Monday, January 30, 2012

農曆新年系列之4:舞獅 Lion Dancing

以前都有講過,李生以前參加醒獅隊,玩咗廿幾三十年,休息咗八九年,兩三年前因為對仔女而復出,每年農曆新年期間佢地都會好多活動,除咗今年2月11日嘅農曆新年花車巡遊,連續兩個星期六都會去多華人商舖舞獅,為醒獅籌募經費,好多華人主理嘅商舖都好鍾意舞獅活動,因為好意頭,唔通有人問你舞獅嚟拜年,帶來吉利,會有話唔要唔好咩?甚至有D老外都好鍾意睇,剛過嘅星期六就係西岸醒獅隊嘅籌款日,李太因為趕帶豬扒妹去考校區嘅語言試,唔記得帶相機,呢日所有相都係用手機影嘅,當然冇相機咁清咁靚,但都算捉到當中精彩部份。





Sunday, January 29, 2012

Gilroy Garden 一日遊之3

都有D攰啦,豬扒妹想坐摩天輪,排咗幾個字隊終於輪到我地啦,風景尚可,但豬扒妹因為個座位會前後擺動有D驚,死抓住我。






Gilroy Garden 一日遊之2

玩完個轉得好快嘅咖啡杯之後,又係轉轉轉嘅士多啤梨,其實多數機動遊戲都係轉轉轉,所以哥哥又係照例話好驚唔玩,但一開動之後發覺又唔係好快喎,於是由捉實我之後到開始肯放手坐,不過都係有D驚,



反觀豬扒妹,真係天不怕地不怕,同爸爸坐士多啤梨,仲想企起身。




Saturday, January 28, 2012

Gilroy Garden 一日遊之1

2011年10月

呢一次寫舊blog(仲要好舊),相片一早upload咗上嚟,但就漏咗寫。Gilroy Garden係一個theme park,原本係一個有錢人嘅私人公園,只開放俾自己朋友同員工,後來開放俾公眾,每年只有幾個月經營,因為天氣冷或雨天都唔適合,而九成都係戶外機動遊戲。由早兩三年開始因為經濟唔好,Gilroy Garden就出coupons,真係平好多,平日去每張票要三十幾,前年試過$9.99,上一年$12.99,今年就$14.99,但點都比平日廉價,又咁啱有萬聖節節目,叫做多D嘢睇咁啦。今次去到大門未開,要排隊等入去。

影番張相先,當日都好熱,Gilroy Garden夏天可以去到成百度,10月冇咁熱,但都可以足夠著短袖衫短褲。




Friday, January 27, 2012

自家製豬肉乾 Homemade Chinese Style Pork Jerky

豬肉乾原來唔難整,自己喺屋企都整到,李生好鍾意食豬肉乾,美國呢邊都有類似,叫做jerky,多數係牛肉,仲有雞肉火雞肉豬肉等,但一般係好硬好有咬口,真係咬到個咀好攰,咩興趣都冇晒。之前上BK見到講自製豬肉乾,睇完覺得好神奇,原來咁易整,但一直都未有時間試。剛剛呢個星期買咗磅豬肉,諗住包雲吞俾大少當午餐,但已經星期四啦,都未有時間整,今日李生提我好諗D嘢煮用咗D豬肉,唔係就會壞,我話咁今晚包雲吞啦,但李生話佢想食豬肉乾喎,好啦,試下啦,我同自己口味整出嚟呢個較為多汁,唔算好乾,因為怕太乾會熱氣,另外我又整得甜少少,多D蜜糖味,希望我果兩個素食小魔怪肯賞面食D啦。




