Friday, April 13, 2012

基本髮辮編法13:五手辮 5-Strand Braid

呢個五手辮圖解已經係上年10月畫架啦,但好似見冇人有興趣,所以就冇寫帖post上嚟,近來有人問,所以就喺倉底搵番出嚟,唔係講笑,真係架,Yahoo Blog個加相function好鬼唔方便,以前D相排好晒一版版,可以揀跳去邊一版加相,而家唔得,要由最近期開始搵,一路只可以不停scroll down,所以如果D相係好耐之前upload上嚟,真係有排都搵唔到,加上D相唔係跟upload次序放,有時要好小心睇至搵到想要果張相,真係唔好用。



五手辮同四手辮原理大同小異,三手辮係最易明又容易掌握,加上一手就開始亂啦,兩手咩?好大件事,邊有咁多隻手指去抓實咁多手頭髮,又同時可以鬢到辮?秘訣就係當呢五手好似三手咁鬢,而唔係五手,點做到?睇下面嘅圖解!

1)首先將要鬢嘅頭髮分成5等份


2)之後左邊(或右邊,睇你自己習慣)3束頭髮以3手辮方式鬢一組,次序係第1束over第2束under第3束,於是第2、3束頭髮方向左,第1束向右。


3)之後右邊(或左邊)兩束頭髮就係根據第5束over第4束編法,第5束向左,第4束疊向右,然後2、3、5束握於左手,1、4握於右手,就編成一組5手辮,但呢個時候係未見到個pattern嘅。


4)到編第二組,唔駛記住第幾束頭髮啦,只係將最外一束頭髮over第2束under第3束,於是此時就輪到左手有兩束頭髮,右手有三束頭髮啦。


5)到右邊頭髮啦,好簡單,就係將右邊第一束頭髮over第二束under第三束,呢個時候又變番左手有三束頭髮右手兩束。


6、7、8)都係將4、5步驟重覆,不再多講,而你其實只係不停咁將最外面兩束頭髮去織,咁你話其實係唔係好難呢?應該唔係啦,不過,當然對住D柔軟嘅頭髮,又要心水好清手好定咁紥就要多多實踐至會成功。





當你可以明白以上原理,又駕御到果5手頭髮之後,更多嘅6、7、8、9手辮都唔係咩難事,當然大前提係要有咁多頭髮可以紥到6、7、8、9手辮啦。我同豬扒妹紥過5、6、7手辮,佢D頭髮長但少同幼,都幾難紥,要佢有好多耐性肯坐定定,所以呢個都要等放假至紥到。

2 comments:

  1. Pandora 香傭講法文April 13, 2012 at 2:34 PM


    [版主回覆04/14/2012 05:42:52]

    ReplyDelete
  2. 你講起新blog找舊相的問題, 我早發現, 所以那時起, 我會把未用的相片放在早稿中, 日後可copy & paste, 簡單些.
    [版主回覆07/19/2012 13:16:18]呢個方法都幾好喎,我仲發現唔見咗一D舊post,但因為好耐冇備份,所以都唔知點搞,點搵都搵唔番。Yahoo Blog真係越改越唔好用,但又懶得搬。

    ReplyDelete