全家病之旅

話說三個星期前，豬扒妹突然發燒，成身都滾，果日係星期六游完水去食午飯，因為李生冇幫佢吹乾頭髮（因為男洗手間冇吹髮器），可能係咁冷一冷，於是大傷風，唔只發燒，仲要有咳有鼻涕，星期六晚已經俾退燒藥食都止唔到，星期日佢辛苦都喊，不過呢邊唔同香港，發燒都係食退燒藥，所以如果食完退到燒，睇唔睇醫生都冇分別。星期日李生去groceries shopping，帶咗哥哥出去，果朝都幾凍，返到嚟哥哥見到妹妹病，我叫哥哥唔好搞佢啦，妹妹唔舒服，哥哥就去攞杯水俾妹妹飲。

之後李生去pick up一D嘢，哥哥話佢唔去啦，佢要陪妹妹，李生就話由得佢啦，出面都好凍。豬扒妹辛苦到喊，佢話心口痛痛，冇他嘅，係D痰塞住，佢又細個唔識點吐痰，所以就辛苦，又唔識講，我叫佢不如去瞓覺覺啦，瞓醒冇咁辛苦，豬扒妹話要瞓我同爸爸張床，我由得佢，通常病都會嗲D，哥哥即刻幫妹妹攞被攞公仔，佢仲話要陪妹妹瞓，我初初唔係好想，不過都由得佢，佢冇幾可唔蝦個妹架，就由得佢啦，佢都唔瞓晏覺嘅，一陣就會自己走番出嚟。點知唔係，哥哥同豬扒妹都瞓著，我有D驚啦，因為哥哥同我一樣，冇事冇幹好少去瞓晏覺，我直覺佢有唔妥，果然係呀，我摸一摸佢個頭同身都係好暖架，係發燒果種暖，結果兩隻小魔怪瞓咗兩三個鐘至起身，一起身就好似死蛇爛鱔咁撻咗喺度，又主動要著多件衫。於是就係咁開始我地全家病之旅啦。

點解話全家病之旅？因為由豬扒妹開始到哥哥，到公公到李生到婆婆到李太，我地全家冇一悻免，個個都病，其實小朋友病，大人要照顧惹到病都好正常，小朋友唔識咋病，當佢好攰好想瞓，唔走嚟走去玩，唔大聲叫唔打交，十居其久都係病，李生特登請咗一個星期假照顧佢地，李太因為公司忙到死只可以放到三日。

但第二個星期就輪到李太病，係發燒發冷咳到跌咗個肺出嚟，個鼻又塞到不得了，把聲性感過夢露果隻，但都係一樣，得閒死唔得閒病，醫生話係氣管炎休息三日，第四日都仲係病到見暈都要返工，一返工係未停過天昏地暗日月無光，去到周末以為可以休息，點知就輪到花粉敏感，見到咁多花開都知大件事，但我一向都冇事，所以唔意會到係呢樣嘢，直至有晚見暈心口痛，又咳又喉嚨乾，7點半就上床，夜晚12點半起咗身瞓唔到，去到3點半再半夢半醒捱到6點9起身，第二日去睇醫生，醫生就話絕對係花粉敏感，呢樣嘢唔駛有歷史，突如其來，好多人移民後七八年至有，因為身體已經調節咗，開始對呢D嘢過敏，正如有人突然對某D食物敏感，明明上個月仲食緊，呢個月就唔食得，最傷心係呢D嘢冇得講，只有辛苦就食藥，冇咁易斷尾，只有增強抵抗力，令身體對過敏冇咁大反應就係。李生算幾硬撐，唔舒服咗三兩日就OK，唔舒服佢會去瞓，佢就係咁瞓走晒D箘。