Monday, October 31, 2011

打救Blog layout, 靚多一點點

自從Y!Blog升級後,好多嘢都冇以前舊Blog咁方便,最大而又最多人嘈嘅就係字嘅大細,因為D字設定為13px,出到嚟D字太細,唔好話年紀大D嘅網友,就連我呢D中女都覺得睇得好辛苦,以為自己提早有老花,上網睇Blog寫Blog都係尋開心,搞到寫Blog睇Blog係一件苦事就無謂啦。雖然網友可以改字體大小,只要按Font Size將字嘅大小由Normal做Large,但點知Large係等於21px,咁又太大啦,而且一改大小呢,行與行之間嘅距離同字與字之間嘅距離又冇按比例自動調整,所以就算用咗大字體都係睇得好辛苦。

無意中喺網友Kazuo嘅Blog睇到,覺得好好用,所以問咗Kazuo之後,喺呢度分享個方法,希望大家網友用得著,可以整靚D個Blog。


Sunday, October 30, 2011

講講萬聖節之四:Treat派糖果

講到萬聖節當然唔少得trick or treat,treat就係指派糖果,呢樣小朋友就一定係最鍾意架啦,以前哥哥細個,我地係唔俾佢食糖果架,去trick or treat攞番嚟糖果都係益晒李生,李生多數都係拎番去公司派俾人食。我初初都估唔到一晚會可以拎到幾多糖果,第一年豬扒妹去trick or treat,亦都係李太第一年trick or treat,糖係多到滿晒成個bucket。李太以前細個喺香港都唔興Halloween,到大個咗Halloween都係去吓哈佬喂,柴娃娃一班人去玩吓食吓嘢開吓party咁。嚟到美國,Halloween係一個好玩嘅日子,如果正值平日,當日都會見到D人打扮晒去坐巴士返工,去銀行你會見到tellers同bankers都會略為打扮吓應節,李太公司唔會有人著costumes,因為我坐果層係executive floor,我地平日都要著得靚D返工,講嘢都要細聲D。


講番派糖,去到萬聖節前一個月,好多商店已經有糖果朱古力賣,之前一個星期,間間商店超市嘅本周特價品都係朱古力同糖。李太上年好好彩,攞到免費試食朱古力嚟派,當日根本派唔完,於是又係益咗李生同李太D同事。




近年好多人都關注健康,美國肥人勁多,連小朋友都有好多痴肥問題,學校有好多都ban咗唔駛帶糖返學,連果汁都唔俾,一來係唔想小朋友sugar-hype,二來如果倒瀉(呢個經常會)咗清理會煩過水好多。另外好多父母關心自己小朋友之餘,都會喺Halloween唔派糖果,我見過派文具、蛋糕、米通、玩具等,或者派比較健康嘅糖果,例如low-sugar糖果、organic或natural果種,又或者sugar成份低D嘅。我自己整仔女嘅goodies bags時都會買natural sugar嘅lollipops,係我地個牙醫介紹,因為好少糖但又甜甜地,要俾小朋友食糖都食種健康少少嘅。


今年李家或者唔派糖啦,因為嚟攞糖嘅小朋友都唔多,而且今年Halloween係星期一,唔想玩到太夜,第二日又要返工返學,所以帶豬扒妹同哥哥去附近trick or treat打個轉就算啦,唔知今年會攞到幾多糖呢?

Saturday, October 29, 2011

焗金菇兩味

2011年10月28日
以前去BBQ都會整呢樣,就係用錫紙包住D菜呀菇呀咁嚟燒,今次係因為上次煮嘢時買咗兩包金菇用唔晒,如果唔食就會壞架啦,所以快快手咁整咗兩味焗金菇,連洗都唔駛十五鐘。

牛油焗金菇






Wednesday, October 26, 2011

講講萬聖節之三:扮靚靚

萬聖節點都唔少得「扮嘢」,無論係扮到靚靚定係扮鬼扮怪,呢度好多人都非常認真,好多父母都好捨得花錢為小朋友打扮,我見過花幾百蚊買件公主裙俾個女著一次嘅,又有朋友肯年年花錢置裝嘅大人,冇錯,係大人,小朋友要年年買我理解,因為小朋友快大,第二年已經會唔啱身,但大人年年買新裝我自己就就唔會啦,我其實會傾向想自己整,不過而家真係好忙,有時間都會留返嚟教對仔女,同佢地玩多D。大人衫又好,小朋友衫又好,可以由好平去到好貴,當然太平嘅就冇可能要求質地好,始終都係一分錢一分貨,但好多時減價係會執到又貴又靚嘅,只要你唔介意未必係最Hit嘅,萬聖節之後好多賣呢類變粧用品嘅網站或公司都會減價,有D會係平過半價,甚至更低,只要唔介意要放成年先會用得著。



