Friday, December 30, 2011

第一次整油條 Chinese Crullers

李生係瘋狂地鍾意食油條,但可惜三藩市油條嘅水準真係非常不濟,遠遠不能同香港嘅油炸鬼比較:唔係唔脆唔鬆就係太油,一口咬落去就覺得係咀嚼成口油,偏偏個價錢就貴到冇人信,由美金$2.25到$3一條不等,如果香港賣白粥油炸鬼嘅移民過嚟,只要手藝好,將會不愁搵唔到錢。李太每次去餐館見到menu上有油條都會點俾李生食,或者遺傳自李生,豬扒妹同哥哥都好鍾意油條,特別係哥哥,已經去到同李生爭食嘅地步。

無意喺FB中見到有位女士教整油條,初初只係抱住積管睇吓嘅心態去睇,因為以前曾經網上搜尋過油條食譜,一大堆咩臭粉咩發酵等等已令我卻步,但呢一個食譜睇落都好簡單,材料都唔多,步驟係多少少,但唔難整,不過要隔晚搓定粉,煮嘅時間亦都唔太長。



烘鬆餅Biscuit / Scone

美國呢邊叫烘鬆餅做biscuits,初初嚟到美國去KFC,朋友話要biscuit,我話:吓,去KFC食餅乾?佢就話我知即係喺香港食嘅烘鬆餅,好多時晚餐上都會serve呢個,都好飽肚吓。呢個同英式鬆餅scone係差不多嘅食法,但scone多數都會加入其他食材例如raspberries、提子或芝士等。以下講呢個都係最基本嘅biscuit做法。

今次聖誕大餐整咗呢個,其實超市都有得賣,係一罐罐架,一定要雪入雪櫃,試過第一次買果陣冇放入雪櫃,第二日起身,個罐爛咗,個dough pop晒出嚟,嚇到我嗱嗱聲掉落垃圾桶,李生話我大鄉里出城,pop出嚟即係新鮮,食得架,我掉晒真浪費。





Wednesday, December 28, 2011

聖誕節系列之七:有冇聖誕老人?

網上同其他媽咪傾計,原來而家有好多小朋友細細個已經唔信有聖誕老人,四歲人仔話聖誕老人係嗲地媽咪,聖誕老人係商品......嘩,而家小朋友真早熟(唔好聽係老積),對於童話故事只當笑話聽。

我家少爺小姐或者係比較純(或者係鈍),佢地對聖誕老人嘅傳說深信不疑,而且有好多精彩演譯,從未想過兒童世界會這麼細緻又有童真。




平安日食午餐:Manor Coffee Shop

平安夜果日李生約咗朋友兩父女一齊食午餐,李生想去試一間叫Manor Coffee Shop嘅小餐廳,係一間懷舊美式餐廳,裝修陳設好有old school feel,連女侍應都係著傳統coffee shop嘅粉紅色連色裙加白色圍裙。





Monday, December 26, 2011

聖誕節系列之六:甜品菠蘿批 Pineapple Pie

上次感恩節蘋果批大受歡迎,因為今年聖誕99不在家,所以聖誕大餐由李生李太主理,李生特別指定要整蘋果批,但早前去groceries shopping,見到菠蘿減價,每個US$1.49,買咗兩個,我提議整菠蘿批,李生話冇問題。當姑仔話帶甜品時,李生一口拒絕,李生話佢老婆會整個批,make from scratch,語氣好自豪,即係話李太不容有失,OK,盡力啦。



聖誕節系列之五:聖誕節一家人排排坐食大餐

今年聖誕大餐由李生李太主理,因為99出了埠,家中只有62同叔仔,一般聖誕節夜會約埋姑仔一家(包括姑仔62、99同小姑)、李太父母細佬等,足足有12個大人3個小朋友,李生李太一早盤算要煮多少個菜和份量,這一餐足足準備咗一日一夜。

