第96款：蝴蝶結加荷蘭辮（2級難度）10-15分鐘
2011年9月3日
絲帶綁成嘅蝴蝶結英文係叫Bow，豬扒妹係典型嘅貪靚女仔，佢鍾意D嘢都好女仔，其中一樣係蝴蝶結。呢日係星期六，又係同往日一樣，爸爸帶咗哥哥去游水，李太就同豬扒妹去街，去街前當然要紥個靚靚頭啦。
我問豬扒妹想紥個咩頭，豬扒妹話要一個Bow喺個頭，吓？又玩媽咪？我即刻諗起Lady GaGa，我個表情係咁嘅
好啦，睇吓可以點整先......之前都上網睇過有人整similar，不過自己整都係第一次，而且豬扒妹頭髮又軟又散，冇Volume冇力，幾難搞吓。不過，世事冇絕對，即管試吓啦。
首先係將右邊前面側面頭髮梳起束成一條辮，要紥得緊D挺D，呢個就係蝴蝶結嘅兩邊。將束頭髮分成兩份，分別用橡皮筋束成半個蝴蝶結（即係蝴蝶結嘅一邊wing），方法係用橡皮筋束成一條，去到最後一圈唔好拉晒所有頭髮出嚟，而係只拉最多一半，形成一個髮圈，就係蝴蝶結嘅一邊，兩個各自半邊蝴蝶結打交叉，做成左右各一個髮型圈，可以再用橡皮筋綁埋一齊，蝴蝶結已經成型，但位置未係好穩，而且唔靚。
我將其餘頭髮由左邊鬢邊開始以荷蘭辮編法，每織一組就由下面加頭髮，織成一條辮，當加晒所有頭髮就以三手辮編到尾。之後就係到裝飾之前果個蝴蝶結，將條荷蘭辮繞過個蝴蝶結嘅中間，再繞過蝴蝶結底部，將D橡皮筋完全遮蓋，用一個髮夾固定，並且順便做埋裝飾，我用呢個咁啱又係一個蝴蝶結髮夾，所以係大Bow加細Bow。
呢個蝴蝶結髮型唔係複雜，但因為豬扒妹頭髮軟而冇力，比較難梳出個型，要靠條荷蘭辮幫手固定位置。
呢日我帶咗豬扒妹去圖書館，中途有個公園，佢要入去玩，又sir滑梯，又打韆鞦，又爬上爬落，個髮型都有少少散，但叫做成幾個鐘個蝴蝶結都冇甩，算係咁啦。
豬扒妹幾時返嚟玩下呀?
ReplyDelete[版主回覆09/23/2011 11:32:32]我都想呀，年年都想，但李生好怕坐長途機，上次一上機就領嘢，落機就要去買藥，你知佢幾大份，CX機位我坐都辛苦，何況係佢。下年輪到豬扒妹派位入小學，雖然照計可以入番哥哥呢間，但都唔敢太腦定，要等派位時間表出咗先敢諗啦，其實我都好想返香港採吓你地，我好掛住香港嘅朋友，仲想見吓我細佬個女友（我淨係見過相咋）。
您那邊好似hk咁要派位~va不用按地區
ReplyDelete[版主回覆10/14/2011 12:42:53]係呀，係得我住果個City係咁，其他加州城市唔駛派位，即使住正學校隔離都未必派到，有第二語言果D（中文、西班牙文）爭崩頭，有好多白人都眼紅話點解咁多中國人小朋友派去雙語學校，大佬派咗你個小朋友去你都唔識幫佢做功課啦。