我上年年尾就係買咗一年魔法奇緣(Tangled)裏面果個長髮公主Rapunzel嘅裙俾豬扒妹,原價係$39.99,特價$9.99,我一見到即買,今年豬扒妹著仲係有大,或者去到出年佢會可以著到。



而哥哥呢件消防員衫又係好抵,質地非常好,只係賣晒黑色,只有呢個淺啡色,但喺Costco賣$23.99,唔知可以著多一年,因為哥哥返咗K後就高咗,有D褲已經吊腳,好多衫都覺得細要換過大D嘅,所以下年可以再著嘅機會係50/50。





另外,亦會有人將著過嘅二手Costumes放上網賣,有時都會係幾新淨嘅,不過我暫時都冇買過二手俾對仔女著,因為我都已經搵到幾平幾靚嘅,上網買二手有時嚟到唔鍾意又未必有得退,反而我有諗過去買D二手店睇吓,因為都真係會好平吓,例如救世軍、Thrifty Shop果D都好平,但我唔係幾頂得順有D會有種味,而且我成日會懷疑咩人著過,對仔女D皮膚咁鬼敏感,所以暫時我都未可以過到呢個心理關口。


我自己就暫時有兩套衫,一件係蜘蛛網Cape,係上年喺Walgreens有Coupon買嘅,好似係$9.XX。另外有一件紅色甲蟲衫係之前有個專賣Costumes網站大減價買嘅,應該係十幾蚊,質地OK靚架,只係李太身材唔靚,或者今年都會試吓著,帶對仔女去Trick or Treat。


而家衫準備好啦,仲有咩要做呢?

Tuesday, October 25, 2011

講講萬聖節之二:買南瓜Pumpkin Patch

Pumpkin Patch幾乎已經係美國家庭於萬聖節之前必有嘅活動,通常大人會帶小朋友去農場或南瓜園選購南瓜,有D Pumpkin Patch南瓜場其實只係一個空地佈置得好有萬聖節氣氛咁,放滿南瓜、Gourds、粟米等,有D會有小動物俾小朋友睇,好似火雞、白兔、山羊等。

之前一兩年我地有帶對仔女去Pumpkin Patch,因為當時間Preschool有活動,但果兩年因為落雨都成日改期,試過有年改咗兩次,我地特登請假同對仔女去,但就係因為改期,平白浪費咗兩三日假,後來又有Halloween Parade又要攞假,當然呢個係自願性質活動,家長可以唔參與,但如果可以,有家長參與,小朋友會開心D,我同李生都做過好多Chaperone,睇到有家長一齊嘅小朋友玩得開心好多,而且我地可以影吓相,日後可以留個紀念。

今年哥哥上幼稚園,學校只有Parade,唔會有Pumpkin Patch,豬扒妹嘅Preschool都唔會有,原來想跟朋友去一個Harvest Festival,點知今年又Miss咗,因為係喺十月頭,當我問朋友時原來已經完咗,咁就無謂長途沷涉去到咁遠,三藩市都有兩個南瓜場,之前都去過,但因為呢排好忙,加上病咗一個星期,而家都未好,李生又覺得好似幾貴,一個細南瓜幾蚊雞一個,所以遲遲都冇提去Pumpkin Patch。