呢度係大部份食物,影唔到冬菇炆排骨、沙律同甜品。



Saturday, December 24, 2011

冬至晚餐

今年因為99有事去咗姑仔果度,冬至得老爺同叔仔兩個人喺屋企,我媽就叫埋佢地兩個做節,所以今年勁多餸,因為唔可以整七個餸,於是就最少要八個啦。

今晚有七個大人兩個小朋友,唉,又係九男女,唔知點解由以前開始就係成日過節開大食會都會係呢個組合,不過,只要開開心心一家人坐埋食餐飯就最緊要。




Friday, December 23, 2011

鬆化雲喱嗱曲奇 vanilla cookies

今次用咗雲喱嗱香油做咗一個好鬆化嘅曲奇,呢一款厚身少少,因為太鬆化,太薄會好易斷開,另外厚D咬落口感好好多。我都係夜晚整曲奇,但呢個都好快手整完,攤涼咗就放入存氣盒。



第121款:應節聖誕士的糖法國辮

呢一個係喺一個專講小女孩髮型嘅網誌睇到架,原網係
http://www.princesshairstyles.com/2011/12/candy-cane-french-braid-with-ribbon.html,個網主同李太一樣有個女,幫女兒梳辮係樂趣,亦係母女間相處嘅美好時光。呢次講嘅係用法國辮編法整一個士的糖(candy cane)。豬扒妹同我睇完片,佢就話要梳呢個頭,因為佢覺得而家係聖誕節,佢又收到不少同學送嘅士的糖。




聖誕節系列之四:DIY薑餅屋

聖誕節個個都整薑餅人、薑餅屋,我都想同哥哥、豬扒妹整,但呢排公私兩忙,公司已經忙到水唔得閒飲廁所唔得閒去,電話一個接一個,永遠有未完未答emails,眾多同事放假,我是留守其中一員。屋企方面又要焗曲奇、又要準備禮物、寄聖誕咭(係呀,美國呢邊已經好發達,但親朋傳統上還是會互寄聖誕咭)、plan冬至聖誕晚餐。。。雖然一個薑餅屋未必要花好多時間,但工作一整天回家,食完飯做完一切雜務已經離一對兄妹上床時間不遠,在這有限時間可以點?想到呢個DIY,都係薑餅屋,都係食得,都要落手落腳整,小朋友都會開心。


整嘅過程因為multitask幾樣嘢,唔記得影低相,只有完成品嘅相,希望睇到會估到點做啦。

Wednesday, December 21, 2011

玻璃曲奇革命第二擊 Glass Cookie Challenge 2

2011年12月14日



因為要帶去對仔女學校開聖誕聯歡會,所以預先整定粉團,但又好想試吓新買嘅果汁糖個效果係點,所以昨晚整咗少少,不過因為個粉團未雪過比較軟,所以有D星星印完之後軟咗D,放得唔係太好就少少變型。初初D硬糖唔溶,於是較大到350度F,只係溶少少,再較大到425度F焗咗4分鐘就溶晒,混色果D仲好靚tim。今晚會再焗多D,希望再做好D。


夾心曲奇二重奏:果醬曲奇、榛子醬曲奇 Cookies with Strawberry jam and Nutella filling

我以為我寫咗個食譜,原來未喎。而家只係全憑記憶想番出嚟,不過因為近來都係用同一個曲奇份量整,所以都唔係太難,所不同嘅係中間嘅料。用果醬同榛子醬係李生嘅提議,呢度要俾個credit佢先,個idea就好似我地細個食克力架沾麥芽糖咁。






Tuesday, December 20, 2011

孩子的手印

話說每日仔仔都有功課要做,老師會放於一個紙文件夾中,仔仔就放入書包帶回家,通常晚上吃完飯就是功課時間,我或李生會一對一引導仔仔做功課,為甚麼說引導?因為我們只會講解如何做,不會幫他做,例如字寫得不好,我就會擦去要他再寫,圈字母會每一粒字教他讀,同手指指著讓他跟著讀,至於會否發現和圈出特定字母是仔仔的責任,我會提他但不會指出字母所在。每一個星期五或放假前老師都會派回之前星期一至四的功課,會有評分和指出對錯。

