夾心曲奇二重奏：果醬曲奇、榛子醬曲奇 Cookies with Strawberry jam and Nutella filling

我以為我寫咗個食譜，原來未喎。而家只係全憑記憶想番出嚟，不過因為近來都係用同一個曲奇份量整，所以都唔係太難，所不同嘅係中間嘅料。用果醬同榛子醬係李生嘅提議，呢度要俾個credit佢先，個idea就好似我地細個食克力架沾麥芽糖咁。

曲奇材料：（約做出20份夾心曲奇餅，視大小而定）

低筋麵粉　　　13安士=368g（我用中筋粉8安士=227g+粟粉5安士=142g）
杏仁粉　　　　4安士=113g
全蛋　　　　　1隻
牛油　　　　　4安士=113g
糖粉　　　　　2安士=57g
黃糖　　　　　2安士=57g

曲奇做法：
1）麵粉、杏仁粉、糖粉過篩，加入黃糖拌勻。
2）牛油切成細粒，加入粉中以rubbing in方式加入粉中搓勻，成微黃色麵包糠狀。
3）雞蛋打入拌勻。
4）搓成一個圓形dough後，放入雪櫃雪至少4個鐘或至過夜。
5）雪好後把dough取出，用麵棒揉成不厚於半cm，以曲奇印模印出曲奇餅，我今次用咗兩個一大一小星星印模，一半曲奇為中空有窿，另一半係全塊曲奇。

6）放入預熱325度F(=160度C)的焗爐中，焗約15至20分鐘。

組合曲奇方法：

材料：
士多啤梨果醬　　隨意（其他味道果醬都可以）
榛子醬　　　　　隨意

做法： 

1）曲奇放涼後，在全塊曲奇面塗上一層果醬或榛子醬

2）取另一塊中空曲奇放面，略為按壓即成。

小貼士： 

1）塗果醬或榛子醬時切勿貪心，否則D醬流晒出嚟就會令個餅濕晒又唔美觀。 呢三塊夾心曲奇分別搽咗不同份量果醬，你可以睇到出嚟嘅效果係點樣；太多或太少都唔適合，最好就如左上角果一塊咁就最好啦。

2）曲奇不要做得太厚，因為最後係要兩塊組合成一塊，如果曲奇本身太厚就唔好睇又唔好味，因為餅同醬嘅比例唔平衡。
3）因為搽咗果醬，曲奇不要放太久（即係俾個籍口你快D食晒），因為放多幾日果醬會令個餅濕軟冇咁脆口。
4）可以嘗試不同果醬，我自己覺得士多啤梨醬味同色都係最好嘅。
5）榛子醬冇想像中甜，亦可以嘗試花生醬，不過論樣同味，榛子醬都係較受歡迎。

後記： 

豬扒妹同哥哥已經係李太嘅御用助手，佢地已經包辦所有印模工序（當然對位嘅係李太），因為又係已經夜啦，印完曲奇之後，李太就趕晒兩個去瞓覺，之後曲奇出爐之後，我就有個好安靜嘅環境去搽果醬啦。第二日佢地兩個試完味後，居然好意外地兩個都鍾意食榛子醬多D，反而李生就鍾意士多啤梨果醬味。