冇耐之前見到Safeway有南瓜賣,仲有迷你版同巨型版,所以星期日就帶咗豬扒妹同哥哥去揀。

著好衫啦,影張相準備出發啦。




講講萬聖節之一:Trick or Treat



萬聖節Halloween係每年10月31日,美國呢度Halloween當日小朋友就會化粧去Trick or Treat問人攞糖果,大人就會開化粧派對,準備糖果守候家中去派糖俾到來Trick or Treat嘅小朋友。聽李生講,以前環境唔同而家,人心冇咁複雜,佢同其他朋友唔駛大人陪同去Trick or Treat都唔會有危險,而家唔得啦,尤其是近年經濟唔好,搶劫案、暴力犯罪都比以前多,真係唔可以就咁俾小朋友自己去陌生人家中Trick or Treat,我地都係去咗Trick or Treat兩三年,通常都係食完晚飯天黑前出動,8點就返屋企,因為豬扒妹同哥哥最遲9點就上床瞓,我地唔想佢地玩得太攰,第二朝起唔到身返學。


今年Halloween喺星期一,好多學校都會提早開Party或者Parade,呢幾年大商場喺萬聖節前同當日都會有好多活動,例如化粧遊行、Trick or Treat、遊戲、派Goodie Bags等等,未嘗唔係一個安全嘅選擇,家長可以唔駛擔心小朋友去陌生人屋企拍門,又唔駛去到好夜,擔心第日返學唔知醒。

我帶豬扒妹同哥哥去Trick or Treat,我唔會間間屋都去拍門,因為有個不成文規矩,如果有派糖嘅家庭,一定會有萬聖節裝飾,燈呀、蜘蛛網、女巫、Skeleton、Ghost等,唔會少得嘅係南瓜,有大個有細個,如果有放南瓜喺門口嘅就會有糖果派,如果唔見有放出嚟,可以唔駛去按門鐘啦,唔好睇少呢個發現,李生係土生土長都唔知呀,而且呢度大部份獨立屋都會有樓梯,吓吓要行十幾廿級上去按鐘,然後發現人家唔睬你,又要行番十幾廿級落嚟,如是者一晚係非常好嘅減肥運動,如果日日都係萬聖節,我估我一定可以好快變番做索女。

第110款:蝴蝶結之2 Bow Hairstyle 2

2011年10月22日


事隔一個半月,豬扒妹依然好掛住個Bow Bow蝴蝶結,今日佢又話要梳個Bow喺頭,而家佢頭髮長咗少少,所以我試另一個紥法,就係將所有頭髮梳成馬尾,再用條馬尾整個Bow出嚟。




Sunday, October 23, 2011

第109款:荷蘭辮旋轉側馬尾 Dutch Carousal Braid

2011年10月23日


我個寶貝豬扒妹萬聖節會扮魔髮奇緣中嘅Rapunzel,我諗嚟諗去都唔知幫佢紥邊款髮型適合,呢個其實最啱,但同豬扒妹試過,佢頭髮唔夠長唔夠多,梳唔出個型,所以我就自己示範,希望俾其他媽咪或姊妹睇吓,如果咁啱你地千金或你地會扮長髮公主的話,呢個可以派上用場。


香橙南瓜頭啫喱杯 Fruit juice jelly orange cups

呢個其實係我上BK睇到會員yymkris嘅Post而得到靈感,我只係借咗個概念,但冇睇到個食譜細節,後來想搵又搵唔到,所以索性就天馬行空,即管睇吓整出嚟會係點。





香蕉提子乾合桃蛋糕 Banana Raisin Bread with Walnuts

今日李生話我地有太多香蕉,要快D食,因為已經熟晒,再遲D食會爛架啦,咁多點食得晒喎,於是我就醒起好耐冇整過香蕉蛋糕,李生就話不如整香蕉曲奇,因為昨日整果D Sugar曲奇好食,佢想我試吓香蕉Chocolate Chips曲奇,但我唔想兩日都連續整曲奇,因為豬扒妹同哥哥都好鍾意食,昨日係咁不停食,我驚豬扒妹真係會變豬,昨日我係要收起唔俾佢食呀。OK,我於是拍版整香蕉提子乾合桃蛋糕,雖然呢個英文係Banana Raisin Bread with Walnuts,但其實係蛋糕嚟架。





Saturday, October 22, 2011

Friday, October 21, 2011

甘荀蛋糕 Carrot Cake




材料:
自發粉 1杯 
少少 
肉桂粉                    1茶匙 
黃糖 3/4杯 
雞蛋 2隻 
芥花籽油 1/2杯 
甘荀磨蓉 1杯 
椰絲 1/3杯 
合桃,切碎粒 1/3杯 
提子乾 1/3杯 

