玻璃曲奇 Glass Cookies

呢個玻璃曲奇喺網上見到好耐，但因為個食譜其中有D步驟我唔係太肯定(或者係我蠢啦)，一直都唔係好敢試。但其中最大難題居然係搵硬糖，真係講都冇人信，莫講話原食譜講嘅霍士Fox's果汁糖，就算係硬糖都唔易搵，成間Walgreens居然得一種硬糖，想睇吓有冇多D顏色同口味，Sorry...得一千零一種，就係呢個蜜糖味，但有樣嘢好就係寫明係冇防腐劑、Natural flavors，仲係Gluten free，雖然我地屋企冇人唔食得gluten，都係一件好事，因為李太有朋友唔食得gluten，遲D聖誕送禮就多一個選擇。

中間糖嘅部份真係透明架，所以至叫玻璃曲奇。

曲奇個dough係之前做甜絲絲蕃薯撻用剩，可以去呢度睇番，個份量同材料再抄一次如下：

曲奇材料：（約做出20-30個曲奇餅，視曲奇大小而定）

低筋麵粉　　　13安士=365g（我用中筋粉8安士=225g+粟粉5安士=140g）

杏仁粉　　　　4安士=110g

全蛋　　　　　1隻

牛油　　　　　4安士=110g

糖粉　　　　　2安士=55g

黃糖　　　　　2安士=55g

曲奇做法：

1）麵粉、杏仁粉、糖粉過篩，加入黃糖拌勻。

2）牛油切成細粒，加入粉中以rubbing in方式加入粉中搓勻，成微黃色麵包糠狀。

3）雞蛋續隻打入拌勻。

4）搓成一個圓形dough後，放入雪櫃雪至少4個鐘或至過夜。

5）雪好後把dough取出，用roller揉成厚約半cm至七八分，以曲奇印模印出曲奇餅，我今次用咗兩個一大一小星星印模。

玻璃部份：果汁硬糖　　　20粒（視乎曲奇中嘅窿大小）

曲奇餅組合方法：

1）以一大一小印模印出中空的曲奇餅。

2）放入預熱325度F(160度C)的焗爐中，焗約15分鐘。

3）取出曲奇，於中空部份放入一粒硬糖，若糖大粒可用半粒，玻璃部份較薄透明度會高D，但若太少糖玻璃就會穿窿。

4）再放入焗爐轉300度F(145度C)多焗5分鐘。

5）取出放涼至好拎起，否則糖未定型會爛或痴底。

小貼士：

1）今次用不痴底的silicon mat放焗盤上再放曲奇，所以曲奇好快就可以拎起，底嘅玻璃部份仲好平滑。

2）呢個曲奇睇係好靚架，不過因為曲奇係酥脆但糖係硬，食起上嚟就唔係咁痛快，因為糖咬唔開，我要先食曲奇餅再食玻璃糖。

3）印模要揀一大一小，唔好太多曲奇或太多糖。

後記：

我就係買到呢隻蜜糖味糖，就咁食隻糖都好好味，曲奇係杏仁曲奇，兩個味都好夾，連李太細佬學過西廚又咀尖都話個曲奇好得，李太真開心C！

今次呢個玻璃曲奇，全部印模工作都係由豬扒妹同哥哥整架，你睇佢地幾pro，

我成日都覺得煮嘢食係一個好好嘅親子活動，佢地可以分工合作，一人攞一個印，哥哥印大星星，豬扒妹印中間細星星，之後由哥哥放焗盤上，當然中間就位係李太做再由佢地兩兄妹壓個D出嚟同脫模，今次係佢地第二次用呢個星星模，估唔到已經幾純熟啦。