仔仔的生日會之2：蝴蝶酥 Palmiers

其實呢個蝴蝶酥整得唔好，因為壓油出咗事，有D牛油包唔實漏咗出嚟，中途應該要雪一雪個皮再摺，但因為整果陣已經係夜晚，我冇等雪皮就摺，所以就出現個皮包唔實牛油溶爆皮，因為只係側邊爆皮，所以我都姑且焗出嚟睇下點。在這就當係煮食筆記，記低今次失敗之處，食係好食，不過個質地唔靚，唔係一層層酥皮，小朋友都唔計較呢樣，仲好俾面咁不夠30分鐘廿個蝴蝶酥全部清晒。

酥皮材料：麵粉 7安士（約200克）
鹽 1/2茶匙
糖 1-1/2湯匙
雞蛋 半隻（打勻）
水 2-1/2安士（約70ml）
菜油 1茶匙
牛油 4.5安士（約125克）
手粉 少許

酥皮做法：1）麵粉過篩，加入鹽同糖拌勻。
2）加雞蛋、水及菜油拌勻成粉糰。
3）牛油置室溫一陣，以保鮮紙包住壓成薄薄約半cm正方形。
4）灑少許手粉，將粉糰放工作台上，用麵棍壓成比牛油大一倍之薄片，將牛油放入粉糰正中（粉糰作正方形，而牛油以菱形放置中間），將粉糰摺入包住牛油。
5）以麵棍將粉糰壓成長方形，小心唔好壓至牛油爆皮，將粉糰左面三分一由外至內摺，跟住右面三分一摺入中間，剛好蓋住之前摺入部份，將粉糰放入雪櫃中30分鐘。
6）取出再以之前方法將粉糰以麵棍壓成長方形，再由左右由外至內摺兩次，之後又再雪30分鐘；總共前後最少做3次摺疊。
7）酥皮完成之後就可以開始做蝴蝶酥。可以按此參考我上次做蝴蝶酥嘅食譜同做法。

小心得：
1）酥皮要唔爆油要雪一雪再摺，每次摺完最好都要雪完至再雪。
2）最少要摺三次，有人摺五次，分別係出嚟個酥皮嘅層數。
3）想個蝴蝶酥兩邊色都平均，記得中途要將蝴蝶酥底面反轉，咁就可以做到兩邊顏色深淺一樣。
後記：
呢個故事教訓要做酥皮要雪，唔好懶，時間點都冇得慳，否則出嚟效果就唔好，好彩李太嘅蝴蝶酥味道冇問題，對住唔多挑剔嘅小朋友同家長，我今次過到關，不過係好係醜當然心裏有數啦。