Friday, March 30, 2012

第128款:The Hunger Game系列之2 雙法國辮

講完主角Katniss,今次講呢款係主角妹妹Primrose嘅髮型,第一集Primrose出場嘅時間好少,只有開場最初幾場戲,原本被選中做第12區代表嘅係Primrose,姊姊不捨12歲妹妹去參賽,因為以妹妹體能同性格,妹妹好可能會中途死去,於是Katniss自動請纓代替妹妹,戲中飾演妹妹Primrose嘅係Willow Shields,今年6月至係12歲,同戲中角色年紀相差不遠,Primrose性格同姊姊不同,樣貌打扮都較為柔弱,但Primrose內心同姊姊一樣善良熱情。



今次都係由豬扒妹示範:




第127款:The Hunger Game系列之1打斜荷蘭辮

大家有冇聽過The Hunger Game,呢套戲美國一上畫已經有破紀錄票房,而家累積原房有一億五千二百萬,真係好利害,好多人將The Hunger Game同The Twilight Saga相比,因為都係一個女主角加兩個男主角,後者紅咗做Bella嘅Kristen Stewart,佢仲同戲中飾演Edward嘅Robert Pattison戲假情真。兩者所唔同嘅係The Twilight Saga好明顯係愛情故事,而The Hunger Game暫時都會係一套關於掙扎生存嘅故事,著墨重點不在女主角嘅感情生活上,而是那一個殘酷嘅生存遊戲。飾演女主角Katniss嘅Jennifer Lawrence只有廿一歲,上一年就態Winter Bone被提名奧斯卡,真正來頭不少,亦証明係好戲之人,雖然不是大美人,但宣傳The Hunger Game活動上打扮每有佳作。

呢一套戲中無論主角配角都令人留下印象。主角Katniss有幾款髮型好值得參考......





呢個係戰鬥時穿著皮衣手執弓箭時梳嘅,其實我好耐之前都有紥過類似,不過我紥係由上偏左織向下偏右,而片中女主角呢一個就係多過45度角打斜由左織向右。

今次由豬扒妹示範:




Thursday, March 29, 2012

為小朋友做菜之6:鬆軟厚身煎班戟 Fluffy Pancake

呢排有人講煎班戟pancake,李生一向都係用pancake mix,佢話咁易D,而且用啱果隻好好味又夠鬆,所以一直都係由李生整pancake。呢幾日兩個小朋友病口淡淡,佢地扭計要食pancake,點知去到一間我地成日去嘅餐廳咁啱兩日都休息(呢邊餐館通常都係休一個周日,點知呢間咁把炮休星期二三),唯有返屋企自己整啦。李生話佢咁啱買咗pancake mix,我話不如試下我上網搵到一個BK會員教嘅5條1份量啦,即係麵粉1杯(250ml)、糖1湯匙、牛奶1杯(250ml)、蛋1隻同泡打粉1茶匙,將以上所有乾料拌勻,蛋加入牛奶拌勻,再將牛奶續少加入乾料中,靜置30分鐘開始煎熟。係就係好容易,但唔好意思,真係唔好食,可能係我地要求高,個班戟唔鬆冇味又唔夠香。我自己少少失望,李生指出係冇牛油味,我覺得可以加少少雲呢嗱油會香D。真正食譜分享如下,呢個至係我地鍾意嘅班戟, 想知道點解我會話鬆軟厚身,請留意做法細節。




Monday, March 26, 2012

網上買鞋

網購喺美國好普遍,李太嚟咗美國之後都買唔少,一來真係慳返時間去搵去買,因為有時零售都唔係間間舖都有同一個貨品,就算有都未必會齊碼,有時網上商店又方便又會搵到心頭好,不過買鞋呢......李太都衰過,碼數唔足,買咗試完要退,蝕埋郵費。但我發現買靴嘅問題較少,只要買時買大少少,唔好買高跟鞋或loafers,因為我對腳比較厚同闊,所以要買剛好合腳嘅高跟鞋都係要親身試好D,反而買boots就可以用郵購。今次6pm免郵費,而且好多靴都減到十幾蚊一對,真係忍唔到手要執返幾對,因為我而家有D鞋已經著到差不多爛,呢次仲搵到幾件平衫同一個袋。




Thursday, March 22, 2012

為小朋友做菜之5:焗雞塊Baked Chicken Nuggets

有朋友就上次炸雞柳問可唔可以同焗嘅方法,因為炸對小朋友嚟講熱氣,但佢小朋友好鍾意食麥記嘅麥樂雞,所以希望有個可以望落似但有益D嘅雞塊整法。其實係有架,甚至比上次炸雞柳更好味,用嘅材料有少許唔同,唔駛蛋唔要麵粉,保留麵包糠,加入芝士,唔知大家估到點整未呢?今次因為雞胸肉冇減價,只有大雞脾(Leg Quarter)減價,所以我就買咗雞脾起肉嚟整,所以雞塊型狀冇咁一致,但就嫩滑少許。




