Monday, February 6, 2012

簡單健康零失敗豆奶布丁 Soy Milk Pudding

呢個最啱懶人,好似李太就係,而且呢個甜品製法簡單,幾乎係零機會失敗。之前網上見好多人整北海道牛奶布丁,用個玻璃樽仔整,睇落好特別好Q,口感又滑又濃,但我一來唔想買日本牛奶,想買都要特登去日本超市,而且未必有得賣,二來個食譜有淡忌廉whipping cream,我唔想俾個咁厚重嘅甜品俾對仔女食,而且通常飯後佢地食甜品都唔食得多,所以我改動咗原食譜嘅材料,減糖減脂肪量,而家呢個做法嘅材料全部都可以喺我屋企搵到,唔駛特登出去買,前後整10分鐘,加埋雪兩小時,就有好香好滑豆奶布丁食。




材料:(4至6杯份量,睇杯模大小)
無糖豆奶  500毫升
黃糖        35克
魚膠粉     7克
凍滾水     8大湯匙
熱水        適量

做法:
1)無糖豆奶放小煱中,加入黃糖,以中火煮至糖溶,不必煮滾,熄火放一旁待用。
2)倒魚膠粉入一個小玻璃杯或瓦碗中,續少加入凍滾中搞至成果泥狀,用一個大碗,注入熱水,將盛放魚膠粉之杯或碗放置其中,隔水將魚膠粉攪拌至溶。
3)將魚膠粉水倒入豆奶中。
4)以茶隔過篩,將豆奶分放入啫喱杯中,放入雪櫃雪至凝固,約需兩小時。



小心得:
1)千萬勿煮滾奶類,否則奶面會凝結一層奶膜,食冇問題,只係會破獲奶類本身嘅營養。
2)想快有得食,可將啫喱杯放入一個注滿冰嘅大盤中,加上魚膠粉,好快個布丁就會凝固。
3)魚膠粉唔好用熱水開,因為一遇熱水,魚膠粉就會結成一舊舊,好難搞溶,反而用凍水開成果泥狀再用熱水坐住攪拌就會溶得好靚。
4)呢個方法做出嚟嘅布丁質地只比豆腐花硬少少,若要滑同質地厚D,可以用牛奶350毫升,落魚膠後加入150毫升淡忌廉whipping cream,拌勻入杯雪,出嚟個布丁會好滑,質地較厚重,但我個人想健康D,所以冇用淡忌廉。
5)可以考慮煮奶時加入香草例如薰衣草、雲厘拿等,令布丁有特式口味。

後記:
豬扒妹、哥哥同李生一人一杯,李太就執兩個小朋友口水尾,因為估佢地咁大杯食唔晒,原本想佢地兩個人分一杯,佢地又唔肯,結果就係豬扒妹食咗半杯多少少,哥哥就食咗大半杯。呢次冇續個步驟影相,因為實在係太簡單啦,過程都冇咩特別要影。

No comments:

Post a Comment