為小朋友做菜之1：雞蛋紫菜肉卷 Seaweed Meat Roll wrapped with Egg

先前有BK姊妹同網友都不約而同叫我介紹啱小朋友食嘅菜，我由哥哥出世開始就研究一下有關食物成份同營養嘅資料，加上哥哥同豬扒妹都有濕疹，食嘢方面都要多點留意。佢地兩兄妹雖然都為食，有時食量比李太更多，但唔知點解李太會成為肥師奶，但佢兩兄妹可以咁fit（其實我都擔心豬扒妹會變肥妹，佢而家果兩個節瓜豬脾同P都唔講得少），但兩兄妹都有一般小朋友嘅偏食問題，不同嘅係佢地係草食生物，唔鍾意食肉，要佢地食肉要同佢玩鬥智玩威逼。

以前有個社工同我講唔好逼小朋友食嘢，唔好太限制佢地食咩嘢唔食咩嘢，因為可能會引致佢地大咗之後有eating disorders，我覺得佢又不無道理，小朋友未返學前由自己湊，當然可以限制佢地食D咩，但只要一返學，有時都未必可以控制，好似哥哥而家日日帶午餐，有時放學返嚟一睇個午餐盒，好似未食過咁，問佢點解唔食，有時係凍咗唔好食，有時係太乾，有時站太多，但更多時係因為掛住玩，呢樣真係有計，唯有係以不同方法、不同煮法、不同食材去引佢食多D，又包多幾樣side snacks，例如生果、紅蘿蔔條、西芹條等，希望唔食晒正餐都有其他嘢頂肚。

話說呢個雞蛋紫菜卷我都幾鍾意整，以前喺香港我會用魚肉，但美國呢度買到嘅魚肉係好削，只可以叫做魚漿，好難會撻到有膠，口味亦唔夠鮮，所以我通常用豬肉、雞肉或蝦肉，各有好味。

材料：（兩條肉卷份量）
豬肉 1磅
雞蛋 3隻
紫菜 適量
麥皮 2湯匙
生粉 半茶匙
水 6湯匙

調味：
鹽 半茶匙
生抽 1湯匙
麻油 1湯匙
胡椒粉 1/4茶匙

煮法：
1）豬肉刴碎或買現成免治豬肉，拌入調味拌勻，加入麥皮2湯匙攪勻，再加入水2湯匙攪至水份完全吸收入肉中。
用手將肉略撻至起膠有少許黏性。放一旁待用。

2）蛋3隻打勻，分成兩份，每份煎成一個蛋皮。

3）待蛋皮略涼後鋪上紫菜，記得其中一邊留少許空位不填滿紫菜，方便之後收口。

4）豬肉分成兩份，每份平鋪上紫菜上。

5）將蛋皮由一邊卷至另外一邊，開口處壓在碟上。

6）燒滾一鑊水後，將肉卷放入鑊中蒸12至15分鐘，以一枝竹籤或刀尖輕插，如果容易拮入，抽出時又冇肉黏附就可以收火。

7）將碟取出後，倒去鑊中嘅水，將碟中肉汁回鑊煮滾。

8）半茶匙生粉加入4湯匙水攪勻，續少加入肉汁至肉汁滾至適合之濃稠度，倒出成為沾食用嘅醬汁，不必完全加入所有生粉水。
9）肉卷放略涼後切成厚片，可淋上醬汁或食時沾上醬汁。

小心得：
1）鋪紫菜時要記得收口一邊留多少許空位，就可以有肉沾到蛋皮，如果唔係蒸好塊蛋皮會剝離。
2）如果小朋友細個，可以考慮唔會整咁大個肉卷，用相同份量煎多一兩塊蛋皮，整多一兩個肉卷，蒸嘅時間會可以短少少，但包嘅工夫會多少少啦。
3）加入麥皮令豬肉滑D，因為就咁蒸豬肉會好實，加水加麥皮再加上撻下出膠，蒸出嚟就可以係滑滑嘅。
4）小朋友唔食瓜菜嘅，可以加入適量切碎紅蘿蔔、洋蔥、西芹、薯仔等於肉中，小朋友在不知不覺中就食咗蔬菜落肚。
5）可以用魚肉、雞肉或蝦肉等代替豬肉。

後記：豬扒妹同哥哥試食，豬扒妹好鍾意，但佢嫌大塊，要李太切開四份俾佢慢慢食，哥哥食咗半個，佢話唔鍾意，但之前明明係佢不停問我係咩，食唔食得？可唔可緣試？或者將餘下份量聽日再俾佢試下，睇下係唔係真係唔鍾意。呢兩個心肝寶貝有時真係玩起媽咪，淨係食我都試過不少方式去引佢地試多D新嘢，唔想個仔成日都食pizza hotdog，佢真係日日食都唔厭，我同李生已經係自己整pizza，但hotdog真係未有本事啦。