當三藩市師奶遇上三藩市師奶

話說三藩市C9李太上星期日約咗blog友三藩市師奶一家去飲茶，李太一家果日一早去咗Food Co入貨，之後再返屋企放好D要雪嘅嘢，再去到約好嘅茶樓，三藩市師奶一家已經到咗，李生放低我、哥哥同豬扒妹就去搵位泊車，我同三藩市師奶一家約略介紹之後就上去坐低。

呢一日朝早可能冇旅行團，所以幾乎係任坐，我地揀咗一張近窗嘅大枱，因為兩家夾埋有十個人。呢個就係blog友三藩市師奶、佢個細女同三藩市先生啦。

豬扒妹好鍾意長頭髮著裙嘅姊姊，所以同靚姊姊坐隔離，仔仔就坐我另一邊。

坐低叫咗點心俾小朋友食，都係蝦鮫、燒賣、腸粉、糯米雞果D必食嘢，其實我地大人志不在食，大家都好忙傾計影相。李太唔記得問清楚三藩市師奶就order咗鳳爪，真係唔好意思，點知小朋友又肯食，真係有D意外。

都唔知大家傾咗幾耐，但幾個小朋友就好似有好多嘢講好多嘢玩咁。

飲完茶小朋友意猶未盡，於是去咗附近圖書館外嘅公園玩咗一陣，但果日天氣唔係幾好，陰晒天想落雨，唯有玩完一陣就要走，臨走時小朋友仲問幾時再玩過，或者過完聖誕新年後，天氣好少少冇咁凍又可以去公園玩過啦，難得我地小朋友年紀唔同都可以玩得埋。

其實喺三藩市仲有好多blog友，希望有日可以好似香港blog友咁有多D聚會，始終認識都係大家嘅一種緣份。