上一個星期五,文件夾中有一大叠紙,老師沒有給予功課,但就有字母咭讓家長可以教小朋友溫習。當中有一張過了膠的咭紙,正面是仔仔之前學校拍的照片和他兩隻小手印,



真夠薑嘅薑餅心心 Gingerbread heart cookies

近來因為要準備聖誕節送禮,幾乎隔晚就開焗爐整曲奇,做完一批玻璃曲奇,我想加埋薑餅應吓節,夜晚整薑餅時先發覺冇黃薑粉、荳蔻粉同丁香粉(真係撞鬼,個廚房百無,明明一向都有存貨,就係搵唔到),於是就用真嘅薑嚟整薑餅,又因為未買薑餅人模,於是就用我嘅至愛心心模,有加咗椰絲,有加咗朱古力,都好似OK啦,雖然薑餅唔係我至愛,不過呢個味道都唔錯。

Sunday, December 18, 2011

當三藩市師奶遇上三藩市師奶

話說三藩市C9李太上星期日約咗blog友三藩市師奶一家去飲茶,李太一家果日一早去咗Food Co入貨,之後再返屋企放好D要雪嘅嘢,再去到約好嘅茶樓,三藩市師奶一家已經到咗,李生放低我、哥哥同豬扒妹就去搵位泊車,我同三藩市師奶一家約略介紹之後就上去坐低。

呢一日朝早可能冇旅行團,所以幾乎係任坐,我地揀咗一張近窗嘅大枱,因為兩家夾埋有十個人。呢個就係blog友三藩市師奶、佢個細女同三藩市先生啦。




聖誕節系列之三:DIY裝飾

李生唔鍾意放聖誕樹,因為屋企細冇地方,而且對仔女太好奇,所以即使我地有一大盒聖裝飾(Christmas ornaments)喺屋企都冇用武之地。同李生初初結婚果年同之前果年,我都係用最簡單又唔花錢嘅DIY手作佈置屋企。三藩市係凍,但聖誕節有雪嘅機會幾乎係零,所以我果兩年都整咗個以白色聖誕為題嘅裝飾,其實呢個概念係以前香港屋企同公司已經用過,我真係好鍾意出嚟個感覺,好靚又唔花費,而且整同拆都好方便。




自家製雲吞 Won Ton Soup

今晚整咗雲吞,諗住俾仔女明日做早餐,老公試過味話OK。最開心係用新鮮健康材料做,冇加味精,味道又幾好。呢個做法係用原材料整,用咗兩個不同包法整。豬扒妹八卦擔櫈仔嚟睇我做咩,我話包雲吞,佢話幫手,我話佢太細個唔識,等佢大D先啦。之後李捉咗佢同哥哥去擦牙,佢地好似豬咁喊話唔要爸爸擦牙要媽媽,因為唔鍾意爸爸擦,但我對手做緊嘢冇計啦。



當我煮好擺好位影相果陣,佢地就擦完牙,兩個都走入嚟問我做緊咩,順便投訴爸爸,話唔要爸爸幫佢地擦牙,豬扒妹見我試味又話想食,但佢已經擦咗牙,當然唔可以再食嘢,我話已經留咗D未煮嘅俾佢地明日食,而家要去瞓覺先。


Thursday, December 15, 2011

第120款:雙半法國辮公主頭

唔知大家法國辮紥得有幾純熟呢?呢一款都係以法國辮做基礎,唔駛紥晒成個頭,只係將前面同兩鬢部份頭髮編起,後面係呈現一個大V字,唔好心邪,唔係deep V露背,三藩市咁凍要抵冷貪瀟湘只會係攞苦嚟辛,頭髮紥個deep V就絕對冇問題啦。





