Tuesday, November 29, 2011

再來一個醃菜:紅白蘿蔔蘋果

之前醃過一個黃芽白彩虹椒,李生可以當飯咁食,佢係一個人拎住個玻璃樽,揸住對筷子夾,好明顯係想一個人食晒成樽啦!李太爸都食得好開心,佢只係密密夾冇出聲,第二日出唐人埠就買咗個中型白蘿蔔,李太媽話李太爸想食醃蘿蔔,屋企又仲有紅蘿蔔,於是就整呢個紅白蘿蔔醃蘋果啦。蘋果係上次網友Maggie Kitchen話加蘋果同梨做醃菜會好食,橫豎屋企剛剛又買咗蘋果,試吓無碍啫。




雜錦涼拌

喺美國呢度生活,尤其是呢幾年經濟唔好,主婦都要精打細算。喺美國去餐館食飯食剩餸菜,個個都會打包拎走做第二日嘅午餐,冇人會笑你孤寒失禮,反而剩晒唔打包,一係就係難食,一係就係浪費。 

因為又做醃菜,今日有D嘢剩又唔想就咁掉咗去,所以就整咗呢個涼拌菜,由5種食料組成,略加少少心思就成為一味前菜或者下酒菜啦,因為係有唔同顏色,所以就叫做雜錦涼拌啦。 






Monday, November 28, 2011

寫在焗蘋果批之後:讓孩子參與

在感恩節當日,廚房一早就天昏地暗,因為爸爸媽媽趕製當晚帶到Uncle R家中的甜品,一個朱古力榛子醬蛋糕和一個蘋果批,雖然不算十分大的製作,但加上煮早餐和午餐給兩個小娃兒吃,每當豬扒妹和哥哥走入廚房,還未開口的時候,爸爸和媽媽已經請他們走出去,不要在廚房裏礙事,更莫說要爸媽陪他們玩耍了。他們著實不明白為甚麼不可以參與,爸媽做的都不是太難的功夫,其實他們都可以做得到,看到四隻小眼裏的失望,李太都覺得於心不忍,盤算著如果讓兩個小傢伙覺得沒有被拒之門外呢?

當李太用星星曲奇模在批皮印出一個個小星子,豬扒妹走進廚房來看到,她語帶驚奇的說:「Wow,星星呀,好美啊媽媽。」(最近,豬扒妹都叫李太作媽媽不是媽咪,不知她的小腦袋又在動甚麼腦筋呢?)李太把批皮放上蘋果批上面,裁出多餘的批皮,看著那些剩餘的批皮和星星,李太靈光一閃,就對豬扒妹說:「你想印星星嗎?」豬扒妹很興奮的說好,李太於是示範了如果拿餅模、如果對位置、如果按下去、用多少力,最後如果用一隻小手指去反扣出星星放在桌面上。




第118款:法國辮淑女頭

呢個係為一個網友諗嘅,因為佢話想學法國辮,但頭髮散同薄,而且反手梳法國辮會攰,所以就諗起整一個較為簡易嘅法國辮款式。首先,係架,梳法國辮好,荷蘭辮好,反轉手織係會好攰架,李太都會,但因為熟習咗,我梳得快就冇咁辛苦,有時攰就會一隻手抓實頭髮,另一手鬆吓再繼續織。



Friday, November 25, 2011

講講感恩節之五:蘋果批下篇 - 批餡及烘焗部份 Apple Pie - how to make filling & bake



講到個蘋果批餡料同烘焗就係成個蘋果批嘅成功關鍵,當你已經雪咗個批皮4小時以上,由雪櫃拎番出嚟,睇落去好似好硬咁,但其實唔係架,我用個切麵粉用嘅膠刀非常容易切開,切開咗個麵團兩份之後,將一份壓平放入焗盤底成為批底。

批皮做法

Thursday, November 24, 2011

講講感恩節之四:蘋果批上篇 - 批皮 Apple Pie - Pie Crust

蘋果批就好似火雞一樣,似乎係感恩節不可或缺嘅甜品,因為我地一家去李生表哥屋企過節,而表哥指定我地帶蘋果批做甜品,表哥嘅媽媽(即係李生姑媽)最拿手就係蘋果批,我都有幸食過一次,老人家喺4年前癌症過世,咁好嘅蘋果批就此失傳,表嫂學到姑媽另一拿手菜糯米飯,豬扒妹今日居然要再添,可想而知有幾好食。


