聖誕節系列之六：甜品菠蘿批 Pineapple Pie

上次感恩節蘋果批大受歡迎，因為今年聖誕99不在家，所以聖誕大餐由李生李太主理，李生特別指定要整蘋果批，但早前去groceries shopping，見到菠蘿減價，每個US$1.49，買咗兩個，我提議整菠蘿批，李生話冇問題。當姑仔話帶甜品時，李生一口拒絕，李生話佢老婆會整個批，make from scratch，語氣好自豪，即係話李太不容有失，OK，盡力啦。

批皮材料：（2張9吋批皮）

中筋粉　　　2杯半（20安士=567g）

鹽　　　　　1/2茶匙

牛油　　　　1杯（8安士=227g）雪硬

泠水　　　　適量（今次用咗1/4杯=60ml）

批餡材料：

菠蘿　　　　1至1個半（視乎批盤同菠蘿大小）

鹽　　　　　少許

糖　　　　　1杯（8安士=227g）

麵粉　　　　1/4杯（2安士=57g）

肉桂粉　　　1茶匙

荳蔻粉　　　1/4茶匙（可以唔加）

牛油　　　　1安士(28g)

蛋黃　　　　少許（可以唔用）

批皮做法：

1）中筋粉過篩，加入鹽拌勻。

2）牛油由雪櫃取出，以圓頭刀切成細粒，以手指搓入粉中成微黃麵包糠狀。

3）續少加入冷水拌成麵團，以保鮮紙包裹放入雪櫃最少4小時，我通常雪過夜。

4）取出麵團切成兩份，最好其中一份略多少少做批底部份。

5）將麵團壓成圓形薄麵皮，足夠蓋上焗盤就足夠。

6）焗盤掃上牛油，把麵皮放入焗盤內，以手指壓成形，待用。

7）較小的一個麵團一樣壓成一張薄麵皮，以印模壓出一個個花紋，冇印模可以叉子刺出一個個小孔，以便排氣。麵皮壓好後放一旁備用。

批餡做法：

1）菠蘿去皮去釘後切成約3mm薄片，鹽放入水中溶解，將菠蘿片放入鹽水中浸一會撈起瀝去水份，我用一個salad spinner將水份隔出。

2）混合糖、麵粉、肉桂粉、荳蔻粉拌勻。

3）把菠蘿片排在批皮上，撤上一層肉桂糖粉，再排一層菠蘿，撤上糖粉，如此類推，一層菠蘿一層糖粉至所有菠蘿全部放入批中。

4）牛油切細粒撤在菠蘿片面上。

5）蓋上另一塊麵皮，用手指壓實底面兩張麵皮邊，今次我剪齊底面批皮，約比焗盤邊多出半吋，再由外向內反摺再壓實成批邊花紋。

6）焗爐預熱425度F(220度C)約15分鐘。

7）蛋黃掃在批面上（今次我冇掃蛋黃，所以焗出嚟批面冇咁深色）放入批盤先焗15分鐘，之後較細至350度F(180度C)，再焗40至45分鐘，見到批餡起泡就可以取出，放涼後才可以切件。

小貼士：

1）菠蘿要切得薄，否則大大塊一來難切，二來水份太多好易整到個批水淋淋，如果菠蘿切厚片就要略搾乾水份。

2）批皮雪過夜會較硬，但只要用麵捧壓薄之後就唔難整。

3）蛋黃掃批面會令批皮焗好之後上色，唔加都可以，只係個色較淡，就好似今次李太整呢個冇加蛋黃嘅，其實都幾睇得吓。

後記：

呢個菠蘿批都好評如潮，姑仔62 99讚不絕口，佢地話成世人未聽過菠蘿批，但今次食完好鐘意，仲讚李太菠蘿切得好薄，個批好好味。李生都好鍾意食，話個批皮同菠蘿好夾味；有人鍾意食係主婦最大嘅動力。