失敗蟹肉餅變身成好味蟹肉蛋餅

用罐頭蟹肉整咗個蟹肉餅，但因為落得唔夠蛋黃醬同不覺意落得太多鹽，結果個蟹肉餅好散同鹹，所以就發揮慳家師奶精神，將蟹肉餅搖身變成咗蟹肉蛋餅，只可以話個味道更有層次，個賣相見得下人，當然冇滿分啦，點可以咁快就滿足？學海無涯，烹飪呢一科我有排學都未畢業，不過呢次我會喺循環再用呢一個項目上俾自己滿分，因為唔駛益咗個垃圾桶。

材料：
蟹肉　　   1罐 
椰菜絲      1杯（8安士）隨喜好加減

雞蛋         4至5隻（大隻4隻細隻5隻，要夠包晒D料）

芫茜切碎   約2湯匙

調味：

鹽           半茶匙

胡椒粉     少許

蛋黃醬     2湯匙（Mayonnaise）

糖           約1/4茶匙

蒜頭        1粒

做法：

1）椰菜切細絲瀝乾，芫茜切碎，蒜頭刴成蓉。

2）雞蛋置碗中，加入鹽、胡椒粉、蒜蓉及芫茜拌勻。

3）蟹肉拌入蛋黃醬搞勻。

4）燒熱平底鑊，下一點油，先放椰菜絲，加糖炒軟。

5）蟹肉拌入椰菜絲中略炒散。

6）倒雞蛋入鑊中，移動平底鑊，等蛋漿平均分佈同包住所有材料，較中火將蛋餅底部煎至熟。

7）用一隻大碟將蛋餅倒出，再將蛋餅倒扣回鑊，將另一面蛋餅都煎至熟。

8）倒出蛋餅切開即可食用。

小貼士：

1）椰菜絲有一種苦瀝味，所以炒時加入少許糖平衡味道。
2）因為我之前個失敗蟹肉餅已加調味，所以我煮時冇再加調味，只是將所有調味列出於食譜內。
3）呢個蛋餅唔係一般炒蛋咁薄身，因為係厚身西式蛋餅，要煎到中間都熟就唔可以太猛火，要較中火慢慢煎。
4）因為塊餅厚同大，所以好難可以反轉面，我就用一隻碟幫手，再倒扣，咁就唔會整爛塊蛋餅。

後記：呢個就係失敗嘅蟹肉餅，就咁睇樣都係食得嘅，但就係一時錯手落多咗鹽，同埋配料不夠，所以散散地，幸好而家變成更正蛋餅。