甜絲絲蕃薯撻 Sweet Potato Tarts

我跟本台灣甜品書整個撻皮，點知個份量唔知係印錯定點，個dough完全唔得，濕到雪完一晚都roll唔到，加極手粉都仲係痴住個roller，心知照整都係唔得，把心一橫自己嚟，由咁睇係油份太多，粉嘅份量唔夠，於是我就續少續少加粉，足足加咗10安士粉個dough至叫做OK，於是我再雪多一日至整。但因為加多咗粉，個dough出嚟足足夠兩次用，一於今晚整住一半dough先，另一半留番明日整，或者到時整曲奇，等哥哥同豬扒妹可以又玩印模曲奇，今晚因為要試份量，我唔俾得佢地兩個幫手，哥哥聽到冇得幫手即時喊，真係有眼淚果隻，令佢傷心，媽媽真係過意唔去，但因為又係「夜媽媽」整餅，實在冇時間可以俾佢慢慢玩。

等聽日啦囝囝，OK？

撻皮材料：（調整到整12個份量）
低筋麵粉　　　13安士=365g（我用中筋粉8安士=225g+粟粉5安士=140g）
杏仁粉　　　　4安士=115g
全蛋　　　　　1隻
牛油　　　　　4安士=115g
糖粉　　　　　2安士=57g
黃糖　　　　　2安士=57g

餡料：

蕃薯　　　　　1條（中型，約1磅）
牛油　　　　　1.5安士=42g
黃糖　　　　　4安士=115g
蛋黃　　　　　2個
麵粉　　　　　2安士=57g
肉桂粉　　　　半茶匙

裝飾：
原粒杏仁　　　6粒
椰絲　　　　　適量
糖粉　　　　　適量

撻皮做法：
1）麵粉、杏仁粉、糖粉過篩，加入黃糖拌勻。
2）牛油切成細粒，加入粉中以rubbing in方式加入粉中搓勻，成微黃色麵包糠狀。
3）雞蛋續隻打入拌勻。
4）搓成一個圓形dough後，放入雪櫃雪至少4個鐘或至過夜。
5）雪好後把dough取出，用roller揉成不厚於半cm，以圓班模印出12個撻皮。

6）續個撻皮放入模中，以叉於撻皮粉團的底部和旁邊拮幾次。

餡料做法：
1）蕃薯先煮熟，再用匙羹壓爛成蕃薯泥。

2）黃糖加入蕃薯泥中拌勻。
3）牛油略溶加入拌勻。
4）麵粉過篩加入拌勻。
5）蛋黃續個打入拌勻。
6）最後撒上肉桂粉拌勻即成。

組合：1）把餡料注入撻皮後，一半的撻中心放一粒杏仁，另一半撻以椰絲圍邊。

2）放入預熱350度F(175度C)的焗爐中焗30分鐘，中途打開爐，將撻盤前後掉轉，確保不會一邊焗燶。

3）焗好取出後，將少許糖份撤上有杏仁的撻上裝飾。

小貼士：
1）若不喜歡杏仁粉味道，可以奶粉代替。
2）中途掉轉焗盤係確保唔會一邊焗燶一邊又未熟透。
3）裝飾可以其他食材代替，例如朱古力醬、草莓醬等。
4）肉桂粉可加可不加，加咗就多一份肉桂香味。