講番整蘋果批,李生李太拍拖時第一次去李生屋企過聖誕節就係整咗個蘋果批帶去,中間咁多年我都冇正式再整過,檸檬批呀、雜果撻、芝士餅反而有整過好多次。今次呢個蘋果批係用一個傳統蘋果批食譜做嘅。先講做批皮,因為要雪最少4個小時,最好係隔夜,所以我係感恩節之前果晚搓定批皮。


材料:(做出兩塊約9吋批皮)

中筋粉   2杯半(20安士=565g)
鹽     半茶匙
牛油      1杯(8安士=227g)雪硬
冷水    半杯(118ml)

Wednesday, November 23, 2011

講講感恩節之三:焗火雞 Baked Turkey

一講起感恩節就想起火雞,感恩節咭係火雞做圖案,派對裝飾又有火雞,連入去Google個homepage都係一隻火雞做icon,可想而知火雞幾咁深入民心呢。今年係李生李太第一年整火雞,因為今年哥哥入咗小學,學校有Thanksgiving Feast,叫家長donate火雞,我地就試吓整唔整到啦。

話說近年經濟唔好,好多人都樣樣慳錢,即使新年感恩節都想駛少D錢,對於可以慳一蚊幾毫都會一窩蜂咁即時jump on it。超市只要買滿$25就可以優惠價買特定大細火雞一隻,李生李太就揀咗一隻十幾磅嘅火雞,其實焗真係唔難,但花時間花精力。


再嚟燒賣:菊花燒賣 Chrysanthemum Siu Mai

再整燒賣係因為豬扒妹學校開Thanksgiving party,我地想到拎一D點心去學校俾小朋友食,原來想整埋雞翼或雞槌,但校長會拎火雞應節,所以叫李生李太只帶點心就好啦。 

 

今次整加入咗冬菇,同埋李太想包大隻少少,加多咗餡嘅如果用上次果種包法會包得唔實,隻燒賣好似肉酸咗,咁成日喺酒樓見到人地包果D,塊皮好少有厚摺紋,於是試咗幾隻後,就「發現」咗呢個包法,好好玩又好似朵花咁,因為有八九塊花瓣,我就姑且叫呢個做菊花燒賣啦,其實叫太陽花都似架,但中國點心似乎同菊花襯D。OK,ready?


Tuesday, November 22, 2011

兩公婆夾手夾腳整火雞

今晚李生李太夾手夾腳焗咗隻火雞,呢次係李生整八成,李太只係幫手兩成,因為李生打聽到個食譜,想自己霸住整晒,但隻火雞實在太重啦,佢冇可能一隻拎起隻熱辣辣嘅雞,另一隻手倒起D油,而且事前又冇諗清楚有咩嘢要準備,所以冇一隻合適嘅焗盤,屋企冇嘅錫紙盤唔多夠大,倒油就仲辛苦。結果係要李太幫手,由李生逗起隻雞,李太去倒油,但因為廚房細,兩個人企都唔知點樣企去就位好,李太俾個焗盤辣到,搞到打瀉碗油,李生就搞錯咗老抽當生抽,於是個gravy係甜甜地又深色,本來李太想出聲話等我整個gravy,但李生話佢問咗人點整,咁算啦,男人總愛認叻,由得佢自己玩吓啦。



明日我要帶哥哥返學去學校廚房幫手,到時一個返工袋,一個書包,加埋一隻十幾磅火雞,兩罐cranberry source,一盤gravy,而家我諗起就有D驚,點拎好呢?唯有叫婆婆幫手,拎架手推車仔幫手,唔係到時裙拉褲甩就樣衰。
好期待仔仔明日嘅Thanksgiving Feast,到時一定要記得帶相機至得。

Monday, November 21, 2011

三藩市Cable Car遊記

2011年9月18日

李生有個好朋友係Cable Car司機,今日就帶豬扒妹同哥哥去坐鐺鐺車。點解Cable Car會叫鐺鐺車?因為Cable Car行車時司機會打鐘通知其他行人或行車,Cable Car將會通過,因為三藩市有地區路面比較狹窄,轉彎位有時視野有限,好容易睇唔到對頭車,就好似大霧時汽車都會不時響號嘅原理差不多;另外以前老華僑英文有限,好多時都會為日常生活不同事物人物安個別名,鐺鐺車係其中一個。

 


Friday, November 18, 2011

第117款:雙四手辮拼馬尾

2011年10月8日

之前有講過點樣紥四手辮,唔好以為係紙上理論,真係紥到出嚟架,不過豬扒妹D頭髮唔係厚,又唔算好長,要紥四手辮馬尾只會係變成一條豬尾,所以就退而求其次,幫佢紥咗呢個兩條四手辮仔加馬尾。


