三色沙律 Mixed Color Salad

其實唔只三樣料，不過生菜舖底表面睇唔到，自從李生減磅計劃成功幫佢減咗11磅之後，佢又開始放縱，我問佢磅數有冇反彈，佢𠵱𠵱哦哦話冇上過磅唔知，鬼信佢咩，中間去過咁多次醫生度覆診，次次都會磅重量血壓呢D例牌嘢，又點會話冇上磅唔知自己有冇重返，我估係佢唔敢講就真。今日因為有菠蘿喺屋企，李生對之前李生加咗菠蘿嘅沙律念念不忘，叫李太整個有菠蘿嘅沙律，我就打開雪櫃睇下有咩可以配搭啦。

材料：
菠蘿 半個
生菜 1個
車厘茄    1小盒
西芹 4瓣
芫茜 1小束（約十數條）

調味：
鹽 少許
黑胡椒碎    少許
橄欖油    2湯匙
菠蘿汁    2湯匙
蜜糖 1湯匙

做法：
1）菠蘿切去皮起釘，切開4份去硬芯，將半個菠蘿切細塊後，用鹽水浸一浸，撈起後瀝乾，將菠蘿汁2湯匙留用。
2）生菜洗淨橫切成塊，瀝乾水份放入大碗或盤中。
3）西芹洗淨斜切成約半吋厚一塊，瀝乾水份後待用。
4）車厘茄用少許鹽水沖洗後涎乾待用。
5）芫茜切碎待用。
6）將調味攪勻後，倒入生菜中拌勻。
7）將生菜放餐盒底，舖上車厘茄、西芹及菠蘿喺面，中間灑上芫茜碎，食時將調味汁料撈勻即可。

小貼士：
1）菠蘿要浸過鹽水至會唔鞋口同鮮甜。
2）做沙律材料最好先瀝乾或隔清水份，唔係好易搞到水汪汪，雪完更是口味不佳。
3）呢個份量約做4個午餐盒份。