第88款：荷蘭式孖辮三款紥法（2級難度）10-15分鐘

第88款：荷蘭式孖辮三款紥法

2011年8月5日

呢三款係一個月前試紥嘅，係以兩條荷蘭辮為本，做出三個唔同收尾方法。

首先將頭髮分為左右兩份，以荷蘭辮方式紥成兩條孖辮。紥嘅時候兩條辮都順向一邊，我先紥右邊一條，由頭頂開始鬢到尾，紥時最好先以橡皮筋略束左邊頭髮之後再紥右邊，咁就唔會混亂，我整呢個頭髮時就冇咁做，所以你可以睇到有一部份分得唔夠靚。

紥完右邊嘅一條荷蘭辮之後，左邊一條編嘅時候要拉向右邊，完成後就會兩條辮都側向一邊。

嗱，第一款收尾方式就係由得兩條辮垂向一邊，非常簡單。

第二款就將兩條荷蘭辮打交叉，中間以橡皮筋固定，我用咗一個黑色橡皮筋，咁就會自然D。

第三款就用兩個頭珠一上一下固定兩條孖辮，望落嬌俏D。