Thursday, January 26, 2012

拜年 @ 恭賀龍年

雖然係遲咗少少,因為新年都冇假放,仲要做到冇時停,連食中午飯都係三扒兩撥,一邊做一邊食。事不宜遲,豬扒妹出嚟同大家講:恭喜新年快樂,身體健康。




Wednesday, January 25, 2012

食brunch @M's Cafe

寫一篇年廿九去食brunch先,呢一間小餐館同李生李太好有淵源,事關呢度嘅老闆Joe同老闆娘Amy見証我地由拍拖到結婚到生仔,拍拖時我地兩個成日行完金門公園就嚟呢度食早餐,食完就行返屋企,天氣好係幾好嘅運動,李太大肚果陣我地都成日係咁當運動。李生求婚果朝都同李太嚟呢度食早餐,食完就返李太屋企(而家我地屋企)拎隻介指出嚟。Joe同Amy見住我地拍拖、結婚、生仔,見住我對仔女由BB到而家幾歲大,可以話係老朋友,而且佢地同我地又係鄰居,我地住嘅地方差兩條街咋。M's Cafe位於Inner Sunset,果度泊車都叫OK,我地通常都係一早去,所以一般都唔難搵位。
呢間餐廳仔位於條街中間,細細個門口,裏面座位唔多,大枱得兩張,二人四人枱就多D。睇裏面嘅佈置都知係舊式餐廳,就好似香港中環嘅冰室咁樣。



Monday, January 23, 2012

Sunday, January 22, 2012

第二次嘅排包:迷你版

因為之前整嘅排包對兩個小朋友來講係較為大片,尤其是豬扒妹,因為通常呢隻直接法手搓包到第二日都會較硬,加上呢排天氣實在太凍,麵包放室溫都硬晒,一定要入微波爐或焗爐番熱,咁一拎出嚟對仔女就話好熱太大塊,所以特別改一改,整咗一個迷你版,用嘅料一樣咁多,一樣咁搓唔焗,只係之前個麵糰切成8份,呢次係20份,加埋提子,每一塊排包係正常嘅一半。




Saturday, January 21, 2012

農曆新年系列之3:迷你𣏌子薑汁紅糖年糕

因為未整過年糕,只靠李太媽好簡短嘅講述,呢個年糕有少少打天才波加考記憶,李太儘量諗番十幾廿年前李太媽係點整年糕,但印象都幾模糊,因為通常年糕都係最後至整,有時李太媽係半夜蒸,根本我都已經瞓咗睇唔到,不過以前媽媽話我地大咗,年三十就要過咗半夜十二點至瞓,叫做守歲,為家中父母長輩求福,喻意長壽,點可以忍到眼瞓?多數都係睇TBB嘅賀歲節目,留意下來年生肖運程,聽下賀年歌咁。而家我估TBB嘅節目少咗好多人睇,個個寧願上網都唔睇啦。

講番我呢個年糕,真係一個「創作」,因為摷雪櫃搵紅棗,俾我搵到兩包大大粒𣏌子,於是靈光一閃,不如打D𣏌子啦,有益又甜甜地,因為我個蒸籠較細同矮,唯一一個糕盤啱用嘅已經放咗蘿蔔糕,於是我諗不如整一杯一杯架啦,迷你𣏌子薑汁紅糖年糕就誕生啦。





Thursday, January 19, 2012

廚餘心思菜:新鮮蘿蔔皮沙律

因為整蘿蔔糕,所以要刨去蘿蔔皮,通常呢D廚餘,大部份人都會就咁掉入垃圾桶,但其實可以用嚟做個心思菜,用嚟做頭盤或下酒菜都可以。




Wednesday, January 18, 2012

農曆新年系列之3:童年往事,蒸蘿蔔糕

上一篇講到李太細個住屋村,李太媽同一眾師奶會交換賀年食品,李太媽每年會整嘅包括蒸蘿蔔糕,而呢個就係李太嘅童年陰影,因為每年幫媽媽磨蘿蔔唔係十斤八斤咁少,而係幾十斤咁計,每一底糕用5斤蘿蔔,咁整得四五底大家都心裏有數啦,李太係由朝磨到黑,有時唔係磨一日半日,而係兩三日,因為李太媽一晚只可以最多蒸到兩三底,要整埋俾鄰居幾位太太,新年前嘅日子真係忙到不得了。李太大大話話有六七年冇蒸過蘿蔔糕,因為自從來美後,結婚生對寶貝係好似排隊咁一年接一年,前幾年對仔女細時根本冇時間可以做呢D嘢,而且美國呢邊農曆新年唔係假期,唔會有歲晚收爐或初四開工呢D歌仔唱。今年因為哥哥入小學,老師講解農曆新年,我想開始教多D有關中國文化習俗知識俾佢,哥哥鍾意食嘢,由食物埋手就最好啦。