Wednesday, December 14, 2011

第119款:簡易拼髮蛇辮之3

2011年12月5日

哈哈,好耐冇寫幫豬扒妹紥頭髮,唔好以為我執咗呢一part,改做寫食譜,點捨得唔要呢一部份至得?一來呢個係我開始寫blog嘅動力,二來要改就會改埋個blog名,而家你仲見到《編織髮髻辮》就即係你冇去錯地方啦,三來豬扒妹頭髮長咗好多,唔紥都唔見得人,點可能會摺咗呢part喎。只係呢排多咗整嘢食,想留個紀錄,第二時想搵番個食譜都容易D,過時過節年尾流流又多咗嘢搞,所以就少咗兼顧紥辮呢部份。但我冇偷懶架,我有照影低D新髮型,只係要坐低睇番再整理吓至寫得出嚟見人。

呢一款同之前#107果款類似,都係用多條橡皮筋,以拼髮嘅方法將頭髮紥起。今次呢個同#107唔同嘅係方向,#107由少頭髮(左邊)開始,而條辮最後係喺右耳側邊;但今次#109呢個係由右邊出發,初初先束起前面少量頭髮,之後就續次加入右邊頭嘅頭髮,每次都將新加入頭髮拼合以橡皮筋束成一條新辮,如此類推直至去到右耳上方頭髮完全束起,之後就由左邊頭拉入頭髮,唔駛拉得位置太過,我今次係順住條辮方向打斜至左邊髮腳位置作結,加入頭髮嘅pattern係由左右兩邊同時加入,即係話每加入一份頭髮就會好似個V字打側咁,呢個就係同#107唔同嘅地方,而#107嘅pattern係幾乎垂直分開一份份。


聖誕節系列之二:聖誕樹 Christmas Trees

李生李太屋企太細,放唔落聖誕樹,但邊個小朋友會唔鍾意見到聖誕樹?所以就襯出街就帶豬扒妹同哥哥去睇吓不同嘅聖誕樹。

呢棵聖誕樹好大好高,傳統裝飾嘅聖誕波波同聖誕吊飾,又紅又金,幾層樓高,好靚架,哥哥對個金色波波好有興趣。想去睇下可以去Stonestown個mall,喺正個入口就會見到,仲有可以同聖誕老人影相,不過要俾錢都幾貴架,今次我地冇影到。



Friday, December 9, 2011

玻璃曲奇革命第一擊 Glass Cookie Challenge

今晚又整咗玻璃曲奇,老公投訴上次D硬糖咬崩牙,
佢想可以曲奇連中間嘅糖一齊食,於是叫我試下軟糖、棉花糖咁,
試咗幾個組合,軟糖唔溶,棉花糖溶但唔會化開,今次因為試,
所以就較細咗個溫度,續5分鐘拎出嚟睇,見到唔係好多掂,
即時加咗上次D硬糖補飛,出嚟個曲奇真係正到冇朋友,
但中間嘅軟糖超唔好食,因為太痴牙,




Sunday, December 4, 2011

玻璃曲奇 Glass Cookies


呢個玻璃曲奇喺網上見到好耐,但因為個食譜其中有D步驟我唔係太肯定(或者係我蠢啦),一直都唔係好敢試。但其中最大難題居然係搵硬糖,真係講都冇人信,莫講話原食譜講嘅霍士Fox's果汁糖,就算係硬糖都唔易搵,成間Walgreens居然得一種硬糖,想睇吓有冇多D顏色同口味,Sorry...得一千零一種,就係呢個蜜糖味,但有樣嘢好就係寫明係冇防腐劑、Natural flavors,仲係Gluten free,雖然我地屋企冇人唔食得gluten,都係一件好事,因為李太有朋友唔食得gluten,遲D聖誕送禮就多一個選擇。

