真夠薑嘅薑餅心心 Gingerbread heart cookies

近來因為要準備聖誕節送禮，幾乎隔晚就開焗爐整曲奇，做完一批玻璃曲奇，我想加埋薑餅應吓節，夜晚整薑餅時先發覺冇黃薑粉、荳蔻粉同丁香粉（真係撞鬼，個廚房百無，明明一向都有存貨，就係搵唔到），於是就用真嘅薑嚟整薑餅，又因為未買薑餅人模，於是就用我嘅至愛心心模，有加咗椰絲，有加咗朱古力，都好似OK啦，雖然薑餅唔係我至愛，不過呢個味道都唔錯。

材料：（約做25塊） 

低筋粉　　　10安士=285g（我用麵粉7安士=200g加粟粉3安士=85g）

麥芽糖　　　3大湯匙

黃糖　　　　2大湯匙

蛋　　　　　1隻

薑汁　　　　2 1/2茶匙

菜油　　　　3大湯匙

肉桂粉　　　1茶匙 (cinnamon)

鹽　　　　　少許

小蘇打　　　半茶匙（baking soda）

牛奶　　　　少許（掃餅面用）

餅面裝飾：

椰絲　　　　適量

朱古力　　　適量

做法：

1）我先磨新鮮薑成薑蓉，之後用兩隻匙羹搾出薑汁備用。

2）將黃糖、麥芽糖、菜油混合，加入薑汁拌勻，再加入雞蛋打勻。

3）麵粉過篩，加入鹽、小蘇打、肉桂粉，拌勻。

4）將糖蛋糊續少加入麵粉中拌勻，直至成為一個光滑嘅粉團，如果太乾可以加入少許菜油或牛奶，太濕就加少許粉。

4）有時間就放入雪櫃一個鐘，冇時間可以加多少少粉搓實D即用。

5）焗爐預熱450度F=230度C，將麵團壓成約半cm厚，以印模印出心心薑餅，先焗10分鐘。如果整椰絲薑餅，就要而家先掃上牛奶再撒椰絲喺餅面至入爐焗。 

6）冇椰絲薑餅取出於餅面掃上牛奶，再入焗爐以350度F多焗5分鐘。有椰絲薑餅可以不用取出，只調低爐溫再焗多5分鐘。

 

7）朱古力放盤中隔水溶解，將薑餅一半掃入朱古力，放wax paper上待冷卻後就可以入盒放好。

小貼士： 

1）薑汁最好過篩去渣先加入糖漿中，放咗一陣嘅薑汁要搞勻。

2）麥芽糖如果太硬，較難混合，我放個玻璃杯入熱水中就容易攪拌，但加雞蛋就唔好隔熱水攪，怕會整熟D蛋就攪唔勻。

3）溶朱古力可加入少許牛奶較易溶，但切勿加太多，真係好少就得架啦，唔係就有排D朱古力都唔硬。

4）薑餅浸朱古力時，我發現朱古力太杰會難控制，但太稀之後要等好耐而會硬，我用一個spatula去將朱古力淋上薑餅面，另外如果只加朱古力於餅面唔包餅底會較易處理。

同場加映：哥哥要同薑餅影張相，有一半薑餅係哥哥同豬扒妹印架，但佢地俾媽咪趕去瞓覺，睇唔到薑餅出爐。

後記： 

今晚整咗兩盤薑餅心心，加埋之前兩晚整咗玻璃曲奇入好袋綁實，加埋手製嘅咭，就可以送俾同事做聖誕禮物，雖然賀咭係比較粗製，希望同事都唔介意啦。