Friday, September 30, 2011

第101款:簡易拼髮蛇辮

第101款:簡易拼髮蛇辮



呢個係懶人版蛇辮,即係唔駛法國辮、三手辮,因為直情係唔駛鬢辮,只要大量橡皮筋,好似李太買嘅顏色橡皮筋就最好啦,因為將要用上十個八個,如果係五顏六色會靚好多,又或者你鍾意襯晒同一個色都得。




我由左邊開始,因為呢邊頭髮較少,喺前面抽出一束頭髮,以橡皮筋束好一條,之後沿住個頭頂加入頭髮,再拼束成一條條辮,每加入一束就束一次橡皮筋,去到個頭頂四分三時,條辮向下方,因為一來頭髮多咗(條辮太高唔靚又重),二來想條辮似條蛇,梳一個好似S型就比較似,所以去到個頭四分三處,我就將條辮向下梳。




呢個好易又好靚,你睇豬扒妹懶係嬌俏咁,所以話青春無敵呢。

P.S. Yahoo Blog 日日都係咁,已經預先加咗相入相薄,去到寫完字再add相,次次都唔得,要save完再edit,每次只加到一張相。呢個得三張相嘅post,我edit咗5次,第1次加唔到相,第2次加到一張相,要改番D行位,因為間隔太密,第3次加第二張相,第4次加唔到相,D字位又錯要再改,第5次加第三張相。你話係咪C得,我冇咁得閒坐喺度成大半個鐘寫一篇咁少嘅B,加果三張相。而家積埋積埋有一大堆相未寫到B,次次咁花時間真係好趕客,Yahoo Blog,如果你唔歡迎我就出聲啦,等我襯早搵過主好人家,而家唔湯唔水,整好少少又有新問題,舊嘅問題又仲存在,真係龜步upgrade。


Thursday, September 29, 2011

緣起緣滅總有定數

人生有遺憾才會學懂珍惜,唯一永恆是變幻,
種種緣種種情到最後都會灰飛煙滅,人無永生,情無常在,
所以擁有時就要去珍惜,變了走了就只好放手,凡事有捨才有得,
不放手又怎有手去再拾起新的?

今日上某forum,見到有人寫話同朋友有爭執,感慨生命裡有很多過客。我有感而發,留咗以上一段俾出post嘅人。其實緣起緣滅總有定數,即使係親人都唔可以陪伴自己一世,人出生下來就係註定狐獨一人,有人好彩可以有一個又接一個過客在身邊,唔好彩嘅就出生即成孤兒。親人好,朋友也好,都是生命中一個一個過客,有人逗留久一點,日子開心一點,有人只一見即分,又或者有長久但痛苦的邂逅。來有定去有時,緣盡唔放手都唔得,生死有命,變幻永恆,呢個就係人生。

所以有緣共聚就要好好珍惜,明日天涯或者從逢無期。人生無常,活在當下最重要。



P.S. 老友唔駛驚,我冇事,只係今日少少感性啫。今年見到幾個朋友嘅cases,真有點唏噓,有英年早逝,留下稚子;有廿幾年夫妻,驚聞男方不忠;有身抱頑疾,但積極面對... ...其實大家都在數日子,但有人就覺得杯水係半滿,有人覺得係半空。


豬扒妹幫手摺衫




話說又係某個星期六,李生帶咗哥哥去游水,豬扒妹同李太喺屋企,豬扒妹扭計,唔記得佢係想出街定去婆婆屋企定係想整D咩,李太因為仲有嘢做唔去得住(其中一樣係有一大堆衫要摺),就隨口叫豬扒妹去幫手摺衫,話摺好晒D衫我地先可以出去。其實我都只係講吓,根本唔期望豬扒妹真係會識摺衫,一個4歲小妹妹,識自己著衫、自己食飯、自己上廁所...... 仲想點?可能李太相比好多港媽,真係要求低。


Wednesday, September 28, 2011

再整髮夾

今次因為扭親右腳眼,所以無聊有三日在家,雖然都有出去睇醫生,但都係唔知點解無聊無聊又一日,呢兩日的起心肝整咗D花仔準備要整髮夾俾個女,而家俾住大家睇吓D配件先,整好再post上嚟。








