雅虎Blog新版意見調查

雅虎Blog新版意見調查 http://blog.yahoo.com/yblog_hk/articles/51206


有不滿、有讚都應該提出，我用咗新版一輪，對於新版有不滿亦有驚喜，我唔會一面倒踩，但希望雅虎Blog可以聽取意見，從善如流，新版未完全測試好未穩定就推出，實則趕客，眼見真係有朋友去咗Sinablog，有D係因為之前填咗BB出生日期，而家未滿13歲，升級無從，點解唔出個方案幫吓呢批家長？物係死，人係生，或者出個方法俾佢地開個新Blog，又可以好方便咁將舊Blog內容搬入去，好多其他Blog都有，好似Sinablog就可以連結好幾個Blog sites，雖然只係搬文字，一切格式相片都唔可以直接搬，但起碼Blog友咁多年心血唔會冇晒。

大家鬧之餘，去以上連結雅虎小編輯個Blog，填一份意見調查，雖然我唔知結果係唔係如大家所願，但唔填就少一把聲音，第時有改冇改都冇得怪人地唔聽自己講，因為自己都冇講，而且冇人鍾意俾人鬧，所以希望大家俾意見中肯D，要彈就彈，值得讚就讚。

P.S. 先此聲明，小妹只係一個Blog用戶，同Yahoo絕冇關係，冇親朋喺Yahoo做，冇收錢講嘢，冇利益衝突，於Yahoo呢度Blog齡只有兩個月，冇大量訂閱，冇人幫我出書，冇贊助商...... 只係講出我自己感受，我覺得有個免費平台俾我識多D朋友，分享我同囡囡囝囝生活上嘅點點滴滴，同時向不同網友偷師、閒聊，實為萬幸，我惜福惜緣，希望網上相識一場，雖然萍水相逢，大家開開心心又一日。