2012年三藩市農曆新年花車巡遊（下篇）2012 San Francisco Chinese New Year Parade

開始講西岸醒獅隊喺今次農曆新年花車巡遊嘅表演啦，一開始時，眾後生仔女都精力充沛，舞住獅頭獅尾嘅一窩蜂對住兩旁路人不斷點頭、貶眼、膜拜等，沿途喝采聲不斷。

舞呢隻天藍色獅子嘅兩個小朋友都只係中學生，但舞獅資歷不短，所以只睇佢地舞獅完全唔會想像到佢地係得十二三歲。

哈，呢一班「樂師」個個都接近或過半百，但寶刀未老，輪流奏足全場。

嚟到Union Square Macy's 對出嘅看台，十幾隻獅子一湧而上，蔚為奇觀，觀眾都驚嘆陣容之鼎盛，鞭炮一點著，各獅子就圍住炮光狂舞，由於呢度係主要電視台相機所在，所以燈光火著，李太至有機會影到咁清楚咁靚嘅相。

呢幾張相個角度可以睇到成班獅隊一路跟住花車嚟舞，而樂師們就對住獅隊大力打鼓打鑼。

豬扒妹同哥哥全程抓住花車圍欄，一邊睇舞獅表演，一邊向途人揮手。

呢一位伯伯一定要講一講，佢已經七十幾歲，今次係Tony力邀佢出山幫手，佢確實寶刀未老，打起鼓嚟依然勁力十足，有功架有台型。

佢同李生好有淵源，大家以前都係參加同一獅隊，師承同一家，認識同一班人，只係輩份同參與時間唔同，今次係第一次合作，更神奇就係李生同伯伯個仔係大學同學，係李生李太堅持送伯伯返家，去到門前見到伯伯個仔時發現，你話世界幾細。

獅子跳上欄河，觀眾簡直係興奮到顛咗。

嚟到巡遊尾聲，到達Kearny Street看台，個司儀介紹醒獅隊，大家都驚訝有咁多獅子參與

個司儀數到21隻，其實我地出咗18隻，果3隻一定係司儀眼花數錯啦，一陣鞭炮之後，花車駛離Kearny Street，今年花車巡遊完滿結束，由6點幾開始至完結有個多小時，真佩服一眾年青人舞足全程，使儘一己所學，為觀念眾帶來一個熱鬧開心嘅農曆新年。

之後就係行番4個街口去攞車，車完伯伯返屋企之後，我地一家匯合Tommy同仔仔食晚飯，步入餐館已經係晚上8點45分，餐館容後介紹。