農曆新年系列之2:傳統賀年油角

其實講整油角,李太好細個已經學識,大約係小學5年級啩,都唔記得好清楚,果陣李太住香港嘅屋村,係七幾年起有獨立廚房廁所果隻,一層樓有四十個單位,果陣鄰居都守望相助,平日都會打開門,行過門口都會寒喧幾句,大家嘅小朋友一齊大,上一樣嘅學校,有D成為好朋友,逢有好嘢食,大家都會分甘同味。由於當時大部份已婚女性都喺屋企一邊湊小朋友,一邊做外發,李太細個就幫李太媽整過絲花,車過睡衣,當時鄰居嘅太太(個個都叫師奶)事無大小,都會大家商量,小至點樣補衫,點樣煮餸,大至小朋友報邊間學校,老公失業等,大家都會講。李太當時年紀細,好多大人嘢我都唔識,李太媽唔會同我講,而家大咗講番,又係另一種體會,好懷念以前果種人情味濃嘅生活,唔似而家「各家自掃門前雪」嘅心態,對於以前嘅情同事,那些年嘅任何嘢都好似令人回味萬分。

講到油角(又叫角仔),李太媽係唔識整,亦都冇興趣整,因為工夫繁多,又花時間,但以前每年農曆新年我地屋企都會有油角,因為以前我媽同隔鄰嘅幾個太太都喜歡玩「交換禮物」,你蒸糕我炸油角,大家整完你拎D俾我,我拎D俾你,冇計較邊樣貴D邊個多D,就係咁樣分工合作,每年幾個家庭嘅賀年食品就樣樣俱全。李太媽每年只蒸糕,年糕、蘿蔔糕、芋頭糕,晚晚開始食晚飯就開始蒸,都要蒸幾晚,有時蒸到半夜三更。

有一年鄰家太太整油角,咁啱要人幫手,李太媽就派李太去,當日都唔知整咗幾多個鐘,只係不停手密密包,鄰居太太壓皮,佢細仔幫手印模,我就負責包,應該包咗幾百隻,原來係幾好玩,我又好有興趣睇住鄰居太太搓皮,當時係用豬油整,D豬油仲要係李太媽用豬肉自己炸俾鄰居太太用嘅,以前總覺得好神奇,個個媽媽都好似萬能咁,一對手又工作,又煮飯洗衫,縫補木工,無咩難倒佢地。而家注重健康,當然唔會用豬油,其實想用都難,今次我以牛油代豬油,炸出嚟冇用豬油咁酥,但出嚟都係脆嘅。




Tuesday, January 17, 2012

排排坐,港式排包 HK Style Egg & Butter Bread

排包係我喜歡嘅港式麵包之一,最鍾意佢可以一片片撕出嚟,甜甜地個樣又幾靚,不過以前屋企窮小朋友多,多數都係買一大條嘅生命麵包,如果買手工麵包真係好好錢都唔夠食得飽。今次整係俾仔仔帶番學校食,原來已經有粟米雞蓉湯俾仔仔做午餐,但又好似唔係幾夠飽,尤其是第二日仔仔有體育堂,通常都會肚餓D,李生叫我整啦,我想下,都係嘅,多塊麵包頂肚D。






農曆新年系列之1: 中國人在三藩市

寫了這麼多篇做麵包,真的要在農曆新年前寫一寫關於三藩市的農曆新年。三藩市又名舊金山,是美國華人聚居最多的城市之一,東岸出名的是紐約,西岸就要數三藩市,洛杉磯都有不少華人,但若論歷史悠久就非三藩市莫屬,以前祖父那一代"賣豬仔"很多都是來到舊金山。說到底這裏都不是華人地方,就算我們努力保留中國文化,很多移民第二代第三代都已經對中國文化認識有限,莫說有更多新一代連中文也不會說了。