Thursday, November 17, 2011

第116款:簡易側馬尾變款

呢個同簡易公主頭變款同樣梳法,所不同嘅係呢個前面睇已經同普通髮型不同,而之前果一個公主頭變款前面睇見唔到太多變化,另外,呢個髮型比較公主頭活潑D。



第115款:簡易公主頭變化款

今次講一個好簡單嘅公主頭髮型,冇咩難度,而且要梳都好快手,唔駛5分鐘就梳好。




Tuesday, November 15, 2011

第114款:荷蘭辮前陰側髮髻

呢排掛住寫煮嘢食嘅Blog,唔好誤會,我都係要日日幫豬扒妹紥辮架,唔會俾佢披頭散髮返學,我自己就一時時啦,而家反而係急切要搵時間染髮就真,因為D白頭髮又鬼鬼祟祟咁走出嚟,唔紥起都唔覺,一抓起頭髮梳辮就無所頓形架啦,有時就係咁索性唔紥起,但其實我係好手痕架,由細都大都鍾意玩頭髮,唔知你明唔明,真係一得閒就拎起頭髮左鬢下右橋下咁,我唔係變態架,我所識嘅長頭髮女生都係成日咁做,呢D嘢男生係唔明架啦。

OK,今日講嘅係一個髮髻髮型,梳嘅時候要先分成兩部份,第一個部份係一條前陰鬢辮,第二個部份係一個簡單髮髻。



首先由右邊約九一分界部份開始,用荷蘭辮嘅方式將前陰部份梳一條鬢辮,每織一組就由前方加入頭髮,織嘅時候要向後織,直至去到耳仔對上,就再以三手辮方式織到尾,以橡皮筋綁好。


餘下頭髮就全部拉到頭嘅左邊,於約耳仔後面位置束成一個馬尾髮圈,即馬尾去到最後一圈時,唔全條馬尾拉出,只拉出一半,成為髮髻嘅基礎,突出嘅髮尾部份,以同一方向(順時針或逆時針方向都可以)略為扭一扭實,然後繞住個髮圈,同時可以遮掩埋條橡皮筋,以髮夾固定位置。

第二個步驟就係將條鬢辮拉過去繞住個髮髻,以髮夾固定,一來令個髮髻更實淨,二來同時亦將條鬢辮嘅尾部跟橡皮筋掩藏入個髮髻入面。

後面睇係咁嘅。



Monday, November 14, 2011

醋漬醃菜彩虹椒 Pickled mixed veggies & peppers

咁啱李生買咗個細細嘅紹菜(又叫黃芽白),佢叫我切嚟煲雜菜湯,我見都用唔晒,不如留D整個醃菜啦。事緣係星期四去學校活動,之後去晚飯,果間餐廳個前菜係醋漬紹菜,爽脆又合酸度,問個老闆點整,佢話只係用D醋加糖醃幾日,但我覺得應該有D秘訣,不過人家做生意,當然唔會隨便講俾人聽,我心癢想試吓整唔整到人家咁好,今次機會嚟啦,因為齋整紹菜好寡,所以就攞咗婆婆幾個彩虹椒,所謂彩虹椒係細細隻嘅顏色細椒,唔辣不特止,炒起嚟仲好甜好爽,地中海菜都成日有用到,呢排賣得好平,$0.99一大袋非常抵食,一袋食幾餐。




講講感恩節之一:傳統假期 Thanksgiving Holiday

萬聖節後不到一個月就到感恩節,感恩節流行於美加,但美國和加拿大感恩節的日期不一樣,加拿大是每年10月的第二個星期一,正正是美國的Columbus Day哥倫布日,美國的感恩節則是每年11月的第4個星期四,為甚麼兩者感恩節會有不同?那就要追溯到發現到新大陸時代。

感恩節源於歐洲人和本土北美洲人慶祝收獲季節結束,而所不同是加拿大慶祝的感恩節,同時也慶祝發現新大陸,所以和美國的哥倫布日同時。美國這一邊的感恩節則源於1961年Massachusetts的Plymouth慶祝節,因為當年農作物收成甚豐,之後的殖民地總統以此為例舉辦慶祝會。不過,由於感恩節和農作物收獲季節掛鉤,而北美幅員遼闊,每一個地區的感恩節都會有分別,就如加拿大位於較北面,冬天來臨較早,所以感恩節會早到10月,而美國位處較南邊,收獲季節就到11月才完結。

