第一次整油條 Chinese Crullers

李生係瘋狂地鍾意食油條，但可惜三藩市油條嘅水準真係非常不濟，遠遠不能同香港嘅油炸鬼比較：唔係唔脆唔鬆就係太油，一口咬落去就覺得係咀嚼成口油，偏偏個價錢就貴到冇人信，由美金$2.25到$3一條不等，如果香港賣白粥油炸鬼嘅移民過嚟，只要手藝好，將會不愁搵唔到錢。李太每次去餐館見到menu上有油條都會點俾李生食，或者遺傳自李生，豬扒妹同哥哥都好鍾意油條，特別係哥哥，已經去到同李生爭食嘅地步。

無意喺FB中見到有位女士教整油條，初初只係抱住積管睇吓嘅心態去睇，因為以前曾經網上搜尋過油條食譜，一大堆咩臭粉咩發酵等等已令我卻步，但呢一個食譜睇落都好簡單，材料都唔多，步驟係多少少，但唔難整，不過要隔晚搓定粉，煮嘅時間亦都唔太長。

材料：

低筋粉　　　7安士（我冇低筋粉，所以用咗4安士中筋粉加3安士粟粉）

發粉　　　　3 1/2茶匙（baking powder）

鹽　　　　　少許

菜油　　　　3茶匙

水　　　　　3.5安士

做法：

1）低筋粉過篩，加入發粉、鹽、菜油同水拌勻成一個麵團。

2）將麵團放入大碗中，以保鮮紙蓋住，靜待一小時。

3）之後拍打麵團約5分鐘，方法係由麵團底一邊拉起再蓋到麵團另一邊，之後以拳頭輕力拍打一下，又由麵團另一個位置以相同方法拍打，做10次後底面反轉麵團，用相同方式又做10次，約做5分鐘。

3）將麵團放入膠袋中紥緊袋口置雪櫃中落夜，我用一個細密實袋，非常方便。

4）第二日取出麵團置室溫45分鐘。

5）之後於工作台上掃油，放上麵團，搓成一條長條，約為兩隻手掌長。

6）用手指壓成約半cm厚度、食指長度麵團，用刀切齊頭尾部份。

7）將麵團每2cm切成幼條，兩條麵條面對面重疊，以長燒烤叉於麵條中間壓出一條痕。

8）兩手捉實麵條兩端，拉成一條約8吋長麵條。

9）油燒熱，放入之前切出麵團頭尾部份試油溫。

10）放入拉長之麵條，至麵團沉起後不斷反轉油條，直至油條變成金黃色，取出放涼。

小貼士：

1）麵團第二日取出切勿再反覆搓咁多，否則個質地就會唔鬆化。

2）我用中筋粉出嚟效果係外面夠脆，但中間唔夠鬆脆，我想應該用低筋粉至可以做到內外都脆嘅效果。

3）工作台要掃足夠油，另外燒炸叉亦要塗少許油，因為個麵團都幾黏。

4）拉麵條時要盡量拉得平均，出嚟個油炸鬼至靚。

5）今次我用半煎炸方式，唔放全鑊油，油只蓋過油條約一半。

後記：

我初初見到製成品個樣，我好氣餒，因為真係唔多好睇，因為我拉得唔係幾好，而且拉得唔夠長，個油條望落去好似好實，心諗今次又浪費食材，睇怕要入垃圾桶。李生入到廚房見到，望一下就講：好似好實喎，不過佢好俾面拎起一條放入口，點知佢話：OK喎，好味，外脆內軟。我拎起一條食，又真係喎，原來好似人咁不可以貌相，外皮真係脆架，裏面好軟熟，比起三藩市好多餐館賣嘅油條更好味，但當然唔夠香港買到嘅油炸鬼咁出色。不過我好開心，以前以為自己整唔到，原來都唔係好難，只係我要改進下拉油條嘅技巧同去買低筋粉，以後一定會成日整俾李生同對仔女食，好過出去買。

原食譜來自德國嘅Maria，佢個youtube channel叫Wantanmien，呢條係佢教整油條嘅youtube link: http://www.youtube.com/user/wantanmien#p/a/u/0/z2x84br_VYU