中式肉丸炆雜菜 Chinese meatballs mixed vegetable stew

其實呢個我叫山寨版獅子頭，點解會有呢個菜？又係拜李生所賜，因為食過某至愛餐館嘅獅子頭，搞到李生念念不忘，而呢一個係李太打天才波下嘅創作，所以唔可以同真正嘅獅子頭比較，勉為其難叫做山寨版獅子頭，出嚟效果係湯汁同雜菜好正，但個獅子頭（肉丸）70分，因為唔夠肉汁同鬆化。不過呢個只係第一次整，既然李生鍾意食獅子頭，李太一定會整到滿意為止，照顧好家人嘅胃係一個小女人主婦嘅成就。

肉丸材料：
豬肉 1磅
椰菜 1/4個
芫茜 適量
洋蔥 1/4個
薑    4大片

肉丸醃料：
蒜頭 3粒
鹽    半茶匙
豉油 1湯匙
水    2湯匙
麻油 1茶匙
蛋    1隻
胡椒粉   少許

配料：
紅蘿蔔 1條
西芹    4大瓣
洋蔥    半個
椰菜 1/4個

湯汁配料：
豉汁 2湯匙
老抽 1湯匙
鹽    半茶匙
糖    1茶匙
麻油 1茶匙
水    適量玫
瑰露酒 1湯匙

肉丸做法：
1）豬肉刴碎或用絞碎豬肉。
2）洋蔥去皮切細粒，椰菜洗淨瀝乾切碎，加入豬肉中。
3）芫茜切碎，薑片刴碎拌入豬肉中。
4）蒜頭拍爛刴碎成蒜泥，除雞蛋外，將其他醃料拌入肉中。

5）以手撻肉至起膠，再加入雞蛋拌勻，靜置約15分鐘。

6）鑊中加少許油，抓一把豬肉搓成約3吋直徑肉丸，放入鑊中將整個肉丸表面都煎成金黃色，中間不需要熟，撈起肉丸放一旁待再回鑊。

配料湯汁做法：
1）紅蘿蔔橫切約半吋厚片，西芹刨去絲後斜切3/4吋方塊，洋蔥去皮切細粒，椰菜洗淨瀝乾切細絲。

2）下少許油爆香洋蔥，再加入椰菜、西芹同紅蘿蔔，略炒至軟身。

3）下湯汁配料，水加至剛掩過配料為止，中火煮10分鐘。

4）將肉丸加入湯汁雜菜中，再炆約10分鐘至肉熟就可以收火上碟。

小貼士：
1）肉丸若先炸一炸就可以較好保存肉汁，因為李太怕開火炸嘢一大鑊油，所以改用煎，肉丸本身肉汁唔夠，肉質略為乾。
2）蔬菜我只係隨意加入屋企現有嘅，其他例如菇類或瓜類都可以考慮。
3）加入蠔油及片糖應會更對味，但因為囝囝對蠔油同濃味嘢過敏，唔想佢食到有孖膶腸咀，所以我盡量都唔會落蠔油或太多調味料。若你加蠔油同片糖，就可省去食譜中嘅糖份。
4）做肉丸嘅豬肉要瘦中有肥，全瘦肉想滑都難。
5）食譜中材料同調味都可以因應口味改動，呢個只係李太初稿，以後必會嘗試不同組合。

後記：
因為都整咗幾大份量，後來食唔晒嘅肉丸同湯汁配菜就被整成麵條嘅配料：將肉丸切細加入湯汁同雜菜，淋上煮好嘅麵條上面，麵條吸收咗湯汁，成為好入味嘅肉丸雜菜會麵，李生話好食到不得了，可惜囝囝不會欣賞，最後由李生李太KO晒。