Friday, November 11, 2011

親子豆腐忌廉芝士撻 Tofu Cream Cheese Tarts

一向都聽說用豆腐整忌廉芝士批係清淡口味,成日都想試但一直都冇機會,前兩日買咗盒豆腐放喺雪櫃,今日係退伍軍人日放假,但由早落雨落到黑,都冇得帶對仔女出外玩。下午見得閒,哥哥去咗婆婆度玩,得豬扒妹同李太喺屋企,我問豬扒妹想做咩,佢話整糕糕,其實整任何嘢佢都係當整糕糕架啦;於是就決定整個豆腐忌廉芝士餅,但屋企冇合適可以整批嘅baking pan,於是就改整撻啦。




自家製燒賣 Homemade Chinese Appetizer : Siu Mai

其實之前整過燒賣架啦,不過唔成功,因為買唔到燒賣皮,連春卷皮都冇,諗住試吓雲吞皮,唔掂,一D都唔似,又太大塊,要包到好大個,但就唔靚味道又唔平衡。今次去第二間超市搵到燒賣皮,於是就再接再厲,買過材料又整過。

明日係Veteran's Day假期,有人譯亡兵節,有人譯退伍軍人日,其實係紀念為國捐軀嘅士兵,但美國呢度唔係個個州都係法定假期,亦都唔係間間公司都會放假,以前我個部門冇得放,今年我地改咗,不過有少部份同事都要on duty,我呢D小薯仔就唔駛返工。

今晚因為學校有活動,去到差不多8點先返屋企,李生問我雪櫃D肉要整咩,如果今晚唔整唔知會唔會壞,我就話整燒賣,李生煞有介事咁問我係唔係用燒賣皮,因為上次果D完全唔似,係... 知道... 係燒賣皮嚟架... ...




Wednesday, November 9, 2011

磨菇濃湯 Mushroom Soup

買咗果包磨菇真抵用,李太整完甘筍磨菇湯,李生又整雜菜湯,居然都仲有剩,都係時候要消滅埋呢幾隻大白磨菇,因為想再整燒賣,買咗有頭蝦,唔想浪費咗D蝦頭,於是就加埋磨菇,整咗呢個磨菇濃湯。



簡易焗肉丸 Baked Meatballs

買咗豬肉牛肉同蝦,再唔整就壞架啦,一早諗住整西式肉餅Meatloaf,唔記得咗meatloaf pan已經報銷掉咗,其餘果D pan係圓形或者係中空果隻,用嚟整meatloaf好似有D古怪,於是就整咗呢個肉丸,可以留番嚟煮意大利粉或者就咁加D瓜菜俾哥哥做午餐,哥哥同豬扒妹好奄尖架,唔鍾意食肉,稍為硬D實D煙un D都唔食,一係就趙完吐渣,激死我,唯一哥哥超級鍾意嘅係salami,肉丸都OK架。今次呢個係牛肉較多,豬肉較少嘅版本。




Sunday, November 6, 2011

第113款:荷蘭辮側髺

最近鍾意整吓側髺,因為呢排都幾興,你睇荷李活好多女星出嚟都會梳個側髻,而家講呢款梳起嚟都好古典。




Friday, November 4, 2011

甘筍磨菇湯 Carrot Mushroom Soup

原本想整淨磨菇湯俾哥哥做明日午餐,因為哥哥超級鍾意各種菇類,但屋企冇西芹,搵到甘筍,於是就整咗呢個湯,好味又健康,今次仲係用炆五花肉淨低嘅肉湯,唔駛用罐頭雞湯。



家傳炆五花肉

突然好想整炆豬肉,好似台灣嘅滷肉,但保証正好多,呢個係我嘅家傳菜,由阿嫲教俾媽咪,再由媽咪傳俾我,不過我都唔係次次都做同樣嘅味道,有時會整甜,有時就鹹,睇果日心情。

今次整呢個係較為甜少少,因為落嘅糖份多D。




Wednesday, November 2, 2011

貴精不貴多

2011年11月2日

初初開blog,發現新大陸咁add咗好多網友,有少部份係朋友嘅blog,睇佢地個blog就好似見面咁,睇住佢地兒女點成長。另外大部份係飲食blog,因為我鍾意整嘢食,我呢度都有我整嘢食嘅紀錄,其實只係咁多年來冰山一角,始終我唔係日日煮飯果隻,好多時都係煮D家常嘢,耐不耐整D嘢食氹吓李生同對仔女,所以發現網上咁多食譜可以偷吓師,簡單開心到顛咗。再有一小部份係有關手作嘢同興趣嘅blog,因為李太都係由細到大鐘意整吓手作嘅人,屋企有成箱雜雜碎碎嘅材料,香港嘅屋企仲有幾十樣以前整落嘅陶瓷製成品,遲D細佬搬屋就會pack箱寄俾我,我都要諗吓放邊度,唔要我唔捨得,因為放咗冇一千都幾百個小時心機落去,好多都係我為某人或某原因做嘅,係我生命嘅一個重要部份。