第108款:反轉結公主頭之2 Flip Knot half updo 2

2011年10月19日





菠菜兩食 - 前菜:香油菠菜; 主菜:菠菜炒雞冬菇絲

有棵菠菜喺屋企,諗吓點整先有新意,上星期喺餐館食過一碟炒菠菜好好食,
於是整咗兩個菠菜菜式,一個係前菜,一個係主菜。

前菜:香油菠菜





Wednesday, October 19, 2011

雜菜蘋果沙律

老公特別要求我整雜菜沙律,我就去雪櫃睇下有D咩可以用,搵到幾樣瓜菜,覺得有D齋,
於是加埋蘋果,整咗呢個,老公話超正。

材料:
生菜   1個
青瓜   1個
甘荀   1個
蘋果   2個(青或紅或金蘋果都冇問題)

調味:
橄欖油  2湯匙
鹽    少許
碎黑胡椒 少計
黑醋   1湯匙
莞茜   1小束(切碎)


Tuesday, October 18, 2011

蠔油素炒芋絲 Stir-fried Japanese Yam Noodle with Oyster Sauce

其實今次都唔算係全素,因為多手加咗少少煙火雞肉,
不過平常我係全素炒,個樣就真係素咗少少,唔多吸引,
但食過嘅都話好味,而最重要係健康。平常食芋絲都係打邊爐,
今次係當麵咁炒,彈牙得嚟又易食,昨晚煮完成家都唔夠食。
(昨晚全部五個大人,兩個細路,人人有份食)



Monday, October 17, 2011

涼拌青瓜皮梨絲

通常好多食青瓜都會刨去皮,其實係可以留番整呢個涼拌菜架。
刨皮時可以刨深少少,咁食嘅時候就會有D青瓜肉。

材料:
青瓜皮(連少少肉) 1條(刨皮後切絲)
梨肉(呢次用啤梨) 1小個(削皮切絲)

調味:
蒜頭 1瓣(切碎)

鹽  半茶匙
美極 1茶匙
麻油 1茶匙

做法:
1)青瓜皮刨好之後切成約手掌長細絲,先以鹽醃一醃。



2)啤梨去皮切成差不多大小之細絲。

3)倒去青瓜出的汁,加入蒜頭、麻油及美極拌勻。
4)加入梨絲拌勻,完成可食。



P.S. 
1) 如果喜歡冷食可以略雪凍。
2) 啤梨都會出水,食時倒出水食較好。
3) 除咗啤梨,可以用雪梨、沙梨都可以,選梨時要揀個冇咁淋嘅,會容易處理D。
4) 歡意食辣可以加入椒絲或辣油、沙茶醬等,但加之前記得試味,因為呢D調味通常都帶醎。 

Friday, October 14, 2011

第107款:簡單拼髮蛇辮之2

20111011

呢個係近期新作,簡單快趣又得意,因為豬扒妹成日都會玩到披頭散髮,太麻煩嘅甩咗老師唔知點幫佢紥番,所以都係整D簡單嘅,甩咗都唔太醜樣嘅就好。




我由少D頭果邊(左邊)開始,由頭前方抽一小束頭髮紥成一條小辮,跟住將耳後果D頭髮劃出加入之前條辮拼成一條新辮,之後就再加入後腦中間一大束頭髮,又束成一條辮,去到呢度應該只剩下右前方至耳後頭髮,我就將剩底嘅頭髮綁成一條辮仔於耳側,成個蛇辮就完成啦,成個過程只係紥4條辮,用4個橡皮筋,5分鐘都唔駛。



 

你睇到呢張相可能會問點解豬扒妹塊面會咁損晒,無他,兩兄妹打交,唔好以為哥哥蝦妹妹,其實好多時都係豬扒妹出手打哥哥先,哥哥痛唔抵得就還手,咁哥哥指甲長得快,成日都會抓損豬扒妹,不過你地唔好睇小呢個妹妹,佢好狼架,大巴掌打大腳伸,如果唔問清楚就怪哥哥就唔得架,次次我都會問清楚,然後兩個都要罰。希望兩個大咗唔會成日打交啦,其實佢地兩個好錫對方,唔見就會搵,有嘢食都會留對方一份架。聽過人講: "Brother and sister are the best friends and the best enemies",完全切合。