Saturday, March 17, 2012

寫給心肝寶貝的情書



真的有點捨不得,寶貝兒子這麼快就長大了很多,幾個月後就升一年級了,回想懷他的那幾個月真的驚險重重,最初的幾個月,小兒子讓媽媽在沒有孕吐,沒有太多不適的情況下享受了一段短短的女皇生活,去到七個多月,他就開始和媽媽搞對抗了,少許的流啡就讓媽媽提早放產假,每天呆在家中,不是吃就是睡,偶而出一次街就換來第二三天的大出血,住醫院四次兒子才乖乖出世,當中真不是一般感受,每次更大量更多的出血真的讓爸媽都嚇得魂不附體,生怕兒子太早出來會生長得不夠健康,最後兒子都是天生好奇,明明預產期在金牛座時期,最後兒子還是要做個雙魚寶寶。

醫院那幾天也不是說笑,爸媽是成熟年紀但照顧初生嬰孩絕對不熟手,差不多讓兒子嗆到奶窒息,幸好有護士及時發現,之後的黃疸也不是說笑,人家初生兒一個月後會增磅,我的孩子增得不夠,餵人奶又困難重重,只怪當時不知道BK,找不到前輩可以指教,半人奶孩子到三個月大就開始發濕疹,這真是一個折磨人的難題,就是幾年後的今日,爸媽還是跟兒子一同對抗濕疹,我們的喜憂很多時都和兒子身上濕疹的好壞掛鉤。

另一個重要問題就是由三歲開始為兒子去找評估,之後爭取不同訓練,到今日總算是塵埃落定,知道兒子需要那幾方面的幫助,但可是長期作戰,因為那不是一個病吃藥休息之後會康復,我們不知道有沒有好的一天,不知道要多久孩子才可以不必我們的幫助,但為人父母有生之年都會對孩子掛心,他們就似父母心頭一塊肉,不可切割,一丁點的動靜都會讓父母憂心忡忡。今天看著兒子為他慶生,就好像是自己這幾年來所做的種種派的一份成績表。

作為父母,我絕對不是滿分,我亦不求完美,因為沒有可能做到,正如我不會要求兒子完美,不是說得豁達,我不需要兒子拿滿分。我也是凡夫俗子,我也如天下母親一樣,望子成龍望好成鳳,但明知他們不是龍鳳,又何必畫虎不成反類犬呢?我只想他們將來可以養活自己,不必憂柴憂米,不做壞人,不做寄生蟲,可以開開心心生活,做個頂天立地的人就於願足矣。說到底這也不是一個小心願,現今世代複雜,要謀生已比從前難,加上兒子先天學習方面比人差,我對他的要求真的有了調整。我的兒子不是比人愚蠢,反而某些方面他比人學得更快,只是我們要找到合適的方法去教他。在這一方面,媽媽有點慚愧,因為媽媽不是一個勤力的人,有時周末只想呆一下,所以我沒有其他媽媽那樣積極去推動兒子學習,他周末都只是去上游泳課和跟爸媽去買東西,如果生在香港,我的孩子一定給比了下去,幸好在這裏有較多自由空間讓他可以有時表現得孩子一點,淘氣一點。

至於對孩子的愛,我和爸爸都是百份百的,我們沒有像很多父母一樣怨天悠人,兒子的不及人不代表他不可愛,反而我在兒子的身上看到很多小朋友都沒有的同情心和對人的關心,老師形容那是一顆黃金的心(golden heart),兒子最愛幫人,對人對小動物都有愛心,但他有時不懂表達或表達錯誤,這是我們當前要重點處理的問題。

在最近一年,我家可是幸運的,兒子遇到一個好老師,在學習上老師幫助了他很多,我們一同發掘了兒子很多長處短處,一起討論用不同方法去教導兒子,雖然日後的路都很漫長,但只要見到進步就已是好好的強心針。

我真的要感謝丈夫在我身邊,不但支持一家人,還事事以家為先,在他身上我看到堅定不移的信念和正面的態度。我也要感謝兒子,在他身上我看到希望和愛,無論有任何事發生,兒子總是把媽媽掛在心上,一句的mommy I love you so much 比千言萬語更觸動媽媽的心。

今天看著兒子,做媽媽真的很矛盾,一方面千萬個不願意看著他長大,生怕一天他會離家獨立,另一方面又怕他要依靠爸媽不能獨立,因為爸媽不能一生都照顧他,我們總會比他先走。就如千萬個媽媽一樣,我在有生之年,都會為兒子遮風擋雨,隨時為他張開兩臂,只要他想,我都會擁他入懷,以所有的愛注滿這個家,家的大門時刻都會為兒子打開,只要他想家就可以回來倒頭大睡,在媽媽心中,他時刻都是我心肝寶貝。



我兒,祝生日快樂,媽媽上。



基本髮型編法12:簡易曲髮之3

呢個係豬扒妹版本......




