為小朋友做菜之5：焗雞塊Baked Chicken Nuggets

有朋友就上次炸雞柳問可唔可以同焗嘅方法，因為炸對小朋友嚟講熱氣，但佢小朋友好鍾意食麥記嘅麥樂雞，所以希望有個可以望落似但有益D嘅雞塊整法。其實係有架，甚至比上次炸雞柳更好味，用嘅材料有少許唔同，唔駛蛋唔要麵粉，保留麵包糠，加入芝士，唔知大家估到點整未呢？今次因為雞胸肉冇減價，只有大雞脾（Leg Quarter）減價，所以我就買咗雞脾起肉嚟整，所以雞塊型狀冇咁一致，但就嫩滑少許。




材料：
大雞脾             兩隻
鹽                   少許
麵粉糠（幼身)   3湯匙
芝士粉             3至4湯匙（Parmesan Cheese）
肉桂粉             半茶匙
胡椒粉             半茶匙
月季葉碎          半茶匙
牛油或橄欖油    3湯匙（牛油先熱溶）

做法：
1）將雞脾去骨去皮抹乾身後切成細塊。

2）焗爐預熱400度F（204度C）。
3）將麵包糠、芝士粉、肉桂粉、胡椒碎、月季葉碎拌勻置一個大碗中。

4）將雞肉沾上牛油或橄欖油，不必要太多太厚。

5）將已沾油之雞肉放入麵包糠粉中，沾滿粉之後夾起，拍走多餘麵包糠粉。

6）將雞肉排上已塗油的焗盤上，或用一張免油墊置於盤中。
7）放入焗爐先焗15分鐘，將雞肉反轉再多焗10分鐘，用竹籤拮入抽出冇肉沾上或流血水即可。

同場加映：鹽燒雞背及雞皮

將切出的雞背同雞皮洗淨抹乾，掃上少許橄欖油，灑上鹽和胡椒碎，400度F（204度C）焗約30至40分鐘，中間要反轉一兩次，確保不會一邊太熟一邊唔熟，出嚟嘅鹽燒雞皮係卜卜脆架，最啱切細塊做下酒菜。
小貼士：
1）不必加鹽，因為芝士粉本身已夠醎味，再加就太多啦。
2）雞脾去骨時要盡量按骨頭同筋嘅位置去骨，唔建議用刀劈，因為會有碎骨，到時小朋友食就唔安全啦。
3）我分兩次用咗牛油同橄欖油試整，牛油的確係香好多同脆好多，但橄欖油就健康D。
4）麵粉糠最好選較為幼細嘅，會可以均勻沾上雞肉上，我因為屋企有用淨嘅日本Panko麵包糠，所以就冇特別去買，Panko麵包糠較粗身較長，適合炸物，出嚟會脆D，但焗就冇黏得咁好啦。
5）想雞肉唔黏住個焗盤，記得先掃一層油，但者好似我咁買塊不沾焗墊（silicon baking sheet）就唔驚會黏到表面嘅麵包糠芝士甩晒，呢一張墊亦都可以用嚟焗曲奇餅或者墊住搓粉，用途好多，係就係貴少少，但用得多就抵番晒。
後記：
李生試咗兩次嘅成品，佢覺得用牛油好食D，因為味道鮮D同較香，橄欖油就淡味得嚟冇咁香，不過暫時兩個小魔怪都未試食，因為兩個都病咗，熱氣嘢要戒，有排都唔食得。呢排天氣差，醫生話係大傷風，唔係感冒，發燒加喉嚨痛加咳真係大人都辛苦，小朋友當然更慘，豬扒妹同哥哥唔舒服到喊，問佢地喊咩嘢，佢地就話喉嚨好痛痛，心口好痛痛（因為D痰咳唔出，所以就頂住好辛苦），佢地唔會講得清楚，但行動（其實係冇行動，成日撻咗喺度唔郁）已經表示咗佢地係好病好病，心痛死家中嘅大人。快D好番啦，媽咪再整好嘢你地食啦，XOXOXO