Thursday, October 13, 2011

基本髮辮編法10:四手辮之2 4-Strand Braid 2

前一篇講過四手辮有另一個編法,基本上第12個步驟都係一樣,不同嘅係加入第4束頭髮嘅次序。




1)將頭髮分成四等份:1234
  



2)以三手辮方式將123束頭髮鬢成一組三手辮,第1束頭髮由上面橫過第2束頭髮,再由第3束頭髮下面穿過。於是你會見到左邊一條三手辮,右邊就有一束單丁頭髮。

 



3)完成一組三手辮之後,第4束頭髮都加入讓第1束頭髮由上面橫過。




4)呢個就係同四手辮之1不同之處啦:依次序,以第2束頭髮開始織一次三手辮,而唔係第4束頭髮,第2束頭髮同之前第1束一樣,先由上面橫過隔離果一束頭髮,再由下面穿過再隔離果一束,完成呢個步驟時,係左兩束右兩束頭髮。





5)將第1束頭髮由第2束頭髮下面穿番過去左手邊,咁就完成第二組三手辮,第三組就由第3束頭髮開始,如此類推。



6)完成之後其實同四手辮之1

分別不大。

秘訣:

1)但呢一個做法較適合打橫編嘅四手辮,因為總係由一邊開始,條辮會容易傾向側埋一邊,如果係打橫織當然仲好啦,自然側向一邊,但如果係打直織,記得每編一組要拉番緊同就番個位。

2)呢種編法好處係唔駛記住幾時由上面橫過隔離果束,幾時要由下面穿過,出錯機會會少D

3)可以因應你自己習慣,由左織去右或者由右織去左都得,原理係一樣,個樣都係一樣。

4)可唔可以以法國辮或者荷蘭辮咁加頭髮?當然得啦,我做過實驗,都係先由三手辮開始,四手五手七手都係一樣,遲D我再Post法式多手辮上嚟俾大家睇吓。

基本髮辮編法9:四手辮之1 4-Strand Braid 1

而家講呢個係真真正正四手辮,唔係半法國辮,之前都一直誤會咗,後來睇到有人喺Youtube示範7手辮,無錯,係七手辮,原來知道個原理後,七手辮都係碎料,當然頭髮要夠長先有用,如果太短,根本鬢唔到幾組就冇頭髮再鬢落去,唔會睇到個Pattern架。

 


講番四手辮,同三手辮差不多,其實鬢嘅時候都係三手頭髮在手,第四手就變成第二組三手辮嘅第一手,或者文字上好似複雜咗D,但睇圖應該會容易明白。

Wednesday, October 12, 2011

第106款:懶人版瀑布辮之2 Simple Waterfall Braid 2

2011年8月21日






第105款:懶人版瀑布辮 Simple Waterfall Braid

2011年8月21日


正式瀑布髮辮我未喺呢度示範過,因為豬扒妹太active,我估喺學校唔夠幾個鐘就會散晒成隻顛雞仔咁,所以一直都冇話正式幫佢紥晒成個瀑布鬢辮,而家介紹呢個係懶人版,或者可以叫簡易版,因為唔駛鬢辮,時間會慳番唔少。






第104款:小甜心髮式之6 扭紋心印心 Sweatheart Style 6 - Twisted Heart

第104款:小甜心髮式之6-扭紋心印心


2011年8月19日



呢個同小甜心髮式之5-心印心只差少少,就係中間個小甜心係扭紋辮,梳嘅時候有個小小秘訣就係將束頭髮平分為兩束,每束都向同一個方向扭,再打交叉,交叉時要拉得實D,咁去到造型個小甜心時就冇咁易散。扭好之後就同另外兩條法國辮綁埋一齊就係啦,呢個係小甜心心印心嘅小小變化,唔難梳架。 





第103款:雙荷蘭辮凌亂髮髻Dutch braid messy bun

2011年8月20日(星期六)