第100款:法國辮變化蛇辮

第100款:法國辮變化蛇辮

終於決定咗第100款介紹呢一個唔太難,但又幾特別嘅變化蛇辮,主要係由之前介紹嘅三手辮變化蛇辮演變出嚟。



首先由左右額前到耳後分出兩份頭髮,先鬢右邊,鬢成一條半法國辮。

去到鬢左邊,鬢到加晒前面頭髮,之後鬢三手辮時,由右邊頭頂上加入小束頭髮,加嘅時候要度吓個位,唔好將條辮鬢得太高或太低,因為之後要綁埋右邊條法國辮成為一束,大約加三至四次,就可以以橡皮筋將左右兩條鬢辮綁成一條。



Monday, September 19, 2011

三個月99款

唔覺唔覺個Blog開張第三個月,有99款大小髮型貼咗上呢度,

第100款想有個特別意思,唔知貼咩款好呢?

有冇人有提議呀?

第99款:法國辮交叉孖辮

2011年8月14日

如果你會梳法國辮,呢個應該唔會難到你,只係少少變化就做出一個新款。


第98款:簡單扭紋公主頭

2011年8月14日


超容易嘅一個髮型,唔駛鬢辮唔駛花時間,只要兩三隻髮夾。




Sunday, September 18, 2011

三手辮變化款蛇辮Encore再Encore

三手辮變化款蛇辮Encore再Encore

2011年8月11日

呢次整真係應個名:蛇辮。。。
你睇吓,真係好似條蛇咁S型架,李太就係咁架啦,點到要做到,我唔信得做唔到,工多藝熟啫,係咪?







Saturday, September 17, 2011

砵仔糕

砵仔




呢個係上個星期心血來潮整嘅,搵到個食譜好耐,但一直都冇話去買晒材料開工。

呢度都有砵仔糕賣,但始終都好似唔係好啱味,一係就唔夠紅豆,所以成日都想自己整吓,睇吓可唔可以整到以前細個果時果種味。

話說因為星期六李生帶咗哥哥去游水,只有豬扒妹同我喺屋企,豬扒妹聽到媽咪話整嘢食,叫佢幫手好開心,不過佢唔同哥哥,全程睇多過要玩,所以李太好快可以搞掂。

呢個係整好咗個樣,我嫌甜咗D,可能因為個食譜係台灣人寫嘅,所以口味比較甜,下次整我會搞搞個食譜,減番D糖先。食譜稍後再補,而家眼瞓要去眠一眠先。

第97款:反轉結公主頭(1級難度)5-10分鐘

第97款:反轉結公主頭(1級難度)5-10分鐘

2011年8月31日

李太開始有D精神分裂啦,一陣仲寫緊8月頭嘅款,一陣又去到9月,而家又返去8月尾,算啦,我有D款易整嘅好想快D介紹俾大家,另一D比較複雜嘅,要寫都要花D時間,所以又再跳返轉頭。



呢個髮型係屬於易紥嘅,如果你有Topsy Tail會易整D快D,冇嘅都冇問題,用幾隻手指都好易,只係Topsy Tail整出嚟會實D仔細D,我用呢套有兩個,一個大一個細,我同豬扒妹紥多數用細果個。

講番點紥,首先將兩邊頭頂頭髮劃分成六份,每邊由前到後各分三份。每一份以橡皮筋束成一條小辮,然後每一條小辮用Topsy Tail或手指由外向內將頭髮反入,形成一個反轉結(Flip around knot)。將六條小辮都做相同處理,既簡單又可愛,就算大人紥都OK架。





最近李太堂妹結婚去飲果晚日,豬扒妹都係紥咗類似嘅髮型,不過唔係六條辮係四條,然後加上裝飾小花,同李太個髮型裝飾同一款,當晚見到嘅親戚都讚靚,稍後我會寫好post上嚟。