中間糖嘅部份真係透明架,所以至叫玻璃曲奇。




Friday, December 2, 2011

甜絲絲蕃薯撻 Sweet Potato Tarts

我跟本台灣甜品書整個撻皮,點知個份量唔知係印錯定點,個dough完全唔得,濕到雪完一晚都roll唔到,加極手粉都仲係痴住個roller,心知照整都係唔得,把心一橫自己嚟,由咁睇係油份太多,粉嘅份量唔夠,於是我就續少續少加粉,足足加咗10安士粉個dough至叫做OK,於是我再雪多一日至整。但因為加多咗粉,個dough出嚟足足夠兩次用,一於今晚整住一半dough先,另一半留番明日整,或者到時整曲奇,等哥哥同豬扒妹可以又玩印模曲奇,今晚因為要試份量,我唔俾得佢地兩個幫手,哥哥聽到冇得幫手即時喊,真係有眼淚果隻,令佢傷心,媽媽真係過意唔去,但因為又係「夜媽媽」整餅,實在冇時間可以俾佢慢慢玩。

等聽日啦囝囝,OK?




粟米片雞翼 Baked Chicken Wings with Cornflakes

又係星期二KFC特價日,李生揸車經過問我買唔買,我話喉嚨未好番晒唔食住,而且KFC都唔係咁健康,不如自己整啦,用粟米片可以整出類似嘅,李生唔信,話如果我整佢就第二日帶去做午餐。當晚係11月22日,要整幾十隻燒賣俾囡囡第二日帶去學校嘅Thanksgiving party,去到成11點先可以開爐整呢個雞翼。但我講咗唔想賴帳,唔想李生第二日冇嘢拎去食,於是就做「夜媽媽」半夜焗雞翼啦。



大事回顧2011

剛見到Yahoo! Blog我和你的大事回顧2011徵文比賽,獎品都頗豐富,姑且不理比賽、獎品,當下我想2011年有那一件事是我最開心的呢?這些年來看到很多天災人禍,慶幸自己一家都還可以,因此常常心懷感恩,對身邊事物都用較正面的角度去面對,要數開心事真的一大堆:




Tuesday, November 29, 2011

再來一個醃菜:紅白蘿蔔蘋果

之前醃過一個黃芽白彩虹椒,李生可以當飯咁食,佢係一個人拎住個玻璃樽,揸住對筷子夾,好明顯係想一個人食晒成樽啦!李太爸都食得好開心,佢只係密密夾冇出聲,第二日出唐人埠就買咗個中型白蘿蔔,李太媽話李太爸想食醃蘿蔔,屋企又仲有紅蘿蔔,於是就整呢個紅白蘿蔔醃蘋果啦。蘋果係上次網友Maggie Kitchen話加蘋果同梨做醃菜會好食,橫豎屋企剛剛又買咗蘋果,試吓無碍啫。




雜錦涼拌

喺美國呢度生活,尤其是呢幾年經濟唔好,主婦都要精打細算。喺美國去餐館食飯食剩餸菜,個個都會打包拎走做第二日嘅午餐,冇人會笑你孤寒失禮,反而剩晒唔打包,一係就係難食,一係就係浪費。 

因為又做醃菜,今日有D嘢剩又唔想就咁掉咗去,所以就整咗呢個涼拌菜,由5種食料組成,略加少少心思就成為一味前菜或者下酒菜啦,因為係有唔同顏色,所以就叫做雜錦涼拌啦。 






Monday, November 28, 2011

寫在焗蘋果批之後:讓孩子參與

在感恩節當日,廚房一早就天昏地暗,因為爸爸媽媽趕製當晚帶到Uncle R家中的甜品,一個朱古力榛子醬蛋糕和一個蘋果批,雖然不算十分大的製作,但加上煮早餐和午餐給兩個小娃兒吃,每當豬扒妹和哥哥走入廚房,還未開口的時候,爸爸和媽媽已經請他們走出去,不要在廚房裏礙事,更莫說要爸媽陪他們玩耍了。他們著實不明白為甚麼不可以參與,爸媽做的都不是太難的功夫,其實他們都可以做得到,看到四隻小眼裏的失望,李太都覺得於心不忍,盤算著如果讓兩個小傢伙覺得沒有被拒之門外呢?

