家家福Shanghai House

今日一家同老爺去食中午飯，因為奶奶去咗第二個州探姑仔，老爺一個喺屋企，李生通常都會一星期去探老爺一兩次，帶佢出去食飯，等佢見吓兩個孫，今日我地去試一間我地未去過嘅餐館，事緣係李生有個朋友介紹話嘢好食又唔係貴，叫我地去試吓，好過食嚟食去都係果幾間。

呢間餐館叫家家福Shanghai House，係食上海菜架，我地三個大人兩個細路叫咗6樣嘢：

首先係食上海菜必食嘅小籠包，一籠有10隻，細細隻但做到皮薄有湯汁，味道幾好，我地好快食晒成籠，最估到係唔鍾意食肉嘅小李生都食咗兩三個，仲係連肉食晒，豬扒妹就好乞人憎咁淨係食皮，係呀，冇錯，係淨食皮，平日去飲茶，我地會叫兩籠蝦餃，每籠四個蝦餃佢地食晒D皮，我同李生就幫佢地食晒D蝦，聽講有個婆婆有幾個孫都係咁，每次要叫十幾籠蝦餃，食唔晒嘅蝦肉個婆婆嘅女婿會打包晒返去做蝦炒蛋或炒飯。

講番呢個小籠包，我最欣賞嘅係果小碟薑絲醋，平日碟醋多數係細細碟得幾條薑絲，有D薑絲切得好粗又得幾條，家家福嘅唔同，好多薑絲，又切得好幼細，我最後食晒所有剩低嘅薑絲。

再嚟蔥油餅，比較之前小沈陽同食開嘅飽餃店細碟，味道OK，但唔夠脆口新鮮，唔夠嚼頭。

我叫小李生影相，佢就拎起塊蔥油餅影。

兩大杯甜豆漿，係小李生同豬扒妹至愛，唔太甜但李生話飲落有粉，唔知係咪粉開，但我覺得唔係好似，因為飲到有層豆奶或其他奶嘅奶膜，不過算啦，個幾銀錢有咁大杯都係叫抵架啦。（注意：呢杯小李生已經飲咗一D，上檯時係差少少就滿架。）

之後係老爺叫嘅雲吞菜湯麵，望落去好靚仔吓，我冇試味，老爺就話好就好食，但份量細咗D，一般有5隻雲吞，呢度得4隻，果兩條白菜好新鮮，麵都好食但就係少咗D，個碗大但就淺，所以望落去好似好大碗，但其實份量唔夠咁多。

再上一個雪菜肉絲炒年糕，比起另外兩間餐館份量係少D，年糕切得較薄，但呢個就有竹筍絲，豬扒妹問我係咪瓜瓜。味道係幾好味，只係太多筍絲唔夠多肉絲同雪菜。呢個得番半碟，因為已經分咗兩碗仔俾小李生同豬扒妹。

最後係麻辣牛筋，初初上碟以為好多吓，點知原來下面墊咗好多青瓜絲，都叫幾辣，但對於李太李生食得辣嘅人來講，呢個係碎料，驚喜係D青瓜配牛筋同辣汁好相配，青瓜吸咗辣汁好好味，係牛筋細塊同薄。

成餐飯豬扒妹成日上上落落張椅，不過佢唔敢走來走去，反而小李生又去廁所又走過嚟我度同我講嘢，又要玩我部相機，總之唔算係乖嘅一次上餐館經驗。

今次因為份量唔大，我地5個人清晒所有嘢，總共US$36蚊連稅，都好抵食。但講返服務就好唔得吓，首先Waitress阿姐冇俾餐牌我地，係我帶小李生去完洗手間，返去座位前"順手牽羊" 攞嘅。之後我地叫埋單等咗好耐，個阿姐做呢樣做果樣都唔拎張單過嚟，李生忍唔住再叫多一次，阿姐先遞張單過我地，所以李生只係俾咗好少tips，佢話咁嘅服務唔值得俾太多。李生朋友之前都講，呢位阿姐都好大枝嘢，去多幾次當佢認得你，服務就會唔同，但第一次個經驗唔好，仲有幾多人會再俾多幾次機會你先？今時今日經濟唔好，做生意真的不易，唔係幾明侍應阿姐點諗？

想去試吓嘅，地址係3641 Balboa Street (夾37th同38th Avenue), San Francisco, CA 94121。