P.S. 唔知點解,每次叫豬扒妹行去度白色牆邊方便影相,佢都會舉高對手par落去,好似人地警察搜身咁,俾佢激C。

Friday, September 16, 2011

第96款:蝴蝶結加荷蘭辮(2級難度)10-15分鐘

第96款:蝴蝶結加荷蘭辮(2級難度)10-15分鐘



2011年9月3日



絲帶綁成嘅蝴蝶結英文係叫Bow,豬扒妹係典型嘅貪靚女仔,佢鍾意D嘢都好女仔,其中一樣係蝴蝶結。呢日係星期六,又係同往日一樣,爸爸帶咗哥哥去游水,李太就同豬扒妹去街,去街前當然要紥個靚靚頭啦。





我問豬扒妹想紥個咩頭,豬扒妹話要一個Bow喺個頭,吓?又玩媽咪?我即刻諗起Lady GaGa,我個表情係咁嘅    


好啦,睇吓可以點整先......之前都上網睇過有人整similar,不過自己整都係第一次,而且豬扒妹頭髮又軟又散,冇Volume冇力,幾難搞吓。不過,世事冇絕對,即管試吓啦。






首先係將右邊前面側面頭髮梳起束成一條辮,要紥得緊D挺D,呢個就係蝴蝶結嘅兩邊。將束頭髮分成兩份,分別用橡皮筋束成半個蝴蝶結(即係蝴蝶結嘅一邊wing),方法係用橡皮筋束成一條,去到最後一圈唔好拉晒所有頭髮出嚟,而係只拉最多一半,形成一個髮圈,就係蝴蝶結嘅一邊,兩個各自半邊蝴蝶結打交叉,做成左右各一個髮型圈,可以再用橡皮筋綁埋一齊,蝴蝶結已經成型,但位置未係好穩,而且唔靚。

我將其餘頭髮由左邊鬢邊開始以荷蘭辮編法,每織一組就由下面加頭髮,織成一條辮,當加晒所有頭髮就以三手辮編到尾。之後就係到裝飾之前果個蝴蝶結,將條荷蘭辮繞過個蝴蝶結嘅中間,再繞過蝴蝶結底部,將D橡皮筋完全遮蓋,用一個髮夾固定,並且順便做埋裝飾,我用呢個咁啱又係一個蝴蝶結髮夾,所以係大Bow加細Bow。











呢個蝴蝶結髮型唔係複雜,但因為豬扒妹頭髮軟而冇力,比較難梳出個型,要靠條荷蘭辮幫手固定位置。

呢日我帶咗豬扒妹去圖書館,中途有個公園,佢要入去玩,又sir滑梯,又打韆鞦,又爬上爬落,個髮型都有少少散,但叫做成幾個鐘個蝴蝶結都冇甩,算係咁啦。


Thursday, September 15, 2011

三手辮變化款蛇辮Encore

三手辮變化款蛇辮Encore

2011年8月10日

呢款髮型得意係冇一定規則去紥,左右可以唔同位置加頭髮,另外就係可以加多加少,適隨尊便,今次呢個同上次整嘅有幾多相似之處呢?



Wednesday, September 14, 2011

第95款:簡易公主頭髮髻(1級難度)5分鐘

第95款:簡易公主頭髮髻(1級難度)5分鐘

2011年8月10日

呢個係只要唔駛一分鐘嘅髮型,非常易梳,要嘅道具只要一個毛毛橡皮圈。




首先挑出前面至耳邊嘅頭髮,梳去腦後成為公主頭,以毛毛橡皮圈束緊,但去到最後一圈時唔好全部頭髮拉出成為半馬尾,而係只拉出一半,成為一個髮圈,髮尾就盤住個髮圈再攝入個毛毛橡皮圈裏面,等個毛毛橡皮圈固定,如果怕唔夠穩就加一兩個髮夾就可以啦。呢個髮型可以去出席酒會,又可以襯牛仔褲都得。