Friday, March 16, 2012

基本髮型編法12:簡易曲髮之2

上一個係紥一條大馬尾嘅效果,咁想D鬈曲度仔細D同細D就可以紥兩條孖辮法國辮或荷蘭辮,瞓醒一晚就大功告成。







基本髮型編法12:簡易曲髮之1

之前用過襪去鬈頭髮,簡單得嚟效果又好,今次嘅更方便,唔駛任何道具,或者講只要一個橡皮筋就完成,唯一要求係要識紥法國辮或荷蘭辮。




第126款:小甜心髮式之10開心Open Heart

唔覺唔覺,小甜心髮式已經有10款啦,今次係反撲歸真,查實係懶,完全唔駛鬢辮,只係用一個topsy tail做少少變化,其實唔用都得,只係有少少過意唔去,好似有D欺場咁。



Sunday, March 11, 2012

為小朋友做菜之4:炸雞柳 Chicken Fingers

其實我對仔女同一般小朋友一樣,都鍾意食炸雞柳炸雞翼呢D咁熱氣嘅嘢,但李太一來覺得冇益,另一方面又好唔鍾意炸嘢,因為用得多油之餘,油煙又大,成個廚房炸完油膩晒,不過無意中見到一個cooking video講炸雞柳,賣點係健康,咁我又睇下點啦,其中一樣好關鍵嘅材料係個日式麵包糠,咁啱有人去Trader Joe's買嘢時見到有得賣,李生話咁去整嚟試下啦,於是就等到Smart & Final雞胸減價就買咗一pack雞胸嚟試整。




仔仔的生日會之4:一口米通 One-Bite Rice Crispies

上一次整米通,因為份量換算有網友有疑問,所以今次再整特登影低個盒嘅份量,大家可以清楚知道啦。



原來計重量,唔係以量杯做準,一盒花生米有成12安士(340克),





我今次用咗約半盒多少少,但又未到2/3盒,加一包棉花糖16安士(453g)。



放涼之後就切成正方形,就係一口米通,方便小朋友食,期間有家長問我點整,我都一一解釋。因為整咗好多,食唔晒嘅我地拎咗去夜晚家人好友聚會,原來我奶奶非常鍾意食,幾乎將淨低嘅都一一消滅。今次係加咗提子同太陽花籽,好好咬口。

做法請參考之前嘅米通食譜

仔仔的生日會之3:甘筍杯蛋糕Carrot Cupcakes

因為今次係去公園開生日會,驚帶個蛋糕去切會麻煩,所以我就諗不如整cupcake會方便D,而且因為我都整幾款食物,加埋外賣pizza(因為要熱辣辣,我自己焗做唔到),所以決定整mini cupcake,甘荀健康加埋提子或朱古力簡直係無敵,不過我一向都唔鍾意加frosting,因為小朋友食太多糖真係唔得架。




仔仔的生日會之2:蝴蝶酥 Palmiers

其實呢個蝴蝶酥整得唔好,因為壓油出咗事,有D牛油包唔實漏咗出嚟,中途應該要雪一雪個皮再摺,但因為整果陣已經係夜晚,我冇等雪皮就摺,所以就出現個皮包唔實牛油溶爆皮,因為只係側邊爆皮,所以我都姑且焗出嚟睇下點。在這就當係煮食筆記,記低今次失敗之處,食係好食,不過個質地唔靚,唔係一層層酥皮,小朋友都唔計較呢樣,仲好俾面咁不夠30分鐘廿個蝴蝶酥全部清晒。



仔仔的生日會之1:脆脆朱古力粒曲奇 Chocolate Chip Cookies

李生成日上網睇食譜,呢日咁啱睇到個video示範,話係完美朱古力曲奇,好奇睇下有幾完美先,原來係sugar曲奇加入朱古力粒,出嚟口感好脆好香。做sugar曲奇最麻煩就係點打糖同牛油,因為我屋企冇電動mixer,我打蛋白都係一個手動egg whisk,打到手抽筋至會企身,所以sugar cookies我都幾抗拒。見到video示範一個方法係超簡單(冇話唔駛時間唔辛苦呀吓),冇電動mixer都可以做到,出到嚟效果仲好好,唔駛用李生放雪櫃嘅方法,D曲奇都好脆,我星期四整星期六食都好脆好新鮮。六十塊曲奇不消一陣就報銷三份二。去生日會嘅家長都讚好食,小朋友更加唔客氣,食完一塊又一塊,如果唔係食咗pizza先,個個淨食曲奇都似。




Monday, March 5, 2012

為李生試整嘅無錫肉排 WuXi Pork Rib

李生去我地成日去嘅一間餐館食過無錫骨之後,深深愛上,其實李生都好長情,只要鍾意,日日食都唔厭,希望佢對住人都係一樣啦,暫時都係嘅,哈哈~所以抵佢有好嘢食嘅。李太整呢個餸要兩日,因為要醃過夜,第二日至炆。





為小朋友做菜之3:豆腐肉餅金魚 Tofu Goldfish

呢個其實好簡單,亦都好有營養,最適合發育中小朋友,只花少少時間就可以令碟餸好得意,小朋友望見會有肯下著嘅意慾,咁就成功咗一半啦。