第103款:雙荷蘭辮凌亂髮髻Dutch braid messy bun




荷蘭辮紥過好多次,呢一個係打側髮髻款,左右兩條荷蘭辮大小不一。首先將右邊前面頭髮以荷蘭辮方式鬢,由前面加入頭髮,一直鬢到耳邊再以三手辮鬢到尾。


左邊同樣以荷蘭辮開鬢,鬢嘅晚候由兩邊加入頭髮,同時條辮係打側鬢,一直鬢到右邊耳旁,將所有頭髮包括右邊嘅一條小荷蘭辮,以荷蘭辮方式束成一條三手辮,然後將髮尾向上卷起,以一條大橡皮筋於耳後束緊,成為一個小髮髻,之後挑出小部份頭髮成為一個凌亂髮髻,挑頭髮可以隨意多少,因為係以一條鬢辮做基礎,所以個髻唔會咁易散。呢個髮型可以係好causal,又可以加少少頭飾dress up去飲。





只供閱讀

終於都進入第二階段啦,全部現有Yahoo Blog都轉做只供閱讀,唔可以留言,唔可以寫新Post,要寫新嘅就要去新Blog先得,即係話唔轉就冇得再玩過去。未升級嘅而家可以選擇即時升級或者偏份,但一備份之後就唔可以升級去新Blog平台,即係話你選擇備份唔升級就係同Yahoo Blog講Bye Bye。

有不少人意興欄柵,唔想跟去新Blog,我唔知有幾多會另覓山頭再寫,有幾多會從此封筆。我自己最初都有諗住另覓居所,但喺未搵到一個令我覺得舒服嘅之前,姑且繼續寫住先,中間呢兩個月就好似過山車,有時Yahoo Blog生性會寫得積極D,但大部份時間都係發忟唔寫居多,因為加相成日加唔到,字體又大又細,Alignment成日要較,一篇Blog要編輯十幾廿次先出得街,寫得咁辛苦為咩?都係消閒記趣啫,所以有一排我係成個星期都唔寫一篇,因為實在花唔起用成個鐘頭去鬥一篇只有潦潦百幾二百字嘅文。好彩去到9月尾Yahoo Blog有所改善,踏入10月有新Features(其實有D係舊有嘅),而且某D問題已解決,當然仲有Bugs,不過已經令我唔再抗拒寫。雖然出面有其他Blogs比Yahoo好,例如Wordpress,但寫慣咗適應咗,其實Yahoo Blog都唔係太差,而且難保轉新之後唔會有變,所以暫時我都會繼續。

諗住唔再寫封筆嘅網友,備份前諗清楚,因為原來備份係唔包括留言,只會Blog你自己寫果Posts,如果你想保留留言,睇怕都係要升級至得啦。見到好多人去留言鬧Yahoo Blog,有D連粗口都出埋,講真駛唔駛呀?又唔係死人塌樓,又冇人搵鎗指住你,呢度係免費平台,你要玩就要跟呢度嘅規則,冇得輸打贏要架。

詳情可以去小編輯個Blog睇吓,祝大家平安升級,繼續開開心心寫Blog去。

Tuesday, October 11, 2011

Five Happiness Restaurant 五褔樓

2011年10月2日

今日原本想去食上海嘢,點知去到Sunset兜咗成20分鐘都搵唔到車位泊車,唯有去過第二度,有時喺美國,尤其是三藩市,泊車位緊過債,冇位泊車唯有去過第二度食,有好多朋友試過double park或者諗住都係一陣啫,差少少唔係咁大問題,但偏偏一張牛肉乾閒閒地US$五六十,夠一家大細食餐好嘅,而家個City窮到燶,搏唔過。於是我地一家四口就去咗李生個朋友嘅中式餐館食午飯。

入到去勁多人,因為佢地有做旅行團,好多時旺嘅會訂三四張枱,咁就要等位。今日都算好彩,四人枱唔駛等。

我唔知老闆係邊度人,菜大部份係台式,好好食,唔係因為我地識得個老闆先咁講,係真係好味,而且D料新鮮,但就比較濃味,我估有少少味精,不過我可以接受,只係要飲多D水;事緣我對味精有敏感,太多嘅話我會頭痛,而且會好似飲醉酒咁wing wing地,對仔女都唔係好受得味精,太多仔仔個咀會腫皮膚痕。

