哥哥愛妹妹

話說因為星期六晚玩夜咗，豬扒妹同哥哥好去到10點幾先瞓，
點知兩個星期日朝早未夠7點就起身（平日返學搵鑊剷剷都唔肯起身），
所以佢地係唔夠瞓，但星期日有得去街又唔會肯瞓晏覺，
婆婆講下午抱住豬扒妹果陣，佢已經好攰想合埋眼，但因為哥哥叫佢玩，
豬扒妹又唔瞓啦。

去到6點幾食晚飯，豬扒妹就嚟料啦，開始扭計唔肯自己食，
跟住仲話想瞓覺，咁李太就心軟啦 ：好啦，等媽媽餵完就快快趣去擦牙瞓啦，
豬肉扒妹話：OK，Mommy。

食完飯，豬扒好又掛住玩唔肯去瞓，但佢雙眼出賣咗佢，佢雙眼已經撐到半開，
我就好似以前抱BB咁抱豬扒妹，佢好乖咁俾我抱，我就叫哥哥攞張蝴蝶被俾妹妹，
哥哥應咗好之後就金霸王電兔上身去攞，之後仲話：「我幫妹妹蓋被。」
注意：哥哥以上果段係講中文架。
哥哥幫豬扒妹蓋完被之後，仲話：「I give her a kiss.」
真係喺豬扒妹額頭錫咗一啖。

之後仲有下文，哥哥一隻手拍吓豬扒妹：「妹妹，你乖乖地瞓呀」
哥哥又攞咗個音樂盒燈出嚟話：「妹妹想listen to music」，
一邊上發條，一邊拎住個音樂盒燈坐喺我隔離，我就抱住豬扒妹，
呢個情景就好似去返豬扒妹出世冇耐果陣，我一邊拍豬扒妹瞓，
哥哥一邊傍住我身邊自己揸住奶樽食奶咁。

不過時光飛逝，豬扒妹仲有兩個幾星期就4歲，哥哥仲有兩個星期就返幼稚園啦。