李太來美七年多,三藩市的農曆新年氣氛當然比不上香港、中國或其他較多華人聚居的東南亞地區,身邊的親戚朋友亦不常見面,指定拜年的也只限於李生父母和李太父母,李生的兩個妹妹都嫁美國人,對於中國傳統節令都沒多重視,他們的孩子已是不折不扣的西方孩子,李生李太雖然都不旨望我家的小孩會對中國文化熟悉,但都想盡力把中國傳統文化的種種多講解,教與他們有關作為中國人的特別之處。每年冬至、團年、開年等一家人團聚吃飯的習俗我們這麼多年來都一直維持不變,另外,公公婆婆每年都會為兩個孫子買風車、燈籠等,由於兩個孩子的學校都有較多華人小孩,有教授中文,所以學校對於灌輸中國文化的知識方面都盡了力,希望我們在家都會可以給予多點支援。



Sunday, January 15, 2012

迷你版提子鹹方包 Mini Salty Bread with Raisins

李生話想我整三文治果隻方包俾個仔食,我一直都喺度盤算住點整好。呢晚對仔女又好似往常咁晚餐後又話要食嘢,因為我地晚飯係約6點食,李生慣咗晚飯唔食得多,之後就會食D零食,對仔女都學咗佢D衰嘢,我規定太晚唔可以食糖份太高嘅嘢,呢晚因為下午仔仔去birthday party兩點幾食咗pizza,晚飯就唔食多,果陣肚餓我都預咗。我問對仔女想食咩,佢地居然話包包,我話OK啦,拎起個麵包袋想攞麵包俾佢地食,點知個女話:"NO,我要食媽咪整果D包包,I want to help you make 包包"。但果陣整包仲要幫手對佢地實在太晚啦,於是我同豬扒妹講:"媽咪整包包,但你要早D去瞓覺喎,唔係媽咪整唔到包包架"。哥哥:"我要幫你整"。我話:"唔得架,包包好難,你幫唔到手架,你食完呢塊包包,早D擦牙瞓,媽咪今晚整你聽日有得食,好唔好?"哥哥同豬扒妹好爽快答應,呢晚真係不費吹灰之力,兩個B喺9點前上床,李太就開始搓包啦。

呢個鹹方包salty bread,又叫枕頭包pillow bread,因為通常都係一大舊好似個枕頭咁,我自己好鍾意食一隻甜甜地有提子乾嘅,對仔女都鍾意食提子乾,於是就整咗呢個迷你版提子鹹方包,點解叫迷你? 因為我係用一個細焗盤做,塊方
包係得正常方包一半咁大,適合我兩個大帝食。



是日brunch:西洋菜豬肉雲吞 Wantons with watercress and minced pork

因為李生有事,所以今日又係一對二,通常咁嘅情況下,我多數都會只食一D簡單嘢,唔會攪咁多,因為唔想留低兩兄妹自己喺廳玩,有時唔睇住幾秒鐘就打交爭嘢,咩都可以爭一餐,又可以係鬥咀演變成打交,所以就算係去叮個麵包都要一「耳」關七,聽到有咩風吹草動就要1秒跑到現場,制止任何有可能會演變成打鬥嘅情況出現;不過呢朝早原先想一個人帶兩個出去食個早餐,但兩兄妹都話想喺屋企食,咁屋企又冇咩可以食,問佢地想食咩,答案係包包(咁啱冇,要整都可以當下午飯啦)、cereals(有少少,但唔夠兩個B食,而且哥哥唔多鍾意)、salami sandwiches(豬扒妹唔食)......於是我問不如食雲吞好嗎?好彩兩兄妹都話好,於是約法三章:要乖乖地入去廳玩,唔可以打交,媽咪整雲吞,唔好入去廚房睇,因為佢地冇嘢可以幫手。OK,deal。





Friday, January 13, 2012

自製比薩批 Homemade Pizza

之前都講過自製pizza,但果次係用出面買嘅pizza dough,自己加料去焗,今次唔同,係連個pizza dough都係自己搓。好早以前,李生都話想自己整pizza dough,仲買埋酵母放喺屋企,上網搵咗好多不同資料,今次係我自己搵到嘅,試吓得唔得啦。



