無價的兩束花

李太同李生的周年紀念同情人節相差兩日，以我呢D咁孤寒性格，我通常撈埋一晚慶祝

李生投訴：一日還一日嘛，點解唔可以出去兩晚撐枱腳？李太：當然唔得啦，邊個幫你湊對仔女兩晚？兩餐都出去食，好$$$$

李生有時俾我吹脹架。咩喎，有錢都留番對仔女讀書用啦，興趣班唔駛錢咩？我地一晚駛一百蚊，夠一家大細去食兩三餐好嘅。

拍拖初期，因為分隔兩地，李生送唔到花俾李太，到李太嚟咗美國，第一年情人節就係我地結婚前兩日，忙到不得了，去註冊果日，李生居然連花都冇紮，係李太細佬好識做買咗一束花，唔係D相就連花都冇一枝。但從此以後，每年情人節，李生就會送花，第一年佢送康乃馨！！！！OK啦，果年李太就做媽媽，不過就俾我細佬笑佢唔識趣，咁李太又冇特別講鍾意玫瑰花，有花收我唔會投訴啦，有D朋友自結婚後連草都冇條，我有一紥花係好好架啦，經過幾年下來，李生每年都會送一束玫瑰花，李太例必將束花吊乾做乾花，到第二年情人節就會換一束新花，今年唔知係唔係會都係咁呢？過多一個星期就知啦。呢紮係上年嘅，而家都仲係好靚架。

另外一束好有意義嘅花就係由豬扒妹同哥哥上年整嘅，學校老師喺母親節前教小朋友一人整一束，以幾歲小朋友嚟講，係好叻架啦，我認為係好好訓練對手仔嘅勞作，收到嘅時候真係好驚喜，而家放喺屋企餐枱上嘅花樽裏面，我唔會捨得掉咗佢，唔知豬扒妹同哥哥大咗會唔會再送花俾媽咪呢？

情人節我一向都覺得應該係廣義對所有所愛嘅人表達心意，唔局限自己情人，我今年會整D曲奇餅同小甜品俾兩個小朋友帶俾學俾老師同學，我自己會送曲奇餅俾幾個好同事，仲會做多少少俾李生帶返公司俾佢同事食。

以前喺香港仲係單身，每年情人節李太會約一班果晚冇地方去嘅朋友開party，佢地有D有男朋友架，但未必果晚會出去咁解，大班女生煮嘢食，傾下密計，真係快活不知時日過，我喺遙遠嘅美國祝願香港親友情人節快樂，甜甜蜜蜜。