Monday, February 27, 2012

為小朋友做菜之2:脆皮麻油迷迭香雞脾 Crispy Chicken Leg Baked with Rosemary & Sesame OIl

因為見到超市雞下脾大減價,呢pack 4隻雞脾由原價$6.95減到$3.07,買咗1pack煮俾李生同哥哥做午餐盒嘅主菜,唔好話小朋友,李生咁大個人都鍾意香口嘢,炸雞脾炸雞槌係佢至愛,但不竟出面買炸雞用萬年油唔健康,自己喺屋企整我又唔想起成大鑊油去炸嘢,所以又係依靠我地個老爺焗爐,唔好睇少焗爐,都可以做出脆皮雞脾架,而且肉質仲好嫩滑。




為小朋友做菜之1:雞蛋紫菜肉卷 Seaweed Meat Roll wrapped with Egg

先前有BK姊妹同網友都不約而同叫我介紹啱小朋友食嘅菜,我由哥哥出世開始就研究一下有關食物成份同營養嘅資料,加上哥哥同豬扒妹都有濕疹,食嘢方面都要多點留意。佢地兩兄妹雖然都為食,有時食量比李太更多,但唔知點解李太會成為肥師奶,但佢兩兄妹可以咁fit(其實我都擔心豬扒妹會變肥妹,佢而家果兩個節瓜豬脾同P都唔講得少),但兩兄妹都有一般小朋友嘅偏食問題,不同嘅係佢地係草食生物,唔鍾意食肉,要佢地食肉要同佢玩鬥智玩威逼。

以前有個社工同我講唔好逼小朋友食嘢,唔好太限制佢地食咩嘢唔食咩嘢,因為可能會引致佢地大咗之後有eating disorders,我覺得佢又不無道理,小朋友未返學前由自己湊,當然可以限制佢地食D咩,但只要一返學,有時都未必可以控制,好似哥哥而家日日帶午餐,有時放學返嚟一睇個午餐盒,好似未食過咁,問佢點解唔食,有時係凍咗唔好食,有時係太乾,有時站太多,但更多時係因為掛住玩,呢樣真係有計,唯有係以不同方法、不同煮法、不同食材去引佢食多D,又包多幾樣side snacks,例如生果、紅蘿蔔條、西芹條等,希望唔食晒正餐都有其他嘢頂肚。

話說呢個雞蛋紫菜卷我都幾鍾意整,以前喺香港我會用魚肉,但美國呢度買到嘅魚肉係好削,只可以叫做魚漿,好難會撻到有膠,口味亦唔夠鮮,所以我通常用豬肉、雞肉或蝦肉,各有好味。




Sunday, February 26, 2012

隨心影

這天有書和影碟到期要到圖書館還,一般兩兄妹都會爭和我上街,不過這天有點特別,兩個都說要留在家中,我雖然有點失望,但也落得偷得浮生「一個小時」閒,看到這天天氣晴朗,心血來潮抓了相機出門,看到可愛的花草樹木、藍天白雲等都影得不亦樂乎。

路上石塊夾縫間開的三色梗。



這是地上的石板,成了版面的新背景。



藍天白雲令人心境開朗,但不要被這個騙到,其實這天寒風刺骨,不但大風吹得頭髮吱吱聲,氣溫也很低,今天上街我特地披上羽茸外套。



等了兩三個星期,這株花終於盛放,應該是叫木蘭花吧。









同一家人種的玫瑰花,這個白裏透粉紅的顏色有少女的嬌羞味道,可惜風太大,聚焦很難。





這是非常普通的綠葉,特別在它襯托在白色牆上,構圖很有乾淨。



家附近一間小學門外的兔耳朵花,我從前都種過幾株粉紅色的。





人家牆上的一叢紫色類似薰衣草的野花,這個角度頗為吸睛,簡單的構圖劃破寧靜,既有生氣又靜態。



圖書館外的黃色小花,一時想不到名稱,有點像小百合,襯上綠色的葉子,黃色的花很突出。









進圖書館前看到這兩株棕櫚樹和藍天相和的景像,不得不以多個角度拍幾張。







回程時到附近的超市買菜買肉,以準備之後幾天的午餐盒,李太的壞習慣就是看到新鮮就會想不同菜式,那個弄給哥哥,這一個李生會喜歡,之後就當然辛苦自己,因為想運動沒有駕車,買個十磅八磅三大袋的肉和菜真是自作孽。。。

