冬至晚餐

今年因為99有事去咗姑仔果度，冬至得老爺同叔仔兩個人喺屋企，我媽就叫埋佢地兩個做節，所以今年勁多餸，因為唔可以整七個餸，於是就最少要八個啦。

今晚有七個大人兩個小朋友，唉，又係九男女，唔知點解由以前開始就係成日過節開大食會都會係呢個組合，不過，只要開開心心一家人坐埋食餐飯就最緊要。

未齊人要蓋好D餸先。

過節三寶：燒肉

過節三寶：白切雞，係李太父母自己劏自己煮，絕對新鮮。

過節三寶：炆冬菇蠔鼓，仲有腐竹同魚蛋，一碟滿足晒幾個口味。

有肉要有魚至應節：蒸魚一條。

李太爸爸好鍾意食蟹，一次買咗兩隻，李太都係蟹殺手，今晚食咗大半隻。

金蒜炒芥蘭

呢個係特別整俾哥哥同豬扒妹，兩兄妹好鍾意西芹、紅蘿蔔同魚蛋。

湊夠八樣菜，於是斬咗大舊叉燒。

飯後糖水係南北杏木瓜，係兩兄妹至愛之一。

呢個係鮑魚煲雞湯，仲有金華火腿、排骨，係無意中見到韓國超市大減價，每隻雪鮑魚US$3.5，於是買咗4隻，先煲湯再切片食，今晚其實太多餸，都冇食到呢個菜。

呢餐李太只係幫手食，冇幫手煮，因為當日唔係假期，李太要返足8個鐘頭工，辛苦晒李太媽媽。