為小朋友做菜之7：牛肉餡餅

有睇開呢度嘅朋友或多或少知道我對仔女係草食生物，尤其是我個大仔，佢真係一見到肉就唔肯食，咁李太就要成日諗計仔啦。呢次整嘅係牛肉餡餅，當然唔係只有小朋友鍾意，連大人都鍾意。我最愛清真牛肉館嘅牛肉餡餅，又多汁又大個，諗起都想即刻飛返香港食，但而家機票咁貴，香港駛費又貴，真係要儲夠彈藥至可以成行，而家就自己做住D老番頂住下先。

餅皮材料：
中筋粉         約10安士（300克）
滾水 10安士（300ml）
凍水 2安士（60ml）

餡肉材料：
切碎椰菜    1杯（約8安士=227克）
牛肉 8安士(227克）
蔥 1條（切細粒）

餡肉調味：
鹽 半茶匙
豉油 1湯匙
麻油 半湯匙
胡椒粉    少許
蒜泥 一粒

餅皮做法：
1）將中筋粉放於大碗中做成一個粉牆，中間注入滾水，以筷子將水同粉拌勻。

2）續少加入凍水攪拌，以手和成一個粉糰。

3）將粉糰置室溫中約半小時。

肉餡做法：
1）將椰菜切絲再切碎，牛肉刴碎或買牛絞肉，加入碎椰菜、蔥粒攪勻。

2）將調味加入再拌勻。

如何包餡餅?
1）桌上及麵棍先灑上中筋粉，將麵糰取出放桌上，揉成長條形，再分切成10份。
2）每份用麵棍壓力薄身圓形餅皮。

3）包入約2湯匙肉餡於中間。

4）由側邊抽起餅皮壓入中間，再將中間餅皮扭實，再將餅皮壓回中間封口。

5）反轉收口向下放於已灑上中筋粉之碟上，略為壓扁。

6）平底鑊燒熱放少許油，收口向下放入鑊中，中火煎至餅底金黃色。

7）反轉餡餅加水入鑊中至餅一半高，蓋上鑊蓋，煮至水份收乾即可上碟。

小貼士：
1）餅皮濕度要留意，不必完全加晒凍水，要睇個粉糰會唔會過濕或過乾，過濕就加多少許粉於桌上搓成糰，過乾就加多少少水，呢次我冇加晒所有凍水。
2）包時皮要薄，但如果過薄個皮煎果陣易穿。
3）煎餡餅時要每個都留少許空間，因為一黏埋一齊，分開時好易穿皮。
4）煎起熱食最正，但要小心燙咀。
5）用易潔鑊煎就可以唔駛落幾多油，加上牛肉出油，煮好怕油太多可以放吸油紙上一陣。

後記：
唔鍾意食肉嘅哥哥一煮好就食咗兩個，豬扒妹食咗一個半，其實果陣都就食飯，等到開飯，哥哥又率先再食多一個，同時佢有食飯同食菜，冇耐佢又想夾多一個，我要阻止佢再食，一來熱氣，二來我驚佢唔知飽食得太多拉肚子，佢初初唔肯，後來食完飯後就食蘋果，我估佢飽就冇再話要食，但就叫李太留番剩底果兩個俾佢聽日食。主婦煮餸最開心莫過於家人欣賞，就算唔講出口讚，但密密食唔停口已經係好好嘅鼓勵啦。雖然同我至愛清真牛肉館嘅牛肉餅差好多，但頂一頂「相思」之苦還是可以嘅。有網友話俾李太知喺清真館偷師見到個肉餡有加水，所以出嚟係好多肉汁，等我下次都試下先。