第120款：雙半法國辮公主頭

唔知大家法國辮紥得有幾純熟呢？呢一款都係以法國辮做基礎，唔駛紥晒成個頭，只係將前面同兩鬢部份頭髮編起，後面係呈現一個大V字，唔好心邪，唔係deep V露背，三藩市咁凍要抵冷貪瀟湘只會係攞苦嚟辛，頭髮紥個deep V就絕對冇問題啦。

首先由一邊頭開始，取前面小束頭髮開始以法國辮方法去編，但只由前面加入頭髮，加入時亦唔需要成片頭髮去加，只再加入好細束頭髮就得，因為效果係好似一個網咁罩住中間嘅頭髮，太多頭髮條辮太粗到兩邊合拼時就會變成中間太大條辮。條法國辮唔駛織到尾，大約去到耳珠位置就夠，以橡皮筋暫時固定，再去紥另一邊。

另外兩條法國辮嘅位置要喺每邊頭嘅中間，即係分別係頭嘅1/4同3/4位置開始，向中間位置紥去。當完成晒兩條半法國辮，將兩條辮拉去中間合併，以橡皮筋固定即成。

靚唔靚呀？唔係好難梳架。