仔仔的生日會之1：脆脆朱古力粒曲奇 Chocolate Chip Cookies

李生成日上網睇食譜，呢日咁啱睇到個video示範，話係完美朱古力曲奇，好奇睇下有幾完美先，原來係sugar曲奇加入朱古力粒，出嚟口感好脆好香。做sugar曲奇最麻煩就係點打糖同牛油，因為我屋企冇電動mixer，我打蛋白都係一個手動egg whisk，打到手抽筋至會企身，所以sugar cookies我都幾抗拒。見到video示範一個方法係超簡單（冇話唔駛時間唔辛苦呀吓），冇電動mixer都可以做到，出到嚟效果仲好好，唔駛用李生放雪櫃嘅方法，D曲奇都好脆，我星期四整星期六食都好脆好新鮮。六十塊曲奇不消一陣就報銷三份二。去生日會嘅家長都讚好食，小朋友更加唔客氣，食完一塊又一塊，如果唔係食咗pizza先，個個淨食曲奇都似。

材料：
自發粉 2-1/2杯（20安士=567克）
小蘇打 1/2茶匙
鹽 1/2茶匙
牛油 1杯（8安士=227克）
黃糖 1杯（8安士=227克）
白砂糖 1/2杯（4安士=113克）
雞蛋 2隻
雲喱拿油 1-1/2茶匙
烘焗用朱古力粒    1-1/2杯（我選semi-sweet冇咁甜）

做法：
1）牛油室溫放軟或入微法爐高火叮20秒。
2）將黃糖白砂糖加入牛油中，以木匙將糖拌入牛油中至完全溶合成糊狀。

3）加入雲喱拿油拌勻，再加入雞蛋拌勻。

4）自發粉加入小蘇打、鹽後過篩。
5）將自發粉分三四次續少加入糖糊中，拌至完全溶合無粒狀。

6）朱古力粒倒入糖糊中拌勻。

7）將糖糊放入雪櫃最少4個小時，雪過夜最理想。
8）雪完之曲奇糊自雪櫃取出，預熱焗爐350度F（176度C）15分鐘。
9）以匙羹將曲奇糊造型成為小圓球放於焗盤上，放入預熱之焗爐中焗15至18分鐘。

小心得：
1）用木匙拌勻糖同牛油其實唔係難，只係要有D耐性，慢慢續少續少一邊用匙底將糖同牛油壓埋一齊，唔好心急整溶D牛油加入糖，冇錯咁係好易，但質感就唔同啦。
2）想塊曲奇形狀靚D不妨用個雪糕scooper去續塊造型，咁焗出嚟形狀會一致，不過李太整咁多不同嘢，唔得花太多時間，所以就咁用一隻匙羹加手指就算啦。
3）呢個其實係sugar cookies做base，唔加朱古力粒就係sugar cookies。
4）由於係sugar cookies，加入朱古力要揀semi-sweet，唔係就太甜啦，而且口味隨你自己調較，可以落多D或少D朱古力粒。
5）朱古力要係烘焗用嘅唔溶果隻，如果唔係就溶咗落個cookie dough唔成粒架啦。