豬扒妹幫手摺衫

話說又係某個星期六，李生帶咗哥哥去游水，豬扒妹同李太喺屋企，豬扒妹扭計，唔記得佢係想出街定去婆婆屋企定係想整D咩，李太因為仲有嘢做唔去得住（其中一樣係有一大堆衫要摺），就隨口叫豬扒妹去幫手摺衫，話摺好晒D衫我地先可以出去。其實我都只係講吓，根本唔期望豬扒妹真係會識摺衫，一個4歲小妹妹，識自己著衫、自己食飯、自己上廁所...... 仲想點？可能李太相比好多港媽，真係要求低。

豬扒妹聽完我嘅條件，應咗句：OK mommy 就走咗入房。
過咗10分鐘，冇聲冇動靜，我於是問豬扒妹：你係唔係攪嘢呀。
豬扒妹應：No。我再問：咁你做緊咩呀？豬扒妹：我摺衫。

我入房睇吓，豬扒妹係坐喺堆衫上面玩緊，
我就話：你又話摺衫？都冇嘅，你玩緊D衫呀係咪？豬扒妹：No，我有摺呀。李太：邊度有，都冇摺到。豬扒妹：有呀。李太：Where? 係邊度？都睇唔到有摺好咗嘅（床上面只有一埋未摺嘅衫）
豬扒妹：In the drawer.李太：你摺好放入去個櫃桶度？豬扒妹：Yes。
李太有D半信半疑，打開個櫃桶，真係有幾件唔係我摺嘅衫，因為摺嘅手勢唔同，一睇就知唔係我經手。我望下，諗住應該要再摺。但點知打開嚟睇，其實係好好好好OK架，一個4歲小朋友摺到咁，我係好驚訝（可能好多小朋友都會做到，但我真係唔要求自己個女咁細個會識，而且我都冇點教過佢架，佢只係睇過我摺）。除咗前後掉轉摺之外，每一個部位都係齊整架，仲摺得好過李生。

於是，我就放低手頭做緊嘅其他嘢，一於教豬扒妹摺衫，其實係一邊玩一邊摺。豬扒妹唔覺得係做家務（佢都唔知咩係家務，呢個中文詞咁深，LOL），佢覺得好玩，又鍾意我贊佢叻女幫到手。

摺完衫而家輪到摺褲，其實摺褲係容易D，只要對摺再對摺就得啦，呢日豬扒妹嘅衫有9成係佢自己摺，除咗D底底同襪唔識摺外，連放入櫃桶都係佢自己做，仲幫手放哥哥果D衫褲tim。

其實摺衫係好好嘅肌肉同眼手配合訓練，哥哥都好鍾意幫手，但似乎豬扒妹喺呢方面較優勝，我希望可以從小訓練佢做個可以自己照顧自己嘅人，千萬唔好做個飯來都唔張口、衣來都唔伸手嘅公主病病人。

P.S. 李太真係開心死，豬扒妹好快就可以成為一個好好嘅小助手。