第一次整髮夾

今日依然放假接送小李生去返新學校，中間時間百無聊賴，原本想執吓屋，但又唔知由邊度開始（其實係一句：懶），之後諗起之前應承過豬扒妹整髮夾俾佢，但一直買晒料都未開工，不如就試吓枝熱溶槍得唔得啦。

我所有嘢都係喺ebay buy it now買嘅：絲帶70碼（有淨色、有圖案、有花點）、髮夾50個、蝴蝶40隻有7個色、粉紅色絲帶花仔50粒、熱溶槍，總共$25.71。

開工整咗9隻髮夾，準備俾豬扒妹同學校同學仔，因為遲D生日會要準備回禮禮物。第一次用熱溶槍，初初都有D驚，因為見過有人熱傷手指，但我呢枝只係入門班貨色，唔係太熱，但最唔好係會漏，不過粗粗地用住先。

第一次整唔係完美，D花式配搭得唔係幾好，我俾自己70分，估唔到有朋友問我可唔可以同我買，有個仲問可唔可以免費紥埋頭髮，哈哈，估唔到會有市場，意外意外。