好啦,講番我follow嘅blogs,由7月到而家,短短4個月,我足足加咗87個不同網友,自從Y!Blog升級後,recent updates成日都show唔到所有新update posts,之前未升級,好多Blog都睇唔到,而家升級進入第二階段,所有網都要強制升級或關閉,喺個網友link度,十個有兩個係冇相顯示,click去睇吓有時會有此網已關閉或冇此用者等錯誤訊息。把心一橫,都係時間清一清場,我加咁多個都唔係日日睇得晒,而且我當人地係網友,人地未必係,有時去搭咀comments都冇人回,我自己就一定回,因為係禮貌,或者係人家貴人事忘,唔得閒應酬我呢D小薯仔,試過去好心留言俾資料其他blog主,人地就只係回其他人冇回我,可能都係時候檢討下自己,費事好心著雷劈啦。或者我太死心眼,網上世界始終係虛擬,有幾真幾假都唔知。


涼拌西蘭花莖 Broccoli Salad

2011年11月1日

之前講過切咗嘅西蘭花莖唔好唔要,其實係幾好嘅材料,可以切粒加叉燒或蝦仁、薑米炒飯,不過一定要去皮,唔係就一口渣架啦。而家介紹一個簡單涼拌菜,材料簡單又可以做前菜送吓飯,下酒都好正。



Tuesday, November 1, 2011

雜菜沙律 Mixed Green Salad

2011年11月1日


今日同李生去買餸,佢買咗兩個西蘭花、一棵西生菜,我就買咗一袋磨菇、一大塊五花腩、一盒豆腐,準備呢幾日整D好嘢俾李生同哥哥食。李生叫我整沙律俾佢做午餐,佢話要改變飲食習慣,中午要食得健康D,李生用咗個半月減去11磅,因為公司同事打賭,暫時李生嘅紀錄居首,贏咗會有各人夾份嘅120蚊,李生話會用嚟請班同事BBQ。



講番今晚個沙律,係全蔬菜,不過係好好味架,我一D都唔會虐待李生,雖然佢成日要做實驗老鼠,但我絕對唔會要佢食難食嘅嘢,而事實上李生好識食,難食嘅佢係唔會食架。


萬聖節後遇怪獸

今朝所見,講咗出嚟可能會俾人話,但我都係過來人,我一定唔會咁做。原來港女質素唔係香港女人獨有,呢邊好多白人都有,更有過之而無不及,比大陸煌蟲更厚面皮。

話說今朝搭巴士,可能係昨晚萬聖節,巴士司機玩得夜返唔到工,明明電子牌上寫Arriving,一轉頭就跳出8 minutes,心諗:「死啦,越來越多人,一陣上車唔只冇位坐,上唔上到都成問題」,於是把心一橫,見有時間就行番回頭路去上一個站等。

去到條龍都唔少人,平日小貓三幾隻等快車,今日條龍有十個人,走到龍尾,咁啱遇到朋友,佢當時食緊煙,排去我後面,剛剛開始傾第一句計,有個女人迎面而嚟,同我朋友講:"Can you stay away from the line?" 我朋友冇出聲,走埋一邊食,個女人就笑笑口話:"Because of the cigarette"。果陣我心諗:有冇咁大枝嘢?你怕煙味就自己走埋一邊啦,唔係叫人地走架嘛。我朋友食完枝煙行番埋嚟,同我講一陣個女人實叫人讓位,原來個女人大緊肚,我望清楚都應該有五六個月。


第112款:反轉結馬尾髮髻

2011年10月29日


跟之前果款反轉結馬尾鬢辮,可以有一個變化款,將四條鬢辮做成一個髮髻,由較為活潑可愛嘅髮型化成一個典雅嘅款式~





第111款:反轉結馬尾鬢辮

2011年10月30日
呢排寫煮嘢食同濕濕星星嘢多,都係時候要寫番D髮型嘅post啦。這一款係好容易嘅髮型,花少少時間喺鬢辮度,但做出嚟效果都幾精緻架。