聖誕節系列之三：DIY裝飾

李生唔鍾意放聖誕樹，因為屋企細冇地方，而且對仔女太好奇，所以即使我地有一大盒聖裝飾（Christmas ornaments）喺屋企都冇用武之地。同李生初初結婚果年同之前果年，我都係用最簡單又唔花錢嘅DIY手作佈置屋企。三藩市係凍，但聖誕節有雪嘅機會幾乎係零，所以我果兩年都整咗個以白色聖誕為題嘅裝飾，其實呢個概念係以前香港屋企同公司已經用過，我真係好鍾意出嚟個感覺，好靚又唔花費，而且整同拆都好方便。

要嘅材料只係白紙、剪刀、魚絲（幼線都得）同透明膠紙。

白紙剪成正方形

對摺成一個三角形

再分三等份摺兩摺（成為一個等腰三角形）

之後再喺中間對摺，然後就用剪刀隨意剪出圖案，但千萬唔可以由左至右剪斷，除非你想整個小雪花，否則個雪花就會好細個；最後剪好後修齊底邊。

將張紙攤開，就會係一個雪花，剪得越多，圖案就會越細緻。

做好多個雪花之後就可以用魚絲加膠紙貼好，由天花板或門頂吊下，我會建議雪花有大有細，一來善用紙張，二來有大有細，出嚟效果就有遠近啦。我自己剪時冇畫定紙樣，只係拎住剪刀隨意剪，所以就個個雪花都不一樣，而事實雪花就好似人嘅指紋一樣，冇兩片係完全一樣，所以我就大可無的放矢，鍾意點剪就點剪。

另外，雪花又可以貼喺玻璃窗上面，夜晚有燈光透出會好靚，朝早只要有非白底窗簾托底都會好突出。咁啱我見到有一家人嘅窗門用咗同一個concept去裝飾，大家可以見到個效果係點。

另外有一個DIY idea，只要去公園執D松樹枝，去超市都有得賣，都唔係好貴，之後加D聖誕波聖誕garland，用條靚絲帶綁起掛於門前，就係獨一無二嘅Christmas wreath。

今年因為公司屋企都千萬樣嘢忙，李太根本就冇時間整咩聖誕佈置，只係騰出時間同對仔女整吓goodies bags，今日就剪咗兩個雪花俾佢地，佢地有樣學樣用把剪刀剪下剪下，當然唔期望佢地剪到D咩，就當係訓練吓佢地嘅手部小肌肉。