當李太用星星曲奇模在批皮印出一個個小星子,豬扒妹走進廚房來看到,她語帶驚奇的說:「Wow,星星呀,好美啊媽媽。」(最近,豬扒妹都叫李太作媽媽不是媽咪,不知她的小腦袋又在動甚麼腦筋呢?)李太把批皮放上蘋果批上面,裁出多餘的批皮,看著那些剩餘的批皮和星星,李太靈光一閃,就對豬扒妹說:「你想印星星嗎?」豬扒妹很興奮的說好,李太於是示範了如果拿餅模、如果對位置、如果按下去、用多少力,最後如果用一隻小手指去反扣出星星放在桌面上。




第118款:法國辮淑女頭

呢個係為一個網友諗嘅,因為佢話想學法國辮,但頭髮散同薄,而且反手梳法國辮會攰,所以就諗起整一個較為簡易嘅法國辮款式。首先,係架,梳法國辮好,荷蘭辮好,反轉手織係會好攰架,李太都會,但因為熟習咗,我梳得快就冇咁辛苦,有時攰就會一隻手抓實頭髮,另一手鬆吓再繼續織。



Friday, November 25, 2011

講講感恩節之五:蘋果批下篇 - 批餡及烘焗部份 Apple Pie - how to make filling & bake



講到個蘋果批餡料同烘焗就係成個蘋果批嘅成功關鍵,當你已經雪咗個批皮4小時以上,由雪櫃拎番出嚟,睇落去好似好硬咁,但其實唔係架,我用個切麵粉用嘅膠刀非常容易切開,切開咗個麵團兩份之後,將一份壓平放入焗盤底成為批底。

批皮做法

Thursday, November 24, 2011

講講感恩節之四:蘋果批上篇 - 批皮 Apple Pie - Pie Crust

蘋果批就好似火雞一樣,似乎係感恩節不可或缺嘅甜品,因為我地一家去李生表哥屋企過節,而表哥指定我地帶蘋果批做甜品,表哥嘅媽媽(即係李生姑媽)最拿手就係蘋果批,我都有幸食過一次,老人家喺4年前癌症過世,咁好嘅蘋果批就此失傳,表嫂學到姑媽另一拿手菜糯米飯,豬扒妹今日居然要再添,可想而知有幾好食。


講番整蘋果批,李生李太拍拖時第一次去李生屋企過聖誕節就係整咗個蘋果批帶去,中間咁多年我都冇正式再整過,檸檬批呀、雜果撻、芝士餅反而有整過好多次。今次呢個蘋果批係用一個傳統蘋果批食譜做嘅。先講做批皮,因為要雪最少4個小時,最好係隔夜,所以我係感恩節之前果晚搓定批皮。


材料:(做出兩塊約9吋批皮)

中筋粉   2杯半(20安士=565g)
鹽     半茶匙
牛油      1杯(8安士=227g)雪硬
冷水    半杯(118ml)

Wednesday, November 23, 2011

講講感恩節之三:焗火雞 Baked Turkey

一講起感恩節就想起火雞,感恩節咭係火雞做圖案,派對裝飾又有火雞,連入去Google個homepage都係一隻火雞做icon,可想而知火雞幾咁深入民心呢。今年係李生李太第一年整火雞,因為今年哥哥入咗小學,學校有Thanksgiving Feast,叫家長donate火雞,我地就試吓整唔整到啦。

話說近年經濟唔好,好多人都樣樣慳錢,即使新年感恩節都想駛少D錢,對於可以慳一蚊幾毫都會一窩蜂咁即時jump on it。超市只要買滿$25就可以優惠價買特定大細火雞一隻,李生李太就揀咗一隻十幾磅嘅火雞,其實焗真係唔難,但花時間花精力。


再嚟燒賣:菊花燒賣 Chrysanthemum Siu Mai

再整燒賣係因為豬扒妹學校開Thanksgiving party,我地想到拎一D點心去學校俾小朋友食,原來想整埋雞翼或雞槌,但校長會拎火雞應節,所以叫李生李太只帶點心就好啦。 

 

今次整加入咗冬菇,同埋李太想包大隻少少,加多咗餡嘅如果用上次果種包法會包得唔實,隻燒賣好似肉酸咗,咁成日喺酒樓見到人地包果D,塊皮好少有厚摺紋,於是試咗幾隻後,就「發現」咗呢個包法,好好玩又好似朵花咁,因為有八九塊花瓣,我就姑且叫呢個做菊花燒賣啦,其實叫太陽花都似架,但中國點心似乎同菊花襯D。OK,ready?


