自家製雲吞 Won Ton Soup

今晚整咗雲吞，諗住俾仔女明日做早餐，老公試過味話OK。最開心係用新鮮健康材料做，冇加味精，味道又幾好。呢個做法係用原材料整，用咗兩個不同包法整。豬扒妹八卦擔櫈仔嚟睇我做咩，我話包雲吞，佢話幫手，我話佢太細個唔識，等佢大D先啦。之後李生捉咗佢同哥哥去擦牙，佢地好似劏豬咁喊話唔要爸爸擦牙要媽媽，因為唔鍾意爸爸擦，但我對手做緊嘢冇計啦。

當我煮好擺好位影相果陣，佢地就擦完牙，兩個都走入嚟問我做緊咩，順便投訴爸爸，話唔要爸爸幫佢地擦牙，豬扒妹見我試味又話想食，但佢已經擦咗牙，當然唔可以再食嘢，我話已經留咗D未煮嘅俾佢地明日食，而家要去瞓覺先。

材料：（約30隻）

中蝦　　　　12隻
雲吞皮　　　30張
黃芽白　　　1小個

醃料：

豉油　　　　1湯匙
麻油　　　　1茶匙
胡椒粉　　　1/4茶匙
蛋白　　　　1隻

做法：
1）中蝦去殼，頭殼留用，肉略拍切細，再刴碎，但不同刴至爛，有少少粒狀會較有咬口。
2）黃芽白約1/3洗淨切絲再切碎，用手揸乾水份後加入蝦中攪勻，加入醃料拌勻。
3）包雲吞時切勿貪心，不要放太多餡料，否則好易爆皮，太多料亦都唔好食。

第一款雲吞包法：餡料放中間，以手指摺起雲吞皮，合成一個荷包狀，以姆指壓落餡料上方的雲吞皮上，因為蝦肉中已加蛋白，不用再以額外蛋漿封口。

第二款雲吞包法：將餡料放雲吞皮中間，對摺成一個三角形，不必完全對稱perfect，將餡料壓到雲吞皮下方，再將裝有餡料的一部份雲吞皮反摺番上去，兩邊雲吞皮再反落嚟壓在有餡料的一部份下面，就好似一個人將對腳交叉一樣。

4）餘下黃芽白洗淨切塊，湯煲加水煲滾，黃芽白與蝦殼加入滾水中煲至再滾後再煮5分鐘。
5）將雲吞放入湯水中淥熟，生嘅雲吞係沉落煲底，熟咗就會浮面，而且雲吞皮會呈半透明狀就可以撈起。
6）雲吞食時加入菜同湯。

小貼士：

1）切勿貪心放太多餡料，一來雲吞皮薄好易會爆會穿，二來太多餡料就唔係正宗雲吞。

2）湯底可以係清雞湯加菜煲，我個食譜用蝦殼只係想物盡其用唔浪費。

3）雲吞唔同包角仔唔駛形狀完美，出街食果D都係就咁揸埋口。

4）正宗雲吞一般係加入韮黃粒，唔係加入菜粒，但因為小朋友唔太鍾意韮黃味，所以我一物二用，將黃芽白煲湯兼做雲吞餡，而事實加咗黃芽白，雲吞有少少咬口，味又唔會太濃。