為小朋友做菜之3：豆腐肉餅金魚 Tofu Goldfish

呢個其實好簡單，亦都好有營養，最適合發育中小朋友，只花少少時間就可以令碟餸好得意，小朋友望見會有肯下著嘅意慾，咁就成功咗一半啦。

材料：（約做20尾金魚）
瘦豬肉 1磅
軟豆腐 1磚
粟米 20粒
豆角 適量

醃料：
鹽 少許
美極 1茶匙
麻油 1茶匙
蠔油 1湯匙

做法：
1）瘦肉刴碎成免治肉，加入醃料拌勻醃30分鐘。
2）豆腐壓爛加入肉中拌勻。

3）將肉放入湯匙中略壓成金魚身型，反扣放碟中。
4）將一粒粟米放肉的一端當金魚眼。
5）豆角撕去頭尾及硬邊，打斜切成半吋長，三段斜放肉的另一端作為金魚尾，再加一小段豆角於粟米粒及豆角中間，作為魚鰭。

6）鑊中燒滾一鑊水，水滾放入金魚大火蒸8分鐘，以牙籤拮入，抽出冇肉黏上或血水流出即可取出碟子。
7）將碟中肉汁回鑊煮滾，加入少許生粉水埋獻，淋上金魚餅上即可上碟。

小貼士：
1）豆腐加入肉中蒸會出水，肉汁可以留作煮獻汁，亦都可以用來煮菜或瓜增加鮮味。
2）豆腐選軟身豆腐或絹豆腐軟適合，因為軟易混合於肉中。
3）若小朋友愛食魚，亦可以魚肉代替豬肉，醃時加入少許白胡椒粉可去腥味。
4）豆角可以用荷蘭豆代替，粟米亦可以青豆或紅蘿蔔粒代替。

後記：
同場加映煎豆腐肉餅及肉汁炒豆角，都同樣可口，賣相冇咁得意，但就較為香口，有時間不妨做多一個式樣俾小朋友選擇。