再整米通（星星心心版）Rice Krispy Hearts & Stars

今晚再整多次米通，因為李生話想食加咗提子嘅，我用咗原本嘅一半份量嚟整，因為之前有網友話整成波波型，我諗試下其他形狀都得，用個曲奇模就做到。

呢次除咗加提子外，仲將雲厘拿油改成杏仁油，食果陣都食到杏仁味，不過提子味重D，因為我好重手加咗唔少提子。造型要快手，因為用個曲奇模去左搞右搞，未造型果D會硬晒，我整咗9個，最後果個D爆米花都開始好硬啦。

我個心心模有掃少少油，個星星模就冇，但其實都唔黏個模，脫模好易下。李生食咗一個話好味，對仔女瞓咗未試，不過佢地一定鍾意，因為係心形同星形造型。

今日係李生李太結婚7周年，既然老公話想食，老婆就整俾佢食，當係結婚禮物啦，等對仔女瞓晒，我地兩口子食米通飲紅酒，最衰今次枝酒麻麻，咁就喺平平靜靜中邁向第8年啦。