第128款：The Hunger Game系列之2 雙法國辮

講完主角Katniss，今次講呢款係主角妹妹Primrose嘅髮型，第一集Primrose出場嘅時間好少，只有開場最初幾場戲，原本被選中做第12區代表嘅係Primrose，姊姊不捨12歲妹妹去參賽，因為以妹妹體能同性格，妹妹好可能會中途死去，於是Katniss自動請纓代替妹妹，戲中飾演妹妹Primrose嘅係Willow Shields，今年6月至係12歲，同戲中角色年紀相差不遠，Primrose性格同姊姊不同，樣貌打扮都較為柔弱，但Primrose內心同姊姊一樣善良熱情。

今次都係由豬扒妹示範：

說穿了，呢款係雙法國辮，亦即以法國辮編法紥成嘅孖辮。首先將頭髮分成左右兩邊，每邊都由前面一小束頭髮開始，每鬢一組就由左右兩邊加入頭髮，特別要小心紥到耳朵對上及耳後位置時，要小心紥緊，而且紥時要注意條辮嘅方向，唔好求求其其左抽右拉，否則條就唔直唔靚。當一邊頭嘅頭髮都加晒入條辮之後，餘下頭髮就以三手辮續編至尾束好。如是者兩邊頭髮分別梳成兩條法國辮。