入熱水160ml拌勻。

3）隔水蒸熱碗仔，倒入粉漿至8成滿。

4）以大火蒸約1分半鐘。

5）加入適量紅豆，再蒸約15分鐘即成。

第三批髮夾

豬扒妹真係發開口夢都話想我整髮夾，今日一家去探完李生一個好耐冇見朋友，返到屋企其實都好攰，但好似都應承咗豬扒妹好耐，唔想又推話第日。但兩隻小魔怪纏住我，睇睇吓兩個又打交真係幾煩吓，中間有幾次要趕佢地出返去當罰，因為兩個你推我撞，結果就係出手你打我抓，於是媽咪一聲令下，兩個都冇得陪伴我左右，要齊齊出番去。



OK，今次整咗15隻，有D配件唔多啱整髮夾，整頭箍會啱D，所以有幾粒花仔淨番。今次以做花為主，因為李太最近迷上用絲帶整花，整完用嚟做髮夾幾得吓。


呢幾個係粉紅色花，以不同配件做花心。有粉紅色星星紐做花心: -

   

紅色花花紐做花心

  


粉紅色小玫瑰花做花心



另一組係玫瑰花，有細細粒單朵嘅粉紅色玫瑰花。



呢一個係兩朵淺紫色玫瑰花，影出嚟絲帶好似係淺藍色，但其實係較藍嘅淺紫色，我幾鍾意呢個組合。

第三個係用較闊嘅羅紋帶整嘅玫瑰花，因為較闊，所以朵花就大朵D高身D，我用波點橙色絲帶襯番朵花，呢個整出嚟好立體。

第四個係由深粉紅色絲帶摺出嚟嘅玫瑰花，呢個冇之前幾個咁立體，朵玫瑰花比較扁平，不過戴上頭又幾搶眼。

第五個係個花心立體嘅淺紫色玫瑰花，下次整我會整多幾層，就更似玫瑰花。

第三組都係花，但就用不同方法整，所以個樣都唔同。第一個係U gather方法加打結整嘅粉紅色花，細細朵啱小朋友。

第二個都係Gather方式整，但縫線時係有分開一塊塊花瓣，因為條絲帶較幼，花瓣唔夠明顯，但配色效果我都幾滿意，以後一定再整。

第三個係用Kanzashi花嘅做法整，我唔係太滿意個效果，整都唔易，我縫咗三次先得，因為D布太滑太疏易散，我要縫完加紐做花心，去到整髮夾時要落額外熱溶膠先整到，但個效果冇預期咁順，D布都幾靚，我仲有一大幅，一定再整。

第四個係以Z Gather做成，出來效果OK，下次會試用雙色。

第五個係連體花，即係兩朵由U Gather整成嘅花，但唔係分開兩朵整，而係用一條絲帶分兩邊整，兩朵花相連一齊，呢個好適合做髮夾，因為做出嚟係長方形。

另外有一個用三個蝴蝶結加一個繩結做成，望落係一隻蝴蝶，戴上頭唔會太大太細，D色都好襯黑頭髮，豬扒妹最鍾意呢個。

最後一個係用咗中國結做成嘅蜻蜓，黃色中國結繩戴上頭，夾埋黑頭髮真係好搶眼，豬扒妹今期至愛之一。

今批同上次果批都幾唔同，功夫多咗好多，D花或配件要一早整定，我花咗好幾個夜晚去試去整，而今次組件要花嘅時間都比上次耐，因為要隱藏D線步花去不少時間。整手工藝真係會上癮架，而家成日會諗下下一次整咩，點整？駛唔駛做定工夫？係咪有齊所有材料？