Tuesday, February 14, 2012

簡單易整米通Rice Krispy Treats

呢個係李生教嘅,但就由李太整一個健康少少嘅少油版(比李生版本少一半以上),其實原來一D都唔難,今次李太可以叻番一次,唔駛靠李生整俾李太媽食啦,話說李太媽同李太爸食過李生整嘅米通之後,只要買到爆米花就會叫李生整,李生自己都好鍾意食,佢好似係N年前佢阿姨教佢整,李生整完發現係好易又好食,連對仔女都鍾意食,個質地係煙煙un un,甜甜地痴牙,都算飽肚,美國呢度呢一個食譜都幾普及,好多人屋企都成日整。材料唔多,整嘅過程都唔複雜,就算廚藝不高都好容易整到。




材料:
花生米 5杯(一盒)Roasted Rice Cereal



棉花糖 10安士(283克)
牛油 1/4杯(2安士=57克)
雲喱拿香油 3/4茶匙

做法:
1)將牛油放入煲內以中火煮溶,加入棉花糖及雲喱拿香油,續煮至溶。









2)棉花糖全溶後熄火,分三次加入花生米拌勻,讓每一粒爆米花都裹上棉花糖溶液。





3)乘熱倒入一個已擦油焗盤中,或於焗盤舖上牛油紙或蠟紙,將壓平花生米成約一吋薄片。





4)待花生米完全冷卻後,用刀切成一吋闊米通條即成。



切成正方形成一口米通都好正架。



小心得:
1)我覺得用金屬匙羹或刮刀壓平花生米都唔就手,而且又好黏下,所以我用手(當然到洗乾淨對手至得啦)加一把切牛油用金屬刀,容易控制成品之餘,又唔係好黏手。
2)雲喱拿香油令個米通有香味之餘,又令口味更佳,唔鍾意雲喱拿味,可以用杏仁香油、橙汁、檸檬汁等。
3)鍾意朱古力可以於拌入花生米時加入朱古力粒,加入乾果如提子乾、紅苺乾等都令米通更多變化,就好似食街外賣energy bars咁。
4)千萬勿用大火,否則棉花糖好易燶底。
5)花生米一定要熄火後至加入棉花糖溶液中攪拌,唔係就溶埋D花生米架啦。
6)保存米通放入存氣盒中,每舖一層加一塊牛油紙或蠟紙喺上面就唔會黏喺一齊。
7)最怕就係洗煲,次次整完都要先以熱水浸一浸至容易洗得乾淨。



備註:
1)要改一改花生米份量,因為我諗容量計法同重量有D唔同,因為有BK媽咪同網友指出,一盒花生米都係得十幾安士或二百幾個gram,咁我換算出嚟5杯等同千幾gram又真係好似冇咩可能,咁我都唔駛用晒一大盒就做到呢度廿幾塊,所以唔想誤導大家,我改番個份量為一盒花生米,希望大家唔會覺得我亂咁寫呃人啦。下次整我會睇下個花生米盒上面寫咩份量再抄落嚟,因為我用量杯,一杯等於8安士,每安士等於28.3克,所以40安士就係1132克啦。
2)另外,之前叫呢D做爆米花,有朋友誤會係爆谷,真係罪過,都係全部改晒叫花生米會清楚D,大家去買果陣認住個樣啦。

8 comments:

  1. 真系多谢你分享呀。。呢样又可以试窝。。。留意下香港有无爆米花卖先~我想加NUTS呀,HEEEE
    [版主回覆02/15/2012 16:57:07]我鍾意加提子乾多D,我老公就鍾意加朱古力粒,兩樣試過都好食,nuts記得切細粒少少喎,腰果同花生都惹味架。^-^

    ReplyDelete
  2. 嘩... 好勁呀!
    [版主回覆02/16/2012 07:28:28]好易架,一D都唔勁,只係溶棉花糖要慢慢嚟唔好燶。

    ReplyDelete
  3. 正呀!!
    [版主回覆02/16/2012 07:29:33]真係幾好食架,不過係魔鬼,牛油加棉花糖唔少卡路里。

    ReplyDelete
  4. 以你切成長方型的size 計, 你個分量可以整幾多條呀 ? 我唔想整咁多, 係唔係將全部份量減一半就得呀 ?
    [小柔和小欣回覆02/20/2012 14:36:20]thx thx ~
    [版主回覆02/16/2012 14:21:35]長方形約1吋乘2吋,今次切到24塊,試整可以減半份量,搓成波波都得架,小朋友會鍾意。

    ReplyDelete
  5. 睇見有啲肚餓添! Have a great day!
    [版主回覆02/17/2012 07:10:48]淨係有D?唔係應該想即刻食咩?哈哈。。。多謝到訪,have a nice day。

    ReplyDelete
  6. haha is it the table manner?~
    [版主回覆02/18/2012 04:44:44]哈哈,食呢D小食要用手,有咩table manner喎~\^0^/

    ReplyDelete
  7. 整左兩次, 終於成功左勒, 小柔很喜歡食 ~~ 謝謝 ~~
    [版主回覆02/27/2012 16:39:19]小柔鍾意食就好啦,有咩開心過整嘢食俾仔女而佢地食得開心?加油呀。

    ReplyDelete
  8. 好簡單, 人人都可以試, good
    [版主回覆03/09/2012 04:50:19]真係簡單,又可以有好多變化,小朋友多數鍾意。咁你又整唔整呀?

    ReplyDelete