糖醋肉排 Sweet Sour Ribs

李生出街食過一個糖醋骨好好味，佢而家念念不忘，知夫者莫若妻，李太買咗一塊腩排，係連皮果隻，較為肥咗少少，下次要買排骨瘦D至得。因為李生提出整辣味，所以呢個版本係有加辣椒嘅。

材料：
肉排 1磅半（斬成骨牌大小）
蒜頭 2瓣
蔥頭 1粒

調味：
酒 2湯匙
大紅浙醋 4湯匙
片糖 1/3片
䉀糖 3湯匙
生抽 6湯匙
水 1.5飯碗

Optional：
紅椒粒 1茶匙

做法：
1）肉排略出水，撈起過冷河，瀝乾待用。
2）蒜頭蔥頭去皮切薄片。
3）將1湯匙酒、2湯匙醋、1/3片糖、1-1/2湯匙䉀糖、生抽4湯匙加5湯匙水混合。
4）其餘調味料混合煮熱放一旁待用。
5）將蒜頭蔥頭加1/4茶匙油爆香，加入已汆水之肉排放入煎至表面轉色。
6）加入（3）之汁料，慢火煮15分鐘。

7）將肉排反轉面再炆，如果汁液已乾就加入部份（4）之汁料，再慢火煮10分鐘。

8）慢火再炆15至20分鐘至肉熟同淋身，只要用筷子或叉順行拮得入就足夠。若鍾意食辣，就喺最後5分鐘加入紅椒粒拌勻。期間要經常反轉肉排，等肉排四面都均勻上色，最好係等個汁略為收乾上碟。

小貼士：
1）因為用肉排有皮有肥肉都幾多油，所以要先汆水，可以選用較瘦嘅排骨。
2）酒、醋、糖、豉油同水嘅比例係12345，非常好記。
3）酒我用米酒，醋最好係紅浙醋，糖可以係片糖冰糖䉀糖或黃砂糖，我今次係兩溝片糖同䉀糖，只要加埋係同一個份量就冇問題。
4）豉油較適合用生抽，因為老抽有甜味，加埋糖份會太甜，想色靚D可以溝少許老抽入豉油個份量，但其實我覺得不必，因為我係加入片糖去炆，完成時個色已經幾深色架啦。
5）煮嘅時候要留意火力，小心煮燶，亦因為咁樣，李太準備額外汁料，就唔會個肉未淋個汁已經收乾晒。

後記：李太見有紅椒，就手癢整咗個裝飾紅椒花嚟影下相，之後會循環再用，嘻嘻。