今日李太叫餸,我都覺得我有D過份,幾驚會俾李生鬧,4個人食8個菜會唔會過份D呀?不過唔係個個都大大碟,又唔係樣樣都貴,所以李生冇出聲,唔出聲我當佢OK啦。



第一個上碟係醃涼拌青瓜,巧巧味又唔係大大陣蒜味,青瓜去咗皮冇咁爽但唔係淋晒,絕對新鮮,連對仔女都肯食。影相時已經有人急不及待食咗三份一啦。



第二個係甜豆漿,我唔知係唔係自己整定買,不過就好滑,應該唔係開粉果隻,豬扒妹同小李生兩個已經幾乎掃晒一碗,好在唔係好甜味。



第三個係油炸鬼,呢樣係李生至愛,我地成日去搵邊度嘅油炸鬼好食又唔貴,五褔樓呢個夠脆口又鬆化,只係食到尾都係有D煙un,點都冇香港D粥粉麵舖咁好食,冇計啦,有時真係好想食都頂住癮先。如果有人知點整到好食嘅油炸鬼,勞煩你俾個recipe我啦,我想整俾李生食呀,佢好鬼為食架,成個細佬仔咁。今日對仔女太肚餓,油炸鬼一上枱就一人搶咗一條,豬扒妹肯俾番一半我,小李生就唔肯,攪到李生好無癮,最後我俾咗豬扒妹俾我果半條俾李生,不過就冇得影相啦。





第四款係飯團,即係栥飯,中間係油炸鬼、少少炸菜、肉鬆等,不過呢個未到水準,可以唔駛試啦,因為油炸鬼唔夠多唔夠脆,炸菜同肉鬆都太少,飯太多,個味唔平衡,雖然唔貴,但可以不試。




第五款蔥油餅,份量唔多但唔少,細細件都幾好食,比起之前Union City果間小沈陽都仲係遜色,沾個紅油抄手辣汁一流。



第六碟係紅油抄手,份量好多好大碗,D抄手都好大隻,辣油對我嚟講唔夠辣,略帶甜味,我會喜歡較為辛辣少少,李生就一般,佢話唔夠辣,哈唔,太辣我估佢食唔到喎。



第七個係麻辣牛肚,呢個餸係李生近排至愛,去到任何餐館酒樓就要睇吓有冇,呢個牛肚好有水準,牛肚厚薄恰到好處,而且夠軟但又夠爽,辣汁我略嫌味淡咗少少,我想要辛辣少少,有人個侍應一放低隻碟唔夠半分鐘就食咗三份一啦。  



最後一個係上海炒年糕,呢個係我地食過咁多個最夠味嘅,份量算唔錯,豬扒妹同李生始終鍾情上海年糕,五褔樓呢個整得好軟身但又唔痴牙,切得細細塊吸晒D汁,豬扒妹同小李生最乞人憎就係唔識肉,要我揀晒D肉絲出嚟,你逼佢食咩,佢地就扁晒咀要split out D渣,然後話辣辣或者too hard,激死我。呢日個上海年糕我同李生都係食咗幾啖,兩個小朋友係食完又食。



餐館老闆今日忙到不得了,老公想同佢傾幾句都唔得閒,點知佢無端端放低呢一碟話請我地食,呢碟係涼拌海藻結同豬耳絲,條條海藻打個結都咪話唔好心機,我麻麻地有陣海藻腥味,個醃汁我唔係好鍾意;個豬耳絲好爽脆,我比較喜歡,李生都like,不過佢嘅至愛都仲係牛肚絲,佢話D豬耳硬,太脆佢唔係咁好。



嘩,叫咗8個餸,我地食得七七八八,打包咗剩低嘅少少炒年糕同一塊蔥油餅加少少涼拌海帶同青瓜,個炒年糕同蔥油餅成為小李生第二日返學帶嘅午餐。講你都唔信,最後埋單係連稅US$45,加埋貼士50幾,仲有剩餸拎走。

呢度D中式餐館有樣嘢唔好,就係品質保持唔到,好一輪又差一排,通常係因為換廚師。五褔樓都有一輪麻麻地,而家就好有水準,所以就呢兩個星期都去過三次啦。



想去嘅話,五褔樓Five Happiness個地址係4142 Geary Blvd., San Francisco, CA 94118 (5th Avenue同6th Avenue中間,隔離係KFC),泊車都算OK,搭車仲方便,門口同對面街有#38同#38L巴士站,班次係數一數二多同密。

http://www.yelp.com/biz/five-happiness-san-francisco

P.S.中午時段會有點菜紙俾你揀餸,晚飯就有和菜同餐牌俾你點菜。