為小朋友做菜之9：菠蘿多蛋班戟 Pineapple Pancake

話說有次睇電視，有人用藍苺整班戟，而且落好多蛋，個食譜同一般班戟唔同，初初覺得幾得意，但望落真係唔知究竟會係咩味，心思思搵日試下。今次咁啱有菠蘿，想下整菠蘿味都好喎，出嚟有菠蘿嘅香鮮同酸甜味。

材料：
菠蘿    約1/3個
雞蛋    4隻（大隻）
中筋粉 6至8大湯匙(All purpose flour)
砂糖    1湯匙
牛油    適量（用嚟煎班戟）

做法：
1）將新鮮菠蘿去皮起釘，切成四份，中間硬心部份切除唔要，略浸鹽水，瀝乾之後切成塊，放入攪拌機中。

2）4隻雞蛋去殼、砂糖加入攪拌機中，開whip功能略打約15至20秒，至雞蛋黃同雞蛋白打勻，即使有菠蘿碎或蓉都可以。

3）將菠蘿蛋糊倒出置大碗中，篩入一湯匙半麵粉，攪拌至冇粉粒。
4）將餘下麵粉篩入大兜中，把已加入一湯匙半麵粉之蛋糊續少分次加入麵粉中，拌至完全溶合冇粉粒。

5）平底鑊放入約半湯匙牛油，倒入4湯匙蛋糊，中火將班戟一面煎至金黃色，再反轉面煎另一面至熟。

小貼士：
1）必須瀝乾菠蘿水份，否則菠蘿出水，個蛋糊比例就稀咗；我用新鮮菠蘿雪一晚整，如果用罐頭菠蘿，必須小心隔去水份（糖水）。
2）麵粉份量可以加減，睇你想塊班戟有幾實，但我試過呢個份量最少都要有6湯匙麵粉，否則就唔會煎得成形。
3）我自己覺得就咁食唔加任何糖漿都好好味，呢個會適合配微酸味果醬或糖漿同忌廉。
4）唔用菠蘿，用其他醬果類都好味，我都試過士多啤梨，相比呢個更受小朋友歡迎。
後記：
其實呢個似係蛋餅多過傳統班戟，工夫時間同傳統班戟都差不多，呢個有更多蛋香味，我鍾意冇加泡打粉，只係柔軟度同之前整嘅傳統班戟差少少，即係唔可以加砂糖、花生碎、椰絲摺埋做我鍾意嘅港式夾餅。