Tuesday, November 22, 2011

兩公婆夾手夾腳整火雞

今晚李生李太夾手夾腳焗咗隻火雞,呢次係李生整八成,李太只係幫手兩成,因為李生打聽到個食譜,想自己霸住整晒,但隻火雞實在太重啦,佢冇可能一隻拎起隻熱辣辣嘅雞,另一隻手倒起D油,而且事前又冇諗清楚有咩嘢要準備,所以冇一隻合適嘅焗盤,屋企冇嘅錫紙盤唔多夠大,倒油就仲辛苦。結果係要李太幫手,由李生逗起隻雞,李太去倒油,但因為廚房細,兩個人企都唔知點樣企去就位好,李太俾個焗盤辣到,搞到打瀉碗油,李生就搞錯咗老抽當生抽,於是個gravy係甜甜地又深色,本來李太想出聲話等我整個gravy,但李生話佢問咗人點整,咁算啦,男人總愛認叻,由得佢自己玩吓啦。



明日我要帶哥哥返學去學校廚房幫手,到時一個返工袋,一個書包,加埋一隻十幾磅火雞,兩罐cranberry source,一盤gravy,而家我諗起就有D驚,點拎好呢?唯有叫婆婆幫手,拎架手推車仔幫手,唔係到時裙拉褲甩就樣衰。
好期待仔仔明日嘅Thanksgiving Feast,到時一定要記得帶相機至得。

Monday, November 21, 2011

三藩市Cable Car遊記

2011年9月18日

李生有個好朋友係Cable Car司機,今日就帶豬扒妹同哥哥去坐鐺鐺車。點解Cable Car會叫鐺鐺車?因為Cable Car行車時司機會打鐘通知其他行人或行車,Cable Car將會通過,因為三藩市有地區路面比較狹窄,轉彎位有時視野有限,好容易睇唔到對頭車,就好似大霧時汽車都會不時響號嘅原理差不多;另外以前老華僑英文有限,好多時都會為日常生活不同事物人物安個別名,鐺鐺車係其中一個。

 


Friday, November 18, 2011

第117款:雙四手辮拼馬尾

2011年10月8日

之前有講過點樣紥四手辮,唔好以為係紙上理論,真係紥到出嚟架,不過豬扒妹D頭髮唔係厚,又唔算好長,要紥四手辮馬尾只會係變成一條豬尾,所以就退而求其次,幫佢紥咗呢個兩條四手辮仔加馬尾。


Thursday, November 17, 2011

第116款:簡易側馬尾變款

呢個同簡易公主頭變款同樣梳法,所不同嘅係呢個前面睇已經同普通髮型不同,而之前果一個公主頭變款前面睇見唔到太多變化,另外,呢個髮型比較公主頭活潑D。



第115款:簡易公主頭變化款

今次講一個好簡單嘅公主頭髮型,冇咩難度,而且要梳都好快手,唔駛5分鐘就梳好。




Tuesday, November 15, 2011

第114款:荷蘭辮前陰側髮髻

呢排掛住寫煮嘢食嘅Blog,唔好誤會,我都係要日日幫豬扒妹紥辮架,唔會俾佢披頭散髮返學,我自己就一時時啦,而家反而係急切要搵時間染髮就真,因為D白頭髮又鬼鬼祟祟咁走出嚟,唔紥起都唔覺,一抓起頭髮梳辮就無所頓形架啦,有時就係咁索性唔紥起,但其實我係好手痕架,由細都大都鍾意玩頭髮,唔知你明唔明,真係一得閒就拎起頭髮左鬢下右橋下咁,我唔係變態架,我所識嘅長頭髮女生都係成日咁做,呢D嘢男生係唔明架啦。

