蝴蝶酥 Palmiers

蝴蝶酥Palmiers係法式小甜點，以前成日喺香港嘅西餅舖都會見到，李太好鬼鍾意，我覺得係一種好有古典味嘅甜點，最正就係配一杯咖啡或檸檬茶，又脆又甜又香，食嘅時候滿口香甜，令我有種回到中古時代嘅感覺，成班仕女著住花邊袖大傘裙，梳個大高髺，好優雅咁食下午茶，讀下詩繡下花畫下畫又一日... ... ...好明顯我又發夢啦。

去番現實世界。呢個蝴蝶酥係星期六果日帶去新年花車巡遊，因為趕時間，用咗現成嘅酥皮，冇自己搓，焗到出嚟李生皺晒眉頭，話：failed，overcooked，all burnt!!! 我食咗1/4塊，叫李生自己試下至講，食完佢就遞個紙袋過嚟，叫我全部包走拎去請人食，哼，就好似佢老婆李太咁，呢D蝴蝶酥可能冇外在美，但有內在美嘛～哈哈，有D想嘔，李太純粹搞下笑，唔好熄機住，睇埋個食譜先。


材料：（約做24塊）
冷藏酥皮   兩塊（15cm x 15cm）
砂糖         適量（我用咗約2湯匙黃糖）
牛油         適量（我用咗約1/4杯，即2安士，56克）

做法：
1）熱水坐溶牛油，或置微波爐中煮溶。
2）酥皮置室溫解凍至軟身。
3）先灑少許砂糖於工作枱上（我慣用一張耐熱膠墊），將一張酥皮放上砂糖面。

4）酥皮掃上一層牛油，灑上一層薄薄砂糖。
5）由一邊開始向酥皮中間摺兩次，另一邊都一樣，成為相中形狀。

6）略灑上少許牛油，再對摺壓實，放入冰箱中雪約半小時。

7）焗爐預熱400度F（約200度C）用刀切成約半吋闊幼條，排上焗盤中，打開酥皮頂部少許，

入焗爐中焗15分鐘，反轉另一面再焗12分鐘或至兩面呈金黃色同酥脆。

小心得：
1）唔好好似李太咁用黃糖或其他深色砂糖，除非你鍾意個蝴蝶酥好似呢個咁深色，或者俾人誤會焗燶咗啦，用白砂糖會靚好多架。食過呢個嘅人都有話鍾意呢個樣，覺得係glazing效果。所以各花入各眼啦，李太只係指出用不同糖嘅分別。
2）入冰箱30分鐘再焗令個蝴蝶酥鬆脆，李太今次冇時間雪，但出嚟都好鬆脆，或者係呢度天氣凍，溫度比較低，所以唔入冰箱都唔差，但天氣熱就建議先入冰箱再切同焗。

後記：
李太只係試味時食咗1/4塊，之後帶去花車巡遊，哥哥同豬扒妹肚餓食咗兩三塊，之後個紙袋就出現喺不同人嘅手上，花車巡遊到中途兩個小朋友肚餓，李生周圍搵都搵唔到個紙袋，李太相信已經「空」多吉少，應該俾人KO晒，我估我應該係開心嘅，因為有人鍾意食係一件好事，下次自己整埋個酥皮。