Thursday, March 29, 2012

為小朋友做菜之6:鬆軟厚身煎班戟 Fluffy Pancake

呢排有人講煎班戟pancake,李生一向都係用pancake mix,佢話咁易D,而且用啱果隻好好味又夠鬆,所以一直都係由李生整pancake。呢幾日兩個小朋友病口淡淡,佢地扭計要食pancake,點知去到一間我地成日去嘅餐廳咁啱兩日都休息(呢邊餐館通常都係休一個周日,點知呢間咁把炮休星期二三),唯有返屋企自己整啦。李生話佢咁啱買咗pancake mix,我話不如試下我上網搵到一個BK會員教嘅5條1份量啦,即係麵粉1杯(250ml)、糖1湯匙、牛奶1杯(250ml)、蛋1隻同泡打粉1茶匙,將以上所有乾料拌勻,蛋加入牛奶拌勻,再將牛奶續少加入乾料中,靜置30分鐘開始煎熟。係就係好容易,但唔好意思,真係唔好食,可能係我地要求高,個班戟唔鬆冇味又唔夠香。我自己少少失望,李生指出係冇牛油味,我覺得可以加少少雲呢嗱油會香D。真正食譜分享如下,呢個至係我地鍾意嘅班戟, 想知道點解我會話鬆軟厚身,請留意做法細節。




材料:
麵粉 1-1/2杯
牛奶 1-1/4杯
1隻
泡打粉 3-1/2茶匙
1茶匙
1湯匙
牛油 3湯匙(先熱溶)
雲呢嗱香油      半茶匙

做法:
1)麵粉加入泡打粉同鹽,一齊過篩,加入糖拌勻。
2)雞蛋分開蛋黃同蛋白,蛋黃加入牛奶中,加入雲呢嗱油攪勻。



3)蛋白置於一個乾淨碗中,打發至有泡,加入1/4茶匙糖,打至企身,不必完全硬性發泡。



4)將約2至3湯匙(1)之麵粉加入蛋奶溶液中,攪至完全溶解冇粒粒。
5)餘下之麵粉,以匙羹撥開中間成為一個大孔,將蛋奶糊分幾次加入麵粉中,以木匙拌勻至完全混合冇粒粒。
6)將蛋白加入麵粉糊中以挖刀輕力拌勻。



7)最後加入溶解牛油拌勻就成為班戟糊,靜置15分鐘。



8)易潔鑊抹淨,燒熱鑊後轉中細火,加入少許牛油,倒入約4湯匙班戟糊,煎至粉漿起好多泡就反轉另一面煎至熟透。









小貼士:
1)打發蛋白時用嘅器皿一定要冇油冇水,完全乾淨,否則點打都打唔到企身。
2)想個班戟糊夠鬆軟除咗分蛋法外,唔好睇少靜置果15分鐘,呢個都係關鍵之一。
3)雲呢嗱油可加可唔加,本身個班戟都好好味。
4)可以加入有氣水、啤酒、薑啤、蘋果西打等,只要相對減少奶嘅用量,同樣可以令班戟更鬆軟。
5)本身溝好嘅班戟係軟為杰身,所以煎嘅時間都要耐少少,咁控制火力上就要自己睇情況執生啦,我用中細火雖然要耐D,但就唔會咁易燶。
6)要見到起好多泡至反轉面,咁樣會煎得個色夠均勻,又唔會黏鑊。


後記:
豬扒妹同哥哥鍾情朱古力醬,鍾意加朱古力醬,榛子醬係第二選擇,果醬都鍾意,約要加糖漿,佢地鍾意原味果隻,唔鍾意楓蜜糖漿,嫌唔夠甜。我自己鍾意熱辣辣時加少許牛油再淋上楓蜜糖漿,或者用港式食法搽花生醬、煉奶、砂糖,實行做個港式格仔餅食法。因為呢個做法做出嚟嘅班戟好鬆軟,就算對摺都唔會斷開,所以加豆沙做豆沙餅都得架。




3 comments:

  1. 請問一杯的份量是250 ml嗎? 又, 表以上份量, 可以煎到幾塊班戟? 謝謝回覆
    [版主回覆04/17/2012 13:18:39]有人喜歡就好啦,煮嘢食都想自己愛嘅人開心,豆奶布甸係無心插柳之作,幸好出嚟口味清新,我家小孩都喜歡。
    [PY回覆04/17/2012 10:15:08]謝謝回覆, 會賞試做這款班戟. 又, 我已學做了"豆奶布甸", 簡單及非常美味, 家人"十分讚"。
    [版主回覆04/17/2012 06:31:00]1杯大約是240ml,通常用一隻量杯,上面都有Cup、grams、ml等刻度,我每次下4湯匙粉漿,大約是6吋直徑一塊,可以做出5塊班戟。謝謝到訪,希望你喜歡這個班戟口味。

    ReplyDelete
  2. charlie and gordonMay 26, 2012 at 5:53 AM

    我上次已跟你做了一次,果然很鬆軟,今晚再試,但想問,可否今晚預備好pancake湖,明早才煎呢?
    [版主回覆05/27/2012 03:22:01]不建議咁做,因為蛋白要打發好即拌入,放一陣都會再打,如果預先拌好蛋糊,放咁多個鐘已經冇咗分蛋、打發蛋白嘅效果。粉類可以一早拌好,但濕料要即加即用。

    ReplyDelete
  3. 多謝你提供的食譜, 食了個個都讚好, 多謝妳的分享
    [版主回覆07/24/2012 22:40:22]不客氣,只做多少少,口感就不同了,煮食真神奇。

    ReplyDelete