回程路上看到的野花叢,因為喜歡紫色又鍾情薰衣草,看到這個類似的都謀殺了不少菲林(幸好這是一部數碼相機,不然真是「敗家精」。





不知名的樹上開的不知是花是果。







樹腳上生的貌似椰菜花或卷心菜的綠色植物。





人家牆上的藤蔓,長滿白色小花,就像是一串串小鈴子一樣。



同一家人牆外一株樹上長了很多比牽牛花大少許的紫色花。





雖然櫻花花期短不易捕捉最美的一刻,但這一兩株都不賴,只是偏光問題,拍不出鮮艷的色彩,品種也不是重辮的,而且這櫻花都接近花落時候,少了艷光,只是嘗下心願,湊巧見到就拍幾張吧。



Wednesday, February 22, 2012

糖醋肉排 Sweet Sour Ribs

李生出街食過一個糖醋骨好好味,佢而家念念不忘,知夫者莫若妻,李太買咗一塊腩排,係連皮果隻,較為肥咗少少,下次要買排骨瘦D至得。因為李生提出整辣味,所以呢個版本係有加辣椒嘅。



超甜雜菜湯 Mixed Vegetables Soup with a touch of beef

李生而家會帶菜湯做午餐,所以李太就苦心鑽研不同嘅菜湯。今次有少少出術,因為有加咗少少牛肉,係將部份用嚟做肉餅嘅免治牛肉扣起,加入菜湯裏面,為求個湯有D鮮味。



美式肉餅 Meatloaf

今次整咗美式肉餅,呢種叫Meatloaf,係用焗爐焗嘅,同中式肉餅大同小異,有人會用呢個肉餅做三文治。我整呢個係我自己嘅版本,放咗好多蔬菜,唔係因為要仔仔食蔬菜,相反係要佢食肉,我對仔女之前都講過,係草食生物,唔鍾意食肉,但就食大量蔬菜瓜果,佢地唯一喜好嘅肉係魚,雞都會食,至愛係雞翼,雞脾一時時,整得鞋少少嘅雞會吐渣,瘦肉太瘦唔食,太肥咬唔開又唔食,真係想打巴佢地(細聲D,呢邊打仔係會俾人拉架)。不過,哥哥同豬扒妹都鍾意食肉丸,魚蛋直情係恩物,所以今次整咗兩個版本,不個係氹小朋友嘅心型星型肉餅(丸),另一個係正常meatloaf,俾李生帶飯,如果我俾D心型星型李生拎去做午餐,我驚佢唔肯,男人老狗拎個咁嘅飯盒,有D那個少少嘛。




Tuesday, February 21, 2012

好晚嘅晚餐@Fujiyama-ya Japanese Restaurant

2012年2月11日(星期六)

因為去完農曆新年花車巡遊,之後又送番伯伯返屋企,所以是日晚餐係好晏至食,平日我地一家6點半前開飯,呢晚係8點9,仲要係坐低叫至有得食,哥哥其實已經餓到個肚仔扁咗啦,豬扒妹都少有會扭肚餓。我地呢晚係同Tommy同Tommy仔食飯,Tommy仔仔好斯文,又有禮貌,唔似我家哥哥咁嘈,不竟Tommy仔都已經13歲,下一年就升高中啦。因為就番Tommy住同送伯伯返屋企,又唔想花費太多,所以我地去咗我地好鍾意去嘅一間日本餐廳,唔好以為日本餐廳一定貴,無錯好多日本餐廳都收得貴,但呢一間係好合理架,當然要將貨就價啦,唔一定所有食材都一流嘅。

