Little Beijing 福恩園

呢個係兩三個星期前冇意中搵到嘅一間餐館，當日我同李生兩個人去，原本想去我地去開嘅一間食麵，但咁啱喺呢一間餐館門口有個停車位，諗住停低架車之後過對面馬路。因為呢間餐館我地成日見到但從未入去試過，我就八卦睇吓貼喺門口個餐牌，原來唔貴架，我同李生講不如試吓呢一間啦，都唔貴，好過食嚟食去都係同一間。我地喺門口望下有冇人，當時係約六點半，裏面有一檯兩個人，入到去先知，原來果檯客係果老闆同個伙計坐喺度，一個用laptop上緊網，一個摘緊豆角，即時有D驚，會唔會係唔好食，所以冇客，我地居然包場......坐落去到大約7點，陸續有人入嚟，有三兩個後生仔，又有一家四口。

我地點咗蔥油餅、麻辣牛肚同雞翼，樣樣都好得，埋單US$20有找，不得了，一定要推介，喺Facebook講完，結果有個朋友第二日就去食，佢話好正。我同李生就決定要帶豬扒妹同哥哥去食，佢地應該會鍾意。

呢日我地叫多D嘢，首先係甜豆漿，大大一碗，熱騰騰嘅，好味又抵，冇記錯係US$2都唔駛，哥哥飲咗3大碗，豬扒妹手慢都兩碗。（著紫色衫呢個係李太，影相嘅係小小攝影師小李生）

再加一個豬肉蒸鮫，皮係少少厚嘅片北方式鮫子，平日兩個小朋友都唔多食，今次哥哥食咗3隻，豬扒妹都兩隻，味道係中上水準，而且價錢唔貴。

之後係蔥油餅，兩個小朋友都食咗兩至三塊，我朋友話佢個6歲嘅個女基本上係一個人食晒成碟，可想而知幾得呢。

再encore一次麻辣牛肚，李生嘅心水，同其他好多餐館不同嘅係，呢度嘅牛肚切成薄片，唔係厚厚一大塊，所以就更入味，真係食到唔停得口，係辣但就好有口感，食完都冇話成日飲水。

之後係雪菜肉絲湯麵，唔好睇好似好簡單，除咗雪菜之外，碗裏面仲有菠菜，中和番唔會太醎，肉絲切得幼幼，D湯恰到好處唔濃味，我地都食咗好多，最後係淨低咗一小碗打包。

一家四口最後係食淨少少湯麵同三片蔥油餅，因為實在太飽，唔想硬要清晒檯，呢兩樣leftover成為李太星期一嘅午餐。埋單啦，真係唔信，計埋貼士都係US$30有找。

想去試吓嘅朋友，呢間餐館叫Little Beijing，中文係福恩園，聽講因為老闆係基督徒，所以改咗個有宗教色彩嘅名。

地址係：1316 Noriega Street, San Francisco (cross street 20th Avenue) Mon-Thu, Sun 11:30am-9:30pm, Fri-Sat 11:30am-10:00pm

Yelp.com review 有104個評論，3粒半星，算係唔錯。

P.S. 我估D菜冇加味精，因為食完唔口喝，冇打爛茶煲。