如意曲奇（雙色橙味朱古力曲奇）Double Color Cookies

呢個造型如果係新年會好應景，因為好似中國如意咁樣，我原本想整個心型，但因為雪得太實搓唔到，有心整心心嘅記住雪之前搓好至放入雪櫃。呢個係2月13日晚焗嘅，做嚟放入俾對仔女同學嘅goodies bags度，雙色係因為有兩種味道兩種顏色，今次用嘅係朱古力同橙皮。




材料：
麵粉       3杯（24安士=680克）
牛油       3/4杯（6安士=170克）
蛋          2隻（如果蛋大隻1隻都夠）
糖粉       1-1/3杯（10.6安士 300克）
橙皮蓉    1個
朱古力    1安士（28克）

做法：
1）麵粉過篩，加入糖粉拌勻。
2）牛油熱水坐溶或放微波爐1分鐘，放一旁備用。
3）朱古力熱水坐溶或放微波爐煮溶，放一旁至略凍。
4）蛋打勻，放入粉中拌勻。
5）加入牛油，將粉拌成一個粉糰。
6）將粉糰分成兩份，一份拌入橙皮蓉再搓勻。另一份拌入朱古力漿搓勻成朱古力色。

7）將兩份粉糰壓成薄片，將朱古力粉糰放上橙皮粉糰上，分別由左至右及右至左卷入中間，成為一個卷軸形狀，用保鮮紙包好，放入冰箱中雪至少半小時。

8）焗爐預熱375度F（190度C）。
9）從雪櫃中取出已略雪硬之粉糰，解開保鮮紙，用刀切成約半cm薄片，放焗盤中焗12分鐘，反轉面再焗5分鐘至淺色部份略呈微黃色。

小心得：
1）朱古力部份因為加入朱古力溶液，較為軟身，建議將朱古力粉糰放中間會容易處理。
2）如果唔鍾意橙皮味，可改用檸檬皮，或加入雲喱拿香油或杏仁香油做成不同味道配搭。
3）由於粉糰牛油成份重，所以較為軟身，所以放冰箱中雪至較硬身方便切片，可以就咁由一邊卷至另一邊做成螺旋形，又或整型成如意心型、螺旋心型，但造型部份要入冰箱前做妥，否則雪硬之後就好難可以再塑造不同形狀。

後記：焗完放涼之後，我將每一個曲奇用保鮮紙包好，放入goodies bags中，就係對仔女送俾同學嘅情人節禮物

goodies bags內容唔係豐富，哥哥係一個筆筒、擦膠加塊曲奇，實用嘢為主，加埋哥哥自己簽名嘅咭。



豬扒妹嘅係迷你貼紙簿、spinning top、迷你彈珠遊戲加豬扒妹簽名咭，有一半係豬扒妹有份填顏色架，佢仲有幫手將D禮物入袋。

今次因為以為屋企仲有禮物袋存貨，原來冇晒，所以就用咗包午餐嘅密實袋做goodies bags。