Wednesday, January 11, 2012

熱辣辣熱朱古力 Hot Chocolate

一對仔女自從上次去完Manor Cafe,飲過熱朱古力之後,就愛上了呢種咁高脂嘅飲品,其實又冇可厚非嘅,李太都鍾意飲,尤其是冬天冷到對手仔都結晒冰嘅日子,捧住一杯熱辣辣朱古力,暖在手又暖在心,飲完成個人暖笠笠。原來李生一早整過熱朱古力俾對仔女飲,應該係喺周末李太賴床嘅時候,因為哥哥可以話俾我聽爸爸係加D咩入去,而我係唔知道屋企原來有D咁嘅嘢,我真係一個失敗嘅主婦!呢日朝早,李生要修理間屋,對仔女想黏住爸爸,所以我提議整熱朱古力飲。




再嚟椰蓉檳 Coconut Buns again~



呢次係第三次整麵包啦,都係椰蓉檳,因為鍾意食囉,而且革命尚未成功,點可以又走去做第二種。今次大致上個麵團材料係一樣,不同我手搓咗好耐,加咗多D水,手搓耐D係想睇吓會唔會個質感更鬆更彈。


Monday, January 9, 2012

椰蓉檳出爐啦 Coconut Buns

昨日下午整咗pizza dough同椰蓉檳,可能係第一次整,手勢唔好,所以出爐個dough同個包都好似唔係幾發大,又好似唔夠鬆軟,又好似焗好耐都唔熟,總之就係唔係幾妥,諗嚟諗去唔知邊度出錯,最後迷底終於喺執相時解開:咦,原來果包酵母係7g唔係21g,我唔知個packaging攪咩,可能係一pack三包買,每包7g,個包裝寫咗總共21g,好彩有影低相,唔係就死得不明不白。

今晚再死心不息再試過,落晒成包酵母,又上youtube搵教手搓麵包嘅片睇,咁啱見到一個係麵包師傅教學生整包示範搓粉團手勢,原來要好大力搓到個粉團表面光滑出晒筋但唔黏手,於是就開工整,出嚟呢個包真係似樣啦,鬆軟有味,昨日仲有一個錯處係冇較到餡料嘅味,今次呢個冇出面賣嘅咁甜,但絕對係可以講好味。



金門公園新發現 Golden Gate Park again!

2012年1月2日都仲係假期,李生又話帶對仔女去金門公園,我唔得話佢知果日唔係星期日,未必封路。去到果然係冇封路,中間條路泊晒車,仲車來車往,但既然嚟到冇理由走嘛,於是就喺空地踩scooters,呢個係一入空地範圍就見到嘅地上塗鴉,昨日冇架,都幾有趣。







Saturday, January 7, 2012

元誕日金門公園 Golden Gate Park

新年連續3日假,因為1月1日係星期日,所以1月2日補假,呢幾日李生有嘢做好忙,但我地都抽時間帶對仔女出去玩吓食吓,其實小朋友最重要係父母陪,去邊食咩都唔係好緊要。話說2012年1月1日星期日,金門公園Richmond一段行車路照例會封路,劃為行人專用區,普通車唔入得,只有有通行証車輛可以進入,包括巴士、shuttle bus、運貨去小食亭嘅貨車同警車,所以星期日會有好多人一家大細去踏單車、跑步、散步、踩scooter等。由我陀哥哥開始,我地一家如果天氣好,都會去公園行吓,以前對仔女未出世,李生李太成日都手拖手行由Richmond行過公園去Sunset食早餐,食完又行番過嚟。到對仔女出世後,幾乎日日都推嬰兒車去行公園晒太陽,到佢地大D就等佢地可以去行吓走吓,運動完一輪一家大細倒頭瞓幾粒鐘午睡,簡直係人生最大享受,而家我地會帶對仔女去公園scooters。

美國呢邊踏單車、scooters等小朋友大人都要有頭盔,見過有個7、8歲男仔喺公園踏單車,冇戴頭盔冇大人睇住,有車嚟個男仔唔識避幾乎俾車撞到,我同另一個家長直情想報警,邊有父母咁大意架?
好啦,講番我地1月1日去金門公園,由Fulton入去公園範圍,呢度係專俾人踏單車、scooter、skateboard嘅空地,哥哥同豬肉扒妹玩咗一陣,因為都幾多人,李生就話行出去車路度玩啦,