先嚟麵豉湯,係送嘅,待應好鬼貼心,我地大人嘅湯有蔥花,小朋友果D冇。






Saturday, February 18, 2012

2012年三藩市農曆新年花車巡遊(下篇)2012 San Francisco Chinese New Year Parade

開始講西岸醒獅隊喺今次農曆新年花車巡遊嘅表演啦,一開始時,眾後生仔女都精力充沛,舞住獅頭獅尾嘅一窩蜂對住兩旁路人不斷點頭、貶眼、膜拜等,沿途喝采聲不斷。






Friday, February 17, 2012

2012年三藩市農曆新年花車巡遊(上篇) 2012 San Francisco Chinese New Year Parade

自從前年開始李生重返醒獅隊開始,我地都會參與農曆新年花車巡遊,2010年時豬扒妹都仲要坐BB車,果次係第一次坐喺花車上,天氣又凍風又大,豬扒妹去完果晚就發燒,李太仲俾婆婆哦咗好耐,點解唔俾多D衫豬扒妹著,等佢冷病咗。上年2011年因為當日落大雨,李生單拖著雨衣去幫手,李太就同兩個小朋友安坐家中睇電視直播,金睛火眼睇下見唔見到李生。今年雖然天氣都凍,但天公做美唔落雨,所以我地一家四口又出動去坐花車啦。



下午4點唔夠就落到downtown,有咗上兩年經驗,李生好快就搵到個正位泊車,好近出發地點,又離完結點唔係太遠。今次李生去接埋Uncle Tommy個仔仔去,到downtown會合Tommy,因為仔仔有興趣學舞獅,俾個機會佢感受下舞獅係咩一回事。


十年難得一見:醒獅的葬禮 funeral of lion heads

是次話題比較嚴肅同傷感,大家有冇疑問:醒獅百年歸老會點處理?醒獅經過點睛開光後,就係一個有生命嘅實體,唔係一件玩具,唔係得閒拎出嚟玩下,唔鍾意就掉去垃圾堆入面。對於熱愛舞獅嘅人來講,醒獅就係佢地嘅一部份,就好似一個並肩作戰嘅兄弟有病要離開,睇住隻獅頭轉眼間灰飛煙滅,一D都唔好受。一隻醒獅由新造起到百年歸老一般都有十年以上時間,當然如果經常用嘅獅頭會勞損得快,壽命自然會短,不經常用嘅十幾廿年都可以好似新一樣。

醒獅嘅葬禮唔係成日有得睇,亦都唔係隨便俾你睇,今次係十年不逢一潤嘅機會,李生知道即刻帶埋豬扒妹同哥哥去出席,等佢地體會下當中嘅過程,李太問過李生,中間有部份係唔可以影相,因為個過程係好神聖嘅,之後有部份只可以筆述。

今日要送走嘅係六隻醒獅(相中只見五隻,因為有一隻放得太開影唔到),其中一隻係小獅子(剛剛俾個鼓遮住,因為太細隻啦,老公話果隻係baby),應該屬於Uncle Tony兩個仔嘅,佢地由四五歲就開始學,到而家七八歲已經可以獨當一面自己舞獅,比起大人完全唔輸蝕。



Thursday, February 16, 2012

再整米通(星星心心版)Rice Krispy Hearts & Stars

今晚再整多次米通,因為李生話想食加咗提子嘅,我用咗原本嘅一半份量嚟整,因為之前有網友話整成波波型,我諗試下其他形狀都得,用個曲奇模就做到。




Tuesday, February 14, 2012

蝴蝶酥 Palmiers

蝴蝶酥Palmiers係法式小甜點,以前成日喺香港嘅西餅舖都會見到,李太好鬼鍾意,我覺得係一種好有古典味嘅甜點,最正就係配一杯咖啡或檸檬茶,又脆又甜又香,食嘅時候滿口香甜,令我有種回到中古時代嘅感覺,成班仕女著住花邊袖大傘裙,梳個大高髺,好優雅咁食下午茶,讀下詩繡下花畫下畫又一日... ... ...好明顯我又發夢啦



去番現實世界。呢個蝴蝶酥係星期六果日帶去新年花車巡遊,因為趕時間,用咗現成嘅酥皮,冇自己搓,焗到出嚟李生皺晒眉頭,話:failed,overcooked,all burnt!!!:badfeel: 我食咗1/4塊,叫李生自己試下至講,食完佢就遞個紙袋過嚟,叫我全部包走拎去請人食,哼,就好似佢老婆李太咁,呢D蝴蝶酥可能冇外在美,但有內在美嘛:lover:~哈哈,有D想嘔:sickmilk:,李太純粹搞下笑,唔好熄機住,睇埋個食譜先。