Tuesday, September 13, 2011

第94款:簡單拼髮辮之4(1級難度)5分鐘

第94款:簡單拼髮辮之4(1級難度)5分鐘

2011年8月23日

有時豬扒妹賴床,我得番好少時間同佢紥辮,所以都會諗一D好簡單又特別嘅髮型,呢一個嘅encore頻率都幾高吓。



首先頭髮分左右兩邊,再將頭頂去到耳後面嘅頭髮,由前面開始分成三份(因為豬扒妹分右邊界,右邊多D頭髮,所以就分咗四份頭髮去束),先以橡皮筋束起最前面一份頭髮,再加入第二份頭髮束成新一條辮,最後加入第三份頭髮再束成一條辮,左右各束三次,呢個髮型好處係唔會有頭髮拮眼,而且如果頭髮唔長都紥到,因為係一份一份加。紥起上嚟唔複雜但幾斯文。






第93款:雙半法國辮拼法國辮髮辮(2級難度)10-15分鐘

第93款:雙半法國辮拼法國辮髮辮(2級難度)10-15分鐘

2011年7月8日

呢個都係好耐之前梳嘅,影完相唔記得寫好貼上嚟。

呢個係第92款嘅變款,唔將條鬢辮攝晒入法國辮後,而係幾條鬢辮反摺去後面,然後用橡皮筋束成一條簡單髮辮,或者你可以叫髮圈都得;呢款冇第92款望落咁成熟。



第92款:雙半法國辮拼法國辮髮髻(2級難度)10-15分鐘

第92款:雙半法國辮拼法國辮髮髻(2級難度)10-15分鐘

2011年7月8日

呢個都係好耐之前梳嘅,影完相唔記得寫好貼上嚟。



首先挑出左右兩邊由頭頂至耳上嘅頭髮,分別梳成兩條半法國辮,只由頭嘅前方加頭髮,鬢到大約耳後就以橡皮筋束好。再將兩條辮做基礎,合拼兩條法國辮,分成三份,開始由上至下鬢一條法國辮,今次左右兩邊都加入頭髮,一直鬢到所有頭髮都加晒入條辮後,續以三手鬢成一條辮。


之後將條三手鬢辮向裏面反摺,攝入法國辮同頭中間嘅位置,法國辮嘅特色係條辮同頭皮有中空位,所以係可以收藏條鬢辮尾入去,攝入去之後再以髮夾固定位置。





Sunday, September 11, 2011

第91款:打斜法國辮之3(2級難度)10-15分鐘

第91款:打斜法國辮之3(2級難度)10-15分鐘

2011年7月7日



呢個打斜法國辮我整咗另一個收尾方式,我自己覺得得意D,可愛D後生番D。

首先當然係要梳一條打斜法國辮啦,又係要鬢到尾,之後就將辮尾反向後,於耳後方束成一條小辮圈,既方便又不會過份成熟。你又覺得點呢?你鍾意呢個定之前個up do呢?

Saturday, September 10, 2011

第90款:打斜法國辮之2(2級難度)10-15分鐘

90款:打斜法國辮之22級難度)10-15分鐘



 



201177



 



首先好似之前梳一條打斜織法國辮,由頂織到尾,因為係法國辮,所以辮嘅底下係中空嘅,除咗可以就咁由得條法國辮垂落嚟之外,我地可以有其他變化。呢次介紹嘅就係利用法國辮底下中空嘅特點而梳嘅。



當完成法國辮之後,將條辮嘅尾部反攝入辮底下,再用兩三隻髮夾固定,夏天呢個髮型就最爽啦,你話係唔係?





第89款:三手辮變化款蛇辮(2級難度)10分鐘

第89款:三手辮變化款蛇辮(2級難度)10分鐘

2011年8月7日

呢個都係一個月前嘅「作品」,係好簡單嘅三手辮,但唔係一般一板一眼嘅紥法,亦都唔駛記住點整,每次紥都可以睇心情決定紥幾多、紥幾長、紥向左或右......

首先挑出前面一束頭髮,以普通三手辮紥法編結幾組,之後就隨機由左或右,以織法式辮咁加入頭髮,織入三手辮中,唔駛一定要平均,或者好規律咁隔幾多組三手辮再加頭髮,你可以織完兩組由右邊加一束頭髮,再織三組先再由左邊加,又或者你可以由右邊加兩次先由左邊加一次,點紥取決於你想條辮織幾粗幾長,同埋你想個效果係點。呢個係公主頭,唔好成個頭嘅頭髮都加入,只要將兩鬢頭髮都束起就夠。另外,呢個髮型都唔駛要一定紥到好緊,你可以紥得略鬆,有點隨意慵懶嘅味道。

   



點解叫蛇辮?因為條辮唔駛梳得有板有眼,唔駛筆直一條,梳嘅時候甚至可以梳到成個S型咁,就彷如一條蛇咁,係咪好得意呢?