沒有李生的生日晚餐

好唔好彩,李太生日果日,李生要去送殯,佢好鬼緊張問我佢可唔可以去,因為要送果個係李生由細玩大朋友嘅媽媽,就係之前三藩市Cable Car遊記裏面揸cable car果位Uncle T。李太媽話係李太正日,仲要送埋上山食解穢果隻,可以唔去就唔去啦,都唔係話迷信,但生日正日真係唔係幾老嚟,之前次次呢D場合我地兩公婆都會拍拖更一齊去,但今次我決定唔去,李生當日請咗半日假,因為個儀式喺下午一點,食飯就之後五點。

到咗我生日,未夠鐘去殯儀館之前李生去Whole Foods買咗個蛋糕返屋企,因為上次62生日姑仔買果個好食,李生千叮萬囑我阿媽要點做,果陣我媽至記起係我生日,即刻去拎隻雞出嚟整,去街市買魚買燒肉,如果唔係果晚會冇好餸食。最好笑係李生同我媽係雞同鴨講,李生中文勁C,李太媽英文有限過有限公司,我媽講番出嚟笑死我。

當晚都有幾多好餸




Thursday, January 5, 2012

又炆豬肉啦!!!

生日前兩日我買咗大塊五花腩,都幾大塊下,有兩三磅,生日前果晚炆定第二晚食。今次整得甜少少,個食譜同之前有D唔同,算係試新味。




Wednesday, January 4, 2012

焗牛Roasted Beef

因為之前將聖誕大餐post上網,有人問我想學點整焗牛,原先我都冇影低相,而家只有寫個食譜出嚟,下次整再影相詳細介紹。李生今次買咗塊有骨嘅牛肉,屬於rib-eye部份,因為老爺請客,雖然係貴少少,我地都想買塊好D嘅,好彩聖誕果排超市爭生意,好多減價,呢塊牛都唔算好貴,平日大大塊靚D嘅,咁大塊要成美金百蚊。




Tuesday, January 3, 2012

自家製麵條 Homemade Noodles

買咗部pasta maker已經一個月都未開鋒,仔仔放咗兩個星期假,第二日要返學啦,又要每晚整第二日午餐俾佢,一向都係李生本多,因為哥哥係半個鬼仔,鬼咩,李生都係大半個鬼仔,除咗個樣係中國人之外,食嘢行為個性根本就係鬼。如果你問哥哥想食咩,佢一定話pizza、hotdog、salami sandwiches,豬扒妹至愛係麵麵、紅豆包,真係兩個小朋友同一個阿媽阿爸養,點解會相差咁遠?我想不如攞部pasta maker出嚟玩吓啦,佢地又有得玩(李生有嘢做,唔想兩個小朋友纏住佢),第二日又有得食。其實都好容易做,材料又簡單。



新年富貴雞(荷葉包雞)食譜,獻醜啦。

OK,雖然果兩隻富貴雞唔係整得太富貴(哈哈,今次真係獻醜啦),我都想講吓點整,大家可以參考吓。




Sunday, January 1, 2012

新年富貴雞(荷葉包雞)

網上見人整富貴雞,但網主只係講咗大概,未有食譜,於是我自己膽粗粗試整,試咗兩款做法,因為準備時間唔夠,所以未夠入味,但雞肉真係好嫩滑,個餡都好正,下次一定會再做足工夫,希望會更好味。

李太N年前去過灣仔美利堅食過果度最出名嘅叫化雞,好食到連骨都係酥嘅,D內餡仲正過食雞,真係咁多年都難忘,當年係李太媽媽移民後返港,生日時李太細路帶媽媽去食,仲要一早訂位同訂雞,成食雞三個人食唔晒,打包返屋企。

今次我想整嚟做2012年第一餐晚飯嘅主菜,但因為除夕去咗親戚屋企開party,日頭又冇時間去買料,於是就喺今日2012年1月1日去買,但帶完兩個小朋友去公園玩完再食中午飯後,已經係下午兩點幾,原本盤算時間唔夠留返第二日整,因為中間要風乾又要醃入味又要焗最少兩個鐘,但李生想整好拎一隻去俾62食,猛叫李太開始整,話會趕得到,但我地低估咗我地個老爺焗爐,其實呢排我已經覺得個焗爐有D問題,成日都要焗差不多雙倍時間至整到,今晚亦都唔例外。