Sunday, April 29, 2012

Salsa 沙律船 Salsa Salad Boat

呢個係貪得意整成沙律船,個salsa salad我加咗菠蘿,一般墨西哥底甜味salsa會用芒果,不過我見屋企有菠蘿唔好浪費,而且芒果唔係幾啱造,唔一定甜,反而覺得少少酸味對我味D。



手撕雞菠菜沙律 Baby Spinach Salad with Baked Chicken

因為剛好有新鮮baby spinach,又有焗雞肉剩底,老公話想要菠菜沙律,於是又整咗沙律啦。



Thursday, April 26, 2012

我的志願是消防員 I want to be a fireman

早兩個星期日,YMCA有一個關於健康家庭的戶外活動,當中有不同單位的攤位,宣傳有關健康飲食習慣和家庭樂的重要性,當天節目理應8時開始,但當我們一家8時準時出現時,原來有關單位還沒有準備就緒,於是我們就到附近的一所運動用品店購物,因為李生需要一對特別的鞋墊,因利成便,為一對兒女買了新鞋,這些日子他們大得真快,不只是衫褲不合身,就連鞋子也換了一兩個呎碼,專挑那些減價貨,居然也找到不錯的選擇。





為小朋友做菜之9:菠蘿多蛋班戟 Pineapple Pancake

話說有次睇電視,有人用藍苺整班戟,而且落好多蛋,個食譜同一般班戟唔同,初初覺得幾得意,但望落真係唔知究竟會係咩味,心思思搵日試下。今次咁啱有菠蘿,想下整菠蘿味都好喎,出嚟有菠蘿嘅香鮮同酸甜味。



Monday, April 23, 2012

為小朋友做菜之8:簡易班戟 Simple Pancake

呢次整嘅班戟同上次鬆軟厚身煎班戟大同小異,所唔同係今次冇時間做分蛋法同打蛋白到發泡企身,而且今次主要都係親子活動,對於品質都係其次。


上次嘅鬆軟厚身煎班戟:

http://blog.yahoo.com/_HHPBQ7Z6ZTWGDUBKOMCXMHPPOU/articles/574994





材料:
麵粉   1-1/2杯
牛奶   1-1/4杯
蛋  1隻
泡打粉    3-1/2茶匙
鹽  1茶匙
糖  1湯匙
牛油    3湯匙(先熱溶)
雲呢嗱香油     半茶匙


做法:
1)麵粉加入泡打粉同鹽,一齊過篩,加入糖拌勻。
2)雞蛋打勻,拌入牛奶中,倒入雲呢嗱香油拌勻。
3)將2至3湯匙麵粉篩入蛋奶糊中拌至完全溶解冇粉粒。
4)餘下之麵粉,以匙羹撥開中間成為一個大孔,將蛋奶糊分幾次加入麵粉中,以木匙拌勻至完全混合冇粒粒。





5)最後倒入已熱溶之牛油拌勻,靜置15分鐘。
6)平底鑊下少許牛油,倒入4湯匙蛋奶糊,煎至一面變成金黃色,再反轉另一面煎熟。














小貼士:
1)今次冇用分蛋法,班戟質感冇咁鬆,但依然柔軟。
2)要見到起好多泡至反轉面,咁樣會煎得個色夠靚,又唔會黏鑊。


後記:
都話呢次係親子活動,所以好多工序都係兩個小朋友做嘅,哥哥篩粉比豬扒妹叻,而妹妹就要霸番一部份攪拌粉漿果,媽咪要好公平咁人人都有相同機會幫手,呢D親子活動到佢地大個就會成為媽咪美好嘅回憶。










就係呢個班戟煎出嚟都鬆軟,我就加咗砂糖、椰絲、芝麻、花生碎,當成港式夾餅咁食,居然個班戟咁俾我折兩折都冇斷開,確實係好軟身。








Saturday, April 21, 2012

三色沙律 Mixed Color Salad

其實唔只三樣料,不過生菜舖底表面睇唔到,自從李生減磅計劃成功幫佢減咗11磅之後,佢又開始放縱,我問佢磅數有冇反彈,佢𠵱𠵱哦哦話冇上過磅唔知,鬼信佢咩,中間去過咁多次醫生度覆診,次次都會磅重量血壓呢D例牌嘢,又點會話冇上磅唔知自己有冇重返,我估係佢唔敢講就真。今日因為有菠蘿喺屋企,李生對之前李生加咗菠蘿嘅沙律念念不忘,叫李太整個有菠蘿嘅沙律,我就打開雪櫃睇下有咩可以配搭啦。




Friday, April 20, 2012

中式肉丸炆雜菜 Chinese meatballs mixed vegetable stew

其實呢個我叫山寨版獅子頭,點解會有呢個菜?又係拜李生所賜,因為食過某至愛餐館嘅獅子頭,搞到李生念念不忘,而呢一個係李太打天才波下嘅創作,所以唔可以同真正嘅獅子頭比較,勉為其難叫做山寨版獅子頭,出嚟效果係湯汁同雜菜好正,但個獅子頭(肉丸)70分,因為唔夠肉汁同鬆化。不過呢個只係第一次整,既然李生鍾意食獅子頭,李太一定會整到滿意為止,照顧好家人嘅胃係一個小女人主婦嘅成就。



中式雞沙律 Chinese Chicken Salad


唔好以為沙律係西式嘢,其實中菜都有沙律,或者呢D係為咗迎合老外嘅口味,不過在中菜館不難找到Chinese salad,即係雞沙律,不過呢次我整呢個係家庭版本,冇咁多煎炸工夫,只因為李生鍾意食出面中餐館嘅中式雞沙律,所以做太太嘅就嘗試去將外賣菜式在家中還原,像真度90%以上。



Wednesday, April 18, 2012

第130款:華麗的三手辮

有時冇時間,又想快但有變化,好自然就係梳三手辮,不過當日日都係三手辮又開始有D悶啦,點樣可以令三手辮有變化呢?呢個我叫做華麗的三手辮,因為出嚟嘅結果比普通三手辮花俏好多,但又唔係要做多好多工夫,又唔駛再用好難嘅技巧。呢次係用於普通三手孖辮上,如果用於梳髮髻,將會成為好有貴氣嘅髮式。



第129款:四手辮4-Strand Braid

呢個係將之前畫嘅四手辮圖解付之實行,其實好耐之前都示範過四手辮,但因為果陣豬扒妹唔多好孖辮,D頭髮又較短,所以紥嘅只係將頭兩邊前部份頭髮梳成買手辮,今次就係四手辮孖辮。梳法可以參考基本髮型技巧之四手辮,結連可以Click下面連結或此處

http://rosemaglive.blogspot.com/2011/10/102-4-strand-braid_13.html


Monday, April 16, 2012

隨心影之4:櫻花之外

一連兩次都貼櫻花相,春天當然不只櫻花樹,加州出名陽光好,春天繁花似錦,處處春意央然,五顏六色的大小花兒讓人看得賞心悅目。

  教堂外的紫紅鬱金香


 
白色的馬蹄蘭花















  
黃色的野生雙托洋水仙



 
這可是比人還高的~















 

紅白雙色的野菊花

 

還有黃白色的~



 

這是十分有可塑性的小紫花









  

原來蒲公英也不太難找~





  

小巧的黃百合





不要以為已是夜深,這是下午約5時多,月亮已經出來了~



 

換個角度,氣氛完全不同了~

 

這又是另一種味道。



一大片的小雛菊。





 














 

人家門前的一株像是梅花











 

不知是大紅花還是芍藥~