第88款:荷蘭式孖辮三款紥法(2級難度)10-15分鐘

第88款:荷蘭式孖辮三款紥法


2011年8月5日


呢三款係一個月前試紥嘅,係以兩條荷蘭辮為本,做出三個唔同收尾方法。


首先將頭髮分為左右兩份,以荷蘭辮方式紥成兩條孖辮。紥嘅時候兩條辮都順向一邊,我先紥右邊一條,由頭頂開始鬢到尾,紥時最好先以橡皮筋略束左邊頭髮之後再紥右邊,咁就唔會混亂,我整呢個頭髮時就冇咁做,所以你可以睇到有一部份分得唔夠靚。





Thursday, September 8, 2011

Genki Ramen 元氣拉麵館


2011年9月1日

我同李生因為去參加哥哥學校嘅Back to School Night,婆婆話唔想我地帶佢去,因為係由5:30pm到7:30pm,即係佢由朝早8點幾返學直到7:30pm,佢會好攰,加上豬扒妹同哥哥9點前就上床瞓,要去到7:30pm至走再去食吓嘢,辛苦咗個小朋友,而且哥哥攰嘅話會好扭計,社工講平靜有規律同唔太緊嘅routines會適合佢。於是呢一晚,李生同李太係奉旨去拍吓拖撐吓檯腳。



個Back to School Night去到7:00pm就完,中間我食咗半塊pizza(係學校家長會義賣,$2一塊),李生食咗兩塊半(佢肚餓食咗我半塊),雖然步出學校唔係太餓,但如果唔食少少嘢,我遲D一定會好餓,到時咁晏食嘢我又唔想。



因為時間唔係早,我地唔想去太遠,但學校附近泊車位難求,兜咗接近15分鐘,最後喺Geary街附近搵到個位,於是就去就近一間日本麵餐館食日本拉麵算啦。







呢間餐館我地都耐不時會去,因為D啦麵幾好食。李生話唔係太肚餓(鬼咩,你食咗兩塊半pizza喎),食住個送嘅醃漬酸菜先,好味但太少啦。








叫咗李生好鍾意食嘅Wakame沙律,即係seasoned seaweed,講真係好食,但一食就知有好多調味料加咗入去,而且唔係好大碟就$3.75唔係好抵,不過唔係成日食OK啦。










再嚟一個chicken karaage,係李生鍾意架,我自己就麻麻地,因為炸得幾乾,我怕熱氣,呢碟$4.5。






我就叫咗碗叉燒拉麵,叉燒算好味,有四五塊,我鍾意麵多D,夠爽有彈性,配料其實唔係好多,有少少粟米、筍、半個鹵蛋、蔥花、紅薑絲咁啦,已經係$8.95一碗,lunch食抵D,一樣大碗收$7.95。







平日我地多數係中午去食,因為有套餐,個拉麵加$1可以有chicken karaage,或一個細碗炒飯,或者兩隻日式鮫子,豬扒妹、哥哥加埋李太叫兩個麵餐飽晒仲有leftover。


今晚呢餐連貼士承惠$22,唔係貴不過就唔係抵嘅推介,如果喺附近想食日式拉麵,呢度不失為一個好選擇,一般唔會太多人,環境乾淨有電視播球賽,李太唔識美式足球同棒球,有得睇冇得睇都無所謂。



步出餐館未夠8點半,李生李太好趕去接番豬扒妹同哥哥,返到屋企即刻同佢地擦牙洗面,踢佢地上床瞓覺覺豬,咁又一日啦。

Genki Ramen 地址: 3944 Geary Boulevard, San Francisco (cross street 4th Avenue)

Website with menu

Monday-Thursday: 11:30am - 11:00pm, Friday: 11:30am - 1:00am,
Saturday: 11:00am - 1:00am, Sunday: 11:00am - 11:00pm