OK,今日講嘅係一個髮髻髮型,梳嘅時候要先分成兩部份,第一個部份係一條前陰鬢辮,第二個部份係一個簡單髮髻。



首先由右邊約九一分界部份開始,用荷蘭辮嘅方式將前陰部份梳一條鬢辮,每織一組就由前方加入頭髮,織嘅時候要向後織,直至去到耳仔對上,就再以三手辮方式織到尾,以橡皮筋綁好。


餘下頭髮就全部拉到頭嘅左邊,於約耳仔後面位置束成一個馬尾髮圈,即馬尾去到最後一圈時,唔全條馬尾拉出,只拉出一半,成為髮髻嘅基礎,突出嘅髮尾部份,以同一方向(順時針或逆時針方向都可以)略為扭一扭實,然後繞住個髮圈,同時可以遮掩埋條橡皮筋,以髮夾固定位置。

第二個步驟就係將條鬢辮拉過去繞住個髮髻,以髮夾固定,一來令個髮髻更實淨,二來同時亦將條鬢辮嘅尾部跟橡皮筋掩藏入個髮髻入面。

後面睇係咁嘅。



Monday, November 14, 2011

醋漬醃菜彩虹椒 Pickled mixed veggies & peppers

咁啱李生買咗個細細嘅紹菜(又叫黃芽白),佢叫我切嚟煲雜菜湯,我見都用唔晒,不如留D整個醃菜啦。事緣係星期四去學校活動,之後去晚飯,果間餐廳個前菜係醋漬紹菜,爽脆又合酸度,問個老闆點整,佢話只係用D醋加糖醃幾日,但我覺得應該有D秘訣,不過人家做生意,當然唔會隨便講俾人聽,我心癢想試吓整唔整到人家咁好,今次機會嚟啦,因為齋整紹菜好寡,所以就攞咗婆婆幾個彩虹椒,所謂彩虹椒係細細隻嘅顏色細椒,唔辣不特止,炒起嚟仲好甜好爽,地中海菜都成日有用到,呢排賣得好平,$0.99一大袋非常抵食,一袋食幾餐。




講講感恩節之一:傳統假期 Thanksgiving Holiday

萬聖節後不到一個月就到感恩節,感恩節流行於美加,但美國和加拿大感恩節的日期不一樣,加拿大是每年10月的第二個星期一,正正是美國的Columbus Day哥倫布日,美國的感恩節則是每年11月的第4個星期四,為甚麼兩者感恩節會有不同?那就要追溯到發現到新大陸時代。

感恩節源於歐洲人和本土北美洲人慶祝收獲季節結束,而所不同是加拿大慶祝的感恩節,同時也慶祝發現新大陸,所以和美國的哥倫布日同時。美國這一邊的感恩節則源於1961年Massachusetts的Plymouth慶祝節,因為當年農作物收成甚豐,之後的殖民地總統以此為例舉辦慶祝會。不過,由於感恩節和農作物收獲季節掛鉤,而北美幅員遼闊,每一個地區的感恩節都會有分別,就如加拿大位於較北面,冬天來臨較早,所以感恩節會早到10月,而美國位處較南邊,收獲季節就到11月才完結。

Friday, November 11, 2011

親子豆腐忌廉芝士撻 Tofu Cream Cheese Tarts

一向都聽說用豆腐整忌廉芝士批係清淡口味,成日都想試但一直都冇機會,前兩日買咗盒豆腐放喺雪櫃,今日係退伍軍人日放假,但由早落雨落到黑,都冇得帶對仔女出外玩。下午見得閒,哥哥去咗婆婆度玩,得豬扒妹同李太喺屋企,我問豬扒妹想做咩,佢話整糕糕,其實整任何嘢佢都係當整糕糕架啦;於是就決定整個豆腐忌廉芝士餅,但屋企冇合適可以